Gamita ang “Ano ang Matun-an Naton sa Pulong sang Dios?”—Para sa Pagsugod sang Pag-istoryahanay

1. Ano nga bag-o nga galamiton ang makabulig sa aton sa ministeryo?

¹ Ang Bag-ong Kalibutan nga Badbad may bahin sa umpisa nga “Ano ang Matun-an Naton sa Pulong sang Dios?” Paano naton magamit ining bag-o nga galamiton sa paghanda sang aton presentasyon sa ministeryo? Bangod may mga teksto sa idalom sang lainlain nga topiko sa Biblia, pareho sa Reasoning nga libro, makabulig gid ini sa pagsugod sang pag-istoryahanay.

2. Paano naton magamit ang “Ano ang Matun-an Naton sa Pulong sang Dios?” sa ministeryo?

² Mahimo mo gamiton ang pamangkot 8 kag magsiling: “Nagaduaw kami sing makadali bangod madamo nga tawo ang nagapamangkot, ‘Ang Dios bala ang balasulon sa pag-antos sang tawo?’ [Sa iban nga teritoryo, mas epektibo kon ipakita ang pamangkot sa tagbalay.] Ano sa banta mo? [Tuguti sia nga magsabat.] Ang Biblia nagasabat sa sini.” Basaha mismo sa Biblia ang ginsambit nga mga teksto kag binagbinaga ini. Kon interesado ang tagbalay, mahimo mo ipakita sa iya ang 20 ka pamangkot sa introduksion kag papilia sia sang isa ka pamangkot nga binagbinagon ninyo sa masunod. Ukon itanyag ang isa sa aton mga publikasyon nga ginagamit sa pagtuon nga nagaunod sing dugang nga impormasyon nga inyo ginbinagbinag.

3. Paano naton magamit ang “Ano ang Matun-an Naton sa Pulong sang Dios?” kon nagabantala sa mga tawo nga indi Cristiano ang relihion?

³ Ang pamangkot 4 kag 13 asta 17 mahimo makabulig kon nagabantala sa mga tawo nga indi Cristiano ang relihion. Halimbawa, mahimo mo gamiton ang impormasyon sa pamangkot 17 kag magsiling: “Nagaduaw kami sing makadali sa mga pamilya. Nagaugyon ka bala nga madamo sing problema ang mga pamilya subong? [Tuguti sia nga magsabat.] Nakabulig sa madamo nga mag-asawa ini nga pinamulong: “Ang asawa dapat may tudok nga pagtahod sa iya bana.” [Indi na pagsambita nga naghalin ini sa Efeso 5:33. Kon babayi ang imo maistorya, mahimo mo sambiton ang ginasiling sang Efeso 5:28.] Sa banta mo, makabulig ini kon iaplikar sang mag-asawa?”

4. Antes ka maghalin, ano ang puede mo himuon kon nagaistorya sa mga tawo nga indi Cristiano ang relihion?

⁴ Antes ka maghalin, maghimo sing kahimusan nga mapadayon ang pag-istoryahanay sa masunod nga tion. Mahimo istoryahan ninyo sa masunod ang isa pa ka teksto sa pamangkot nga inyo ginbinagbinag. Sa nagakaigo nga tion, pahibalua ang tagbalay nga ang maalamon nga laygay nga imo ginpaambit sa iya naghalin sa Biblia. Base sa inyo naistoryahan sang nagligad kag sa pagtamod sang tagbalay sa Biblia, itanyag sa iya ang publikasyon nga sa banta mo makapainteres sa iya.—Tan-awa ang suplemento sang Disiembre 2013 nga Ang Aton Ministeryo sa Ginharian.