Pagpauswag sang Aton mga Ikasarang sa Ministeryo—Pag-umpisa sing Pagtuon sa Biblia Paagi sa Ginatudlo sang Biblia nga Libro

Kon Ngaa Importante: Madamo nga tawo ang mahimo wala nakahangop kon magsiling kita nga nagatanyag kita sang wala bayad nga pagtuon sa Biblia. Mahimo maghunahuna sila nga maentra sila sa isa ka grupo para magtuon ukon matuon sila paagi sa sulat. Sa baylo nga magtanyag sing pagtuon, mas maayo nga ipasundayag kon paano himuon ang pagtuon. Sa sulod sang pila lang ka minuto, kag bisan sa ganhaan lang, mapakita mo nga mahapos lang kag makalilipay ang pagtuon sa Biblia.

Kon Paano Ini Himuon:

Pagkatapos magpakilala, pamangkuta ang tagbalay kon nabalaka man sia sa palaabuton.
Hinambiti nga madamo nga tawo ang may pareho man sa iya nga ginakabalak-an, kag ipakita sa iya ang mga kaundan sang Ginatudlo sang Biblia nga libro. Ipaathag nga ini nga libro makabulig para mahangpan niya ang ginatudlo sang Biblia parte sa palaabuton kag sa iban pa nga topiko. Dayon, pamangkuta sia kon ano nga kapitulo ang gusto niya istoryahan.
Idaho sa iya ang libro, kag buksi sa kapitulo nga iya ginpili. Ipaathag nga ang mga pamangkot sa umpisa sang kapitulo ginasabat sang masunod nga mga parapo.
Pangabaya ang tagbalay nga basahon ang una nga parapo kon luyag niya. Dayon, basaha ang pamangkot para sa sina nga parapo, kag binagbinaga ninyo nga duha ang sabat. Basaha kag binagbinaga ang ginsambit nga mga teksto nga nagasakdag sa sabat. Ipakita sa iya ang mga sabat nga ginmarkahan mo sa imo libro.
Binagbinaga ang masunod nga parapo, pero sa sini nga tion pangabaya ang tagbalay nga tinguhaan niya nga sabton ang pamangkot sa iya kaugalingon nga mga tinaga.
Hatagi sia sing komendasyon, kag maghimo sing kahimusan nga magbalik para padayunon ang pagtuon.
Kon nagakaigo, ipakita sa iya ang video sa jw.org nga Paano Ginahimo ang Pagtuon sa Biblia?

Tilawi Ini sa Sini nga Bulan:

Ipangamuyo kay Jehova nga pakamaayuhon ang imo mga panikasog nga makasugod sing pagtuon sa Biblia.—Fil. 2:13.
Tinguhai nga makaumpisa sing pagtuon sa Biblia paagi sa Ginatudlo sang Biblia nga libro ukon ipakita ang video nga Paano Ginahimo ang Pagtuon sa Biblia? bisan makaisa lang kon nagaministeryo.