Pagsugod sing mga Pagtuon sa Ginapatuman nga Brosyur
1 Ginapakita sang report halin sa bug-os nga kalibutan nga ang brosyur nga Ano ang Ginapatuman sang Dios sa Aton? isa ka epektibo nga galamiton sa pagtudlo sing kamatuoran sa mga tawo. Linibo ka pagtuon sa Biblia ang ginasugdan kada semana sa sining brosyur. Madinalag-on ka bala nga nakasugod kag nakadumala sing pagtuon sa Biblia sa Ginapatuman nga brosyur?
2 Samtang ang kalabanan nahapusan sa pagpahamtang sing brosyur, ang iban nabudlayan sa kon ano ang isiling nga magadul-ong sa pagtuon. Anong mga paagi ang natukiban sang iban nga epektibo sa pagsugod sing mga pagtuon sa Biblia nga nagagamit sing Ginapatuman nga brosyur? Ang masunod nga mga panugda makabulig.
3 Magpanugda nga Ipasundayag ang Pagtuon: Kon nagaduaw sa una nga tion ukon nagaduaw liwat, sa baylo nga magtanyag lamang sing pagtuon sa Biblia sa tagbalay, sarang naton mapasundayag kon paano ginahimo ang kurso sa pagtuon sa Biblia. Ginadula sini ang katanhagaan kag ang kabalaka nga mahimo mahunahuna sang madamong tagbalay sa tinaga nga “pagtuon.” Sa tion nga mahibaluan naton nga ipasundayag ini, matukiban naton nga paagi sa simple lamang nga introduksion, makapadayon kita tubtob sa pagtuon.
4 Ang Paghanda ang Sekreto: Ang aton kapagsik nga makasugod sing mga pagtuon sa Biblia ginaangot sing direkta sa kon daw ano kita kahanda. Ang abanse nga paghanda magabulig sa aton nga madaug ang bisan ano man nga pagpangalag-ag sa pagpakigbahin sa hilikuton nga pagtuon sa Biblia. Paagi sa pag-ensayo sang aton presentasyon sing pila ka beses, labi kita nga magaayo sa pagpakigsugilanon, sa pagpabutyag sing natural sang aton kaugalingon kag sa aton mismo mga tinaga. Indi lamang ini nagabulig sa aton nga indi makulbaan kundi nagapapahamtang man sa tagbalay.
5 Kon nagaensayo, ang pag-oras sang imo presentasyon mabuligon agod masugiran mo ang tagbalay kon daw ano kadugay ang kinahanglan sa pagpasundayag sang pagtuon. Sa tapos mapakilala ang iya kaugalingon, ang isa ka utod nga lalaki nagasiling: “Naghapit ako agod ipakita sa imo ang amon wala bayad nga programa sa pagtuon sa Biblia. Mapasundayag ko ini sa sulod sang mga lima ka minuto lamang. May yara ka bala lima ka minuto?” Ang Leksion 1 sang Ginapatuman nga brosyur sarang mapasundayag sa mga lima ka minuto. Sa pagkamatuod, pinili lamang nga kasulatan ang sarang mabasa sa sini nga kalawigon sang tion, apang paagi sa pagtapos sa nahauna nga leksion sa sulod sang pila ka minuto, ang tagbalay makaeksperiensia sang iya nahauna nga pagtuon. Nian sugiri sia nga sa imo pagbalik agod tun-an ang Leksion 2, 15 minutos lamang ang kinahanglan mo.
6 Ang masunod nga presentasyon napamatud-an nga epektibo:
◼ “Luyag ko ipakita sa imo ang tuman ka simple, apang madasig nga kurso sang pagtuon sang Biblia sa puluy-an nga nagagamit sining brosyur nga Ano ang Ginapatuman sang Dios sa Aton? Natukiban sang madamo nga sa 15 minutos lamang sa isa ka semana sa sulod sang 16 ka semana, nakita nila ang makaalayaw nga Makasulatanhon nga mga sabat sa sining importante nga mga pamangkot sa Biblia.” Ipakita sa malip-ot ang mga kaundan. Nagabukas sa Leksion 1, magsiling: “Kon mahatagan mo kami sing mga lima ka minuto, luyag namon ipakita sa imo kon paano ini ginahimo. Ang Leksion 1 ginatig-uluhan sing ‘Kon Paano Mo Mahibaluan Kon Ano ang Ginapatuman Sang Dios.’” Dayon basaha ang tatlo ka pamangkot, kag ipaathag ang mga numero sa parentesis. Basaha ang parapo 1, kag ipakita sa tagbalay kon paano makita ang sabat. Ang tagbalay mahimo mapangabay sa pagbasa sang parapo 2. Nian magsiling: “Pasad sa sining impormasyon, paano mo sabton ini nga pamangkot? [Basaha liwat ang pamangkot, kag tuguti ang tagbalay sa pagkomento.] Matalupangdan mo nga may yara mga kasulatan sa tagsa ka parapo. Ginatudlo sini ang aton igtalupangod sa sabat sang Biblia sa sining mga pamangkot. Halimbawa, basahon naton ang 2 Timoteo 3:16, 17 kag tan-awon naton kon ginasuportahan sini ang imo sabat nahanungod sa awtor sang Biblia.” Sa tapos mabasa ang parapo 3, mabinagbinag ang pamangkot, kag mabasa ang Juan 17:3, ipatuhoy ang igtalupangod sang tagbalay sa ihibalo nga matigayon niya paagi sa pagrepaso sa Leksion 1. Sa sini nga punto mapakita mo ang Leksion 2 kag mabasa ang katapusan nga pamangkot, “Ano ang duha ka paagi nga makatuon kita nahanungod sa Dios?” Nian mamangkot: “San-o ikaw may mga 15 minutos agod mabinagbinag naton ang Leksion 2 kag mahibaluan ang sabat?”
7 Importante nga huptan nga simple ang paghambalanay kag hatagi sing komendasyon ang tagbalay kon mahimo. Kon nagahimo sing kahimusan para sa masunod nga pagduaw, sa baylo nga pamangkuton ang tagbalay kon luyag niya magpadayon, palig-una lamang sia nga sundon ang amo gihapon nga paagi para sa masunod nga leksion. Sugiri sia nga nalangkag ka nga makabalik. Ang pila ka manugbantala nagtan-ay sa pagtuon paagi sa telepono kon nangin mabudlay ang iskedyul. Mahimo man nimo mapalig