Gamita ang Biblia nga Daw Espiho

Ginpaanggid ni disipulo Santiago ang Biblia sa isa ka espiho nga makabulig sa aton nga makita kon ano gid kita nga sahi sang tawo. (Sant. 1:​22-25) Paano naton magamit sing maayo ang Biblia nga daw espiho?

Basaha ini sing maayo. Kon pasiplatan lang naton ang aton hitsura sa espiho, posible nga indi naton makita nga may tap-ing gali kita. Sing kaanggid, kon padali lang ang aton pagbasa sang Biblia, indi man naton makita ang mga dapat naton bag-uhon sa aton kaugalingon. Gani, dapat naton ini basahon sing maayo.

Magpokus sa dapat mo bag-uhon, indi sa dapat bag-uhon sang iban. Nagapang-espiho kita para makita kon bala may tap-ing ang aton hitsura, indi para makita kon bala may tap-ing ang hitsura sang iban. Sing kaanggid, wala kita nagabasa sang Biblia para makita ang mga dapat bag-uhon sang iban. Kay man, indi ini makabulig para makita naton ang mga dapat naton bag-uhon sa aton kaugalingon.

Mangin makatarunganon. Kon may makita kita pirme nga dapat naton bag-uhon kon nagabasa kita sang Biblia, posible gid nga maluyahan kita. Gani, dapat kita mangin makatarunganon paagi sa pagtan-aw sa aton kaugalingon pareho sa pagtan-aw ni Jehova sa aton.​—Sant. 3:17.