Ang 2015 nga Teokratikong Eskwelahan Para sa Ministeryo Nagabulig sa Aton nga Mapauswag ang Aton Pagpanudlo

¹ Si salmista David nagsulat: “Kabay nga ang akon ginahambal kag ginapamalandungan mangin kalahamut-an sa imo, O Jehova, nga akon Igang kag akon Manunubos.” (Sal. 19:14) Luyag man naton nga ang aton mga pulong mangin kalahamut-an kay Jehova bangod ginapakabahandi naton ang aton pribilehiyo sa paghambal sing kamatuoran sa kongregasyon kag sa ministeryo. Ang Teokratikong Eskwelahan Para sa Ministeryo isa sa mga paagi nga ginahanas kita ni Jehova para sa ministeryo. Ini nga paghanas ginahimo kada semana sa sobra 111,000 ka kongregasyon sa bilog nga kalibutan. Ginabuligan sini ang tanan nga kauturan nga mangin kalipikado subong ministro sang maayong balita, kag mangin mataktikanhon, makabuluyok, kag maisugon sa pagpanudlo.—Binu. 19:8; Col. 4:6.

² Ang mga bahin sa iskedyul para sa 2015 kuhaon sa Insight on the Scriptures, Volume 1, sa “Ano ang Matun-an Naton sa Pulong sang Dios?” kag sa “Glossary sang mga Termino sa Biblia” nga makita sa Bag-ong Kalibutan nga Badbad. Dugang pa, ginbag-o ang gintalana nga tion sa talalupangdon nga mga punto sa Biblia kag sa Asaynment Num. 1. Ini nga mga pagbag-o lakip ang mga instruksion kon paano ihatag ang mga bahin binagbinagon sa masunod nga mga parapo.

³ Talalupangdon nga mga Punto sa Biblia: Ang mga utod nga hatagan sini nga bahin may duha ka minuto nga binagbinagon ang isa ka makapalig-on kag praktikal nga punto sa Kasulatan gikan sa pagbasa sa Biblia sina nga semana. Paagi sa maayo nga paghanda, mapaambit ang mapuslanon nga punto sa kongregasyon sa gintalana nga tion. Dayon, pareho sa kinaandan nga ginahimo, may anom ka minuto para makakomento ang kada tumalambong sing 30 segundos ukon kubos pa sa ila nasapwan nga makapalig-on nga punto sa ila pagbasa sa Biblia sina nga semana. Kinahanglan ang paghanda kag pagdisiplina sa kaugalingon agod makakomento sing makapalig-on sa sulod sing 30 segundos, pero maayo ini nga paghanas sa aton. Nagahatag man ini sing kahigayunan sa iban nga makakomento sa ila natun-an sa ila pag-research.

⁴ Asaynment Num. 1: Ang tion nga gintalana sa pagbasa sa Biblia ginhimo na lang nga tatlo ka minuto ukon kubos pa kag mas malip-ot ang basahon. Dapat i-rehearse sing pila ka beses ini nga bahin paagi sa pagbasa sing matunog kag pagbantay sing maayo sa husto nga pagmitlang kag talunsay nga pagbasa sang mga tinaga agod mahangpan ang mga ideya nga ipaalinton. Dapat tinguhaan sang tanan nga katawhan ni Jehova nga magbasa sing maayo, bangod may importante nga papel ang pagbasa sa aton pagsimba. Nalipay gid kita nga madamo sang aton kabataan ang maayo magbasa! Ginakomendahan ang mga ginikanan bangod sa ila mahigugmaon nga pagbulig sa ila kabataan nga mangin maayo nga manugbasa.

⁵ Asaynment Num. 2: Ini nga bahin magalawig sing lima ka minuto kag ihatag ini sa sister. Dapat gamiton ang tema nga gin-asayn. Kon ang bahin kuhaon sa materyal nga masapwan sa Bag-ong Kalibutan nga Badbad, dapat ini iaplikar sa isa ka bahin sang ministeryo nga realistiko kag praktikal sa lokal nga teritoryo. Kon ang bahin parte sa isa ka karakter sang Biblia nga kuhaon sa Insight on the Scriptures, Volume 1, dapat tun-an sang estudyante ang impormasyon sa sini nga karakter, pilion ang nagakaigo nga mga teksto nga gamiton, kag ipakita kon ano ang matun-an naton sa halimbawa sini nga karakter. Mahimo makagamit sing dugang nga mga teksto nga naangot sa tema. Ang manugtatap sang eskwelahan magaasayn sing isa ka assistant.

