Magbenepisyo sa Inyo Grupo sa Pag-alagad sa Latagon
1. Ano nga mga pagpakamaayo sa Pagtinuon sang Kongregasyon sa Libro ang matigayon gihapon sa grupo sa pag-alagad sa latagon?
1 Nanamian ka bala sadto sa Pagtinuon sang Kongregasyon sa Libro? Diutay lang kita, gani mas matawhay ang kahimtangan. Mas mahapos man kita makigsuod sa isa kag isa kag makapalig-unay. (Hulu. 18:24) Nahibaluan gid sang nagadumala sa grupo ang aton kahimtangan kag mahatagan niya kita sing personal nga pagpalig-on. (Hulu. 27:23; 1 Ped. 5:2, 3) Ini nga mga benepisyo matigayon gihapon sa aton grupo sa pag-alagad sa latagon.
2. Ano ang aton himuon para mangin suod kag mabakod sa espirituwal ang isa kag isa sa aton grupo?
2 Magpasangkad: Ang kadamuon sang miembro sang grupo sa pag-alagad sa latagon halos pareho man sa grupo sang pagtinuon sadto. Bangod “nagapanikasog [kita] sing tingob,” mas nagasuod pa gid kita sa isa kag isa. (Fil. 1:27) Pila na sa inyo grupo ang nakaupod mo? Makapasangkad ka pa bala? (2 Cor. 6:13) Puede man naton agdahon kon kaisa ang iban sa aton grupo nga updan kita sa aton Pangpamilya nga Pagsimba ukon sa pagkaon. Sa iban nga kongregasyon, nagabuslanay ang mga grupo sa pag-amuma sa nagaduaw nga humalambal. Nagatipon ang grupo sa pagkaon kag pagpalig-unay bisan pa indi makaupod ang humalambal.
3. Ano ang pila ka kahigayunan nga makabaton kita sing pagpalig-on sa aton grupo sa pag-alagad sa latagon?
3 Bisan pa duha ka beses na lang kita magtipon bilang kongregasyon, wala ini nagapahangop nga indi na matatap sing maayo ang mga manugbantala. May gintangdo nga manugtatap ang kada grupo nga amo ang nagahatag sing personal nga pagpalig-on kag paghanas sa mga miembro sini sa ministeryo. Kon wala ka pa naupdan sa ministeryo sang inyo manugtatap sang grupo, pangabaya sia. Isa pa, may isa ka Sabado kag Domingo kada bulan sa diin ang manugtatap sang pag-alagad nagapakig-upod sa isa ka grupo. Sa mga kongregasyon nga may pila lang ka grupo sa pag-alagad sa latagon, mahimo niya bisitahon ang kada grupo sing duha ka beses kada tuig. Naplano mo na bala nga makagua sa latagon kon magduaw sia sa inyo grupo?
4. (a) Paano ginaorganisar ang mga miting para sa pag-alagad sa latagon? (b) Ngaa maayo nga ipagamit ang imo balay sa miting para sa pag-alagad sa latagon?
4 Mas bentaha kon lainlain nga lugar ang ginatipunan sang kada grupo para sa pag-alagad sa latagon kon Sabado kag Domingo sa halos pareho nga oras. Mahapos na lang para sa mga manugbantala nga magkadto sa ginatipunan kag sa teritoryo. Mahapos man organisahon ang kahimusan sa paggua gani makaumpisa sila gilayon sa teritoryo kag mabantayan man sila sing maayo sang manugtatap sang grupo. Pero may mga kahimtangan nga mas maayo nga mag-upod ang duha ukon kapin pa nga grupo. Kon tingob nga nagatipon ang kongregasyon para sa pagbantala sa una nga Sabado sang bulan ukon pagkatapos sang Pagtinuon sa Ang Lalantawan, mas maayo kon magtipon anay ang kada grupo sing pila ka minutos para organisahon sila sang ila manugtatap antes takpan paagi sa pangamuyo ang miting para sa pag-alagad sa latagon.—Tan-awa ang kahon nga “Puede Mo Bala Ipagamit ang Imo Balay?”
5. Bisan pa wala na sing Pagtinuon Sang Kongregasyon sa Libro, ano ang ginapasalig sa aton?
5 Bisan pa wala na sing Pagtinuon Sang Kongregasyon sa Libro, padayon kita nga ginaamanan ni Jehova sang tanan naton nga kinahanglanon para mahimo ang iya kabubut-on. (Heb. 13:20, 21) Ginaatipan gid kita ni Jehova, amo nga wala kita ginakulang. (Sal. 23:1) Madamo sing pagpakamaayo nga matigayon paagi sa aton grupo sa pag-alagad sa latagon. Kon nagapasangkad kita kag “nagasab-ug sing bugana magaani man [kita] sing bugana.”—2 Cor. 9:6.
[Kahon sa pahina 6]
Puede Mo Bala Ipagamit ang Imo Balay?
Sa iban nga kongregasyon nagatipon sing tingob ang mga grupo sa pag-alagad sa latagon bangod wala sing balay nga matipunan. Ang miting para sa pag-alagad sa latagon bahin sang kahimusan sang kongregasyon, gani isa ka pribilehiyo kon sa imo balay ini hiwaton. Puede mo bala ipagamit ang imo balay? Indi ka magkabalaka bisan gamay lang ini. Binagbinagon sang mga gulang ang pila ka butang subong sang lokasyon sang inyo balay pareho sang ila ginahimo sadto kon nagapili sing balay para sa pagtinuon sa libro. Kon gusto mo ipagamit ang imo balay, ipahibalo ini sa inyo manugtatap sang grupo.