Pagtudlo nga Ginagamit ang Maayong Balita nga Brosyur

1. Paano gindesinyo ang Maayong Balita nga brosyur?

¹ Subong sang ginbinagbinag sa Hulyo nga Ang Aton Ministeryo sa Ginharian, ang isa sa panguna naton nga galamiton sa pagtudlo amo ang brosyur nga Maayong Balita Halin sa Dios! Ang ginsambit nga mga kasulatan wala ginkutlo agod mabasa ini sang tagbalay sa Biblia mismo. Madamo sang aton publikasyon nga ginagamit sa pagtuon ang puede tun-an sing isahanon sang tagbalay. Pero ini nga brosyur gindesinyo nga tun-an upod ang isa ka manunudlo. Gani, kon ginatanyag naton ini, tinguhaan naton nga ipakita kon paano ini tun-an agod mabatyagan sang tagbalay nga makalilipay nga mahibaluan ang maayong balita halin sa Biblia.—Mat. 13:44.

2. Paano naton magamit ang Maayong Balita nga brosyur sa una nga pag-istoryahanay?

² Sa Una nga Pag-istoryahanay: Mahimo ka magsiling: “Nagabisita kami sing makadali bangod madamo nga tawo ang nabalaka sa ila palaabuton. Sa banta mo, magaayo pa bala ang aton kahimtangan? [ Tuguti sia nga magsabat.] Ang Biblia nagaunod sing maayong balita nga nagahatag sa aton sing paglaum. Ari ang pila sa mga pamangkot nga ginasabat sang Biblia.” Ihatag ang brosyur sa tagbalay, kag papilia sia sang pamangkot nga makita sa likod. Dayon, ipakita sa iya kon paano ini tun-an nga ginagamit ang una nga parapo sang leksion nga iya ginpili. Ang isa pa ka paagi amo ang paggamit sing pamangkot nga makapukaw sing interes sang tagbalay base sa leksion nga imo ginpili, dayon ipakita kon paano ang brosyur makabulig sa iya nga makita ang sabat sa Biblia. Kon may video sa jw.org nga may kaangtanan sa leksion, mahimo mo ini ipatan-aw sa tion sang imo presentasyon.

3. Paano dumalahan ang pagtuon nga ginagamit ang Maayong Balita nga brosyur?

³ Kon Paano Dumalahan ang Pagtuon: (1) Basaha ang nanumeruhan nga pamangkot nga madukot sing letra agod mabuligan ang tagbalay nga mapokus ang iya hunahuna sa panguna nga punto. (2) Basaha ang parapo sa ubos sini. (3) Basaha ang mga kasulatan nga nagahilay, kag maggamit sing mataktikanhon nga mga pamangkot agod makita sang tagbalay kon paano ginasabat sang Biblia ang nanumeruhan nga pamangkot. (4) Kon sobra sa isa ang parapo, sulita ang paagi 2 kag 3. Kon may video nga naangot sa pamangkot kag wala mo pa ini mapatan-aw sa tagbalay, ipatan-aw ini sa iya. (5) Dayon, pangabaya ang tagbalay sang iya personal nga sabat sa pamangkot agod mapat-od nga nahangpan niya ang punto.

4. Ano ang makabulig sa aton nga mangin lantip sa paggamit sining mapuslanon nga galamiton?

⁴ Mangin pamilyar sa sining mapuslanon nga galamiton. Gamita ini sa tagsa ka higayon. Antes sang inyo pagtuon, hunahunaa ang imo estudyante kag kon paano mangatarungan nga ginagamit ang mga kasulatan sa leksion. (Hulu. 15:28; Binu. 17:2, 3) Samtang nagadugang ang imo ihibalo kag kalantip, mangin paborito mo na nga gamiton ini nga brosyur sa pagtudlo sa mga tawo sing kamatuoran!