Pagpalig-on sang Interes Paagi sa Paghimo sing Epektibo nga mga Pagduaw Liwat
1 Ang tagsa ka nahanda sing maayo nga pamulongpulong nagalakip sang nagapukaw sing interes nga introduksion, nagahatag sing impormasyon nga lawas, kag nagapahulag nga konklusion. Ang introduksion nagabihag sang igtalupangod sang tumalambong, apang kon wala ang lawas kag konklusion, ang pamulongpulong mahimo nga indi kompleto. Naaplikar man ini nga prinsipio sa aton pag-alagad. Isa ka maayo nga butang nga pukawon ang interes sang tagbalay sa una nga pagduaw, apang dapat naton huptan nga palig-unon inang una nga interes paagi sa paghimo sing epektibo nga mga pagduaw liwat.
2 Ngaa ginapahanugutan sang Dios ang pag-antos? Wala ka bala nagaugyon nga ining topiko ginahunahuna sang madamo nga tawo sa karon? Amo sina kon ngaa maayo nga ipautwas ini nga pamangkot sa katapusan sang una nga pagduaw upod ang tinutuyo nga sabton ini sa imo pagduaw liwat.
3 Mahimo mo ini isiling:
◼ “Hello. Sang nagligad nga pagsugilanunay naton, nag-utwas ang topiko nahanungod sa pagpahanugot sang Dios sa pag-antos, kag nangako ako nga magabalik upod ang pila ka impormasyon para sa imo. Madamo nga tawo ang nagabatyag nga kon ang Dios tunay nga nagaulikid sa aton, kuntani gintapos niya ang pag-antos. Ayhan amo man sina ang imo ginbatyag. [Pasabta ang tagbalay.] Ang Biblia nagapasalig sa aton nga ang Dios tunay nga nagaulikid. [Basaha ang 1 Juan 4:8.] Ang Dios may maayong mga rason sa pagtugot sang pag-antos nga magpadayon tubtob karon. Ang isa sina nga mga rason ginapaathag sa 2 Pedro 3:9. [Basaha.] Ang iban nga mga rason ginabalay sa sining brosyur.” Nian buksi ang pahina 12-14 sang brosyur nga Nagaulikid Gid Bala ang Dios sa Aton? kag hambali ang isa ka punto nga makawiwili.
4 Sa paghinakop sang inyo paghambalanay, magpautwas sing isa pa ka pamangkot kag sugiri ang tagbalay nga malipay ka sa pagpaambit sang pila ka makawiwili nga impormasyon upod sa iya sa pagbalik mo. Madamo nga tawo ang luyag makahibalo kon ano ang nagakatabo sa isa ka tawo sa kamatayon. Ngaa indi maghimos nga hambalan ina nga topiko sa kombeniente nga tion?
5 Mapuslanon para sa imo nga huptan ang tatlo ka sadsaran nga prinsipio sa hunahuna. Magmapasibusibuon. Ang tagbalay mahimo nga wala maanad sa pagpain sing isa ka espisipiko nga tion para sa paghinun-anon sang Biblia. Magmalip-ot. Indi magtener sing tuman kadugay ukon magtuptop sang tuman kadamo nga punto sa primero. Sa kalabanan nga mga hitabo, mas maayo ang reaksion sa imo mga pagduaw kon ginatuptupan mo ang pila lamang ka punto sa malip-ot nga tion. Magmainit kag magmainabyanon. Ipakita sa indibiduwal nga personal ka nga interesado sa iya subong indibiduwal.
6 Ang aton pangunang tulumuron amo ang paglakip sa tagbalay sa Makasulatanhon nga paghambalanay. Nian luyag naton magsugod sing mapatubason nga pagtuon sang Biblia sa puluy-an sa isa ka nagakaigo nga publikasyon, subong sang Mabuhi sing Dayon nga libro. Mangin imo ina nga kalipay kon mapailubon nga palig-unon mo ang nahauna nga interes paagi sa paghimo sing epektibo nga mga pagduaw liwat.