Ano ang Pagtan-aw sa Akon ni Jehova?
1. Ngaa ginpaanggid ang Biblia sa espiho?
1 Pirme ka bala nagapangespiho? Ang kalabanan sa aton nagahimo sini adlaw-adlaw para makita naton ang mga dapat kay-uhon. Ang Biblia ginpaanggid sa espiho. Kon basahon naton ini makita naton ang aton nasulod nga pagkatawo, nga amo ang ginatan-aw ni Jehova. (1 Sam. 16:7; Sant. 1:22-24) Ang Pulong sang Dios “makahantop sang mga panghunahuna kag mga tinutuyo sang tagipusuon.” (Heb. 4:12) Paano ang pagbasa kag pagpamalandong sa Biblia adlaw-adlaw makabulig sa aton nga makita ang mga butang nga dapat naton pauswagon agod mangin mas maayo kita nga mga ebanghelisador?—Sal. 1:1-3.
2. Paano kita mabuligan sang Biblia nga mausisa ang aton kaugalingon?
2 Gamita ang Biblia Subong Espiho: Ang kasaysayan sang Biblia parte sa matutom nga mga alagad ni Jehova nagatudlo sa aton kon ano nga mga kinaiya ang ginakahamut-an niya. Halimbawa, ginpakita ni David ang kakugi sa ngalan sang Dios. (1 Sam. 17:45, 46) Maisog nga nagboluntaryo si Isaias sa pagbantala sa mabudlay nga teritoryo. (Isa. 6:8, 9) Bangod sa tudok nga gugma ni Jesus sa iya Amay sa langit, gintamod niya ang ministeryo nga tuburan sang paumpaw kag kalipay sa baylo nga kabug-atan. (Juan 4:34) Ang unang siglo nga mga Cristiano makugi nga nagbantala, nagsalig kay Jehova, kag determinado nga indi mag-untat. (Binu. 5:41, 42; 2 Cor. 4:1; 2 Tim. 4:17) Ang pagpamalandong sa sini nga mga halimbawa makabulig sa aton nga mausisa ang aton kaugalingon para mapauswag ang kalidad sang aton pag-alagad.
3. Ngaa dapat maghimo kita gilayon sing mga pagbag-o?
3 Kay-uha ang mga Depekto: Siempre pa, wala pulos ang pagpangespiho kon pabay-an lang ang depekto. Makapangabay kita kay Jehova nga buligan kita nga mausisa ang aton kaugalingon kag maghimo sing mga pagbag-o. (Sal. 139:23, 24; Luc. 11:13) Bangod malip-ot na lang ang tion kag kabuhi ang nadalahig, dapat maghimo kita gilayon sing mga pagbag-o.—1 Cor. 7:29; 1 Tim. 4:16.
4. Ano ang resulta kon ang isa nagatuon sa Pulong sang Dios kag nagaaplikar sang iya natun-an?
4 Ang nasulod nga pagkatawo sang isa—nga amo ang ginatan-aw ni Jehova—mas importante sangsa nagua nga panagway. (1 Ped. 3:3, 4) Ano ang resulta kon ang isa nagatuon sa Pulong sang Dios kag nagaaplikar sang iya natun-an? Sia mangin “indi malipaton nga manugpamati, kundi manugtuman sing hilikuton, mangin malipayon sa paghimo niya sini.” (Sant. 1:25) Mangin malipayon kita kag epektibo nga mga ministro bangod ‘ginapabanaag naton kaangay sang mga espiho ang himaya ni Jehova.’—2 Cor. 3:18.