⁶ Asaynment Num. 3: Ini nga bahin magalawig sing lima ka minuto kag ihatag ini sa brother ukon sister. Kon ihatag ini sa sister, dapat ini ipresentar pareho sa Asaynment Num. 2. Kon ihatag naman ini sa brother, dapat ipresentar ang materyal nga ginkuha sa Insight subong pamulongpulong nga ginahunahuna ang tumalambong. Dapat pasangkaron sang estudyante ang gin-asayn nga tema, pilion ang nagakaigo nga mga teksto nga gamiton, kag ipakita kon ano ang matun-an naton sa halimbawa sang karakter sa Biblia.

⁷ Bag-o nga Paagi sa Paghatag sing Asaynment Num. 3 Para sa mga Brother: Kon ang bahin kuhaon sa Bag-ong Kalibutan nga Badbad, dapat ini ipresentar subong isa ka pasundayag sang pangpamilya nga pagsimba ukon pag-alagad sa latagon. Sa masami, ang manugtatap sang eskwelahan amo ang magaasayn sing assistant kag danyag. Ang assistant dapat miembro sang pamilya sang estudyante ukon isa ka brother sa kongregasyon. Mahimo makagamit sing dugang nga mga teksto nga nagapadaku sang mga prinsipio sa Biblia nga naangot sa tema. Kon kaisa, mahimo ihatag ini nga bahin sa isa ka gulang. Mahimo sia magpili sang iya assistant kag danyag. Pat-od nga mapalig-on ang kongregasyon nga makita ang mga gulang nga nagapasundayag sang ila kalantip sa pagpanudlo sa miembro sang ila pamilya ukon sa isa ka brother.

⁸ Laygay: Pagkatapos sang kada bahin sang estudyante, ang manugtatap sang eskwelahan magahatag sing komendasyon kag makapalig-on nga laygay base sa Magbenepisyo sa Pagpanudlo Sang Teokratikong Eskwelahan Para sa Ministeryo sa sulod sang duha ka minuto. Kon ipakilala sang manugtatap sang eskwelahan ang may bahin, indi niya pag-ihambal kon ano nga tulun-an ang panghikutan sang estudyante. Pagkatapos sang kada bahin, ang manugtatap magahatag sing sinsero nga komendasyon sa estudyante, ihambal niya ang tulun-an nga ginpanghikutan sang estudyante kag hinambitan sing espesipiko kon paano ginpanghikutan ini sing maayo ukon mainayuhon nga ipaathag kon paano makabenepisyo ang estudyante kon hatagan niya sing dugang nga igtalupangod ina nga tulun-an.

⁹ Ang pormas para sa laygay sang kada estudyante makita sa pahina 79 asta 81 sang iya personal nga kopya sang Eskwelahan Para sa Ministeryo. Pagkatapos mahatag sang estudyante ang iya bahin, ang manugtatap sang eskwelahan magasulat sing nagakaigo nga nota sa libro sang estudyante kag pamangkuton sia sing pribado kon nahimo niya ang pag-ensayo sa sina nga tulun-an. Pagkatapos sang miting ukon sa iban nga tion, mahimo hatagan sing komendasyon ukon dugang nga mabuligon nga panugda ang estudyante. Ang ginahatag nga personal nga atension kag laygay sa kada estudyante dapat kabigon nga kahigayunan para buligan sia nga mag-uswag sa espirituwal.—1 Tim. 4:15.

¹⁰ Kon magsobra sa oras ang estudyante, ang manugtatap sang eskwelahan ukon ang iya assistant dapat mangin alisto kag mahalungon sa paghatag sing sinyales, pareho sang pagbagting ukon pagtuktok, para mahibaluan sang estudyante nga sobra na sia sa oras. Kon mabatian ini sang estudyante, dapat niya gilayon tapuson ang iya bahin kag maghalin sa plataporma.—Tan-awa ang Eskwelahan Para sa Ministeryo, p. 282, par. 4.

¹¹ Ang tanan nga nakalab-ot sa mga kalipikasyon ginapalig-on nga magpalista sa Teokratikong Eskwelahan Para sa Ministeryo. (Tan-awa ang Eskwelahan Para sa Ministeryo, p. 282, par. 6.) Paagi sa sini nga eskwelahan nahanas ang katawhan ni Jehova nga magbantala kag magtudlo sing maayong balita sang Ginharian nga may kombiksion, dignidad, kag gugma. Pat-od gid nga nahamuot si Jehova nga dayawon sia sang tanan nga nakabenepisyo sing daku sa teokratiko nga pagtudlo!—Sal. 148:12, 13; Isa. 50:4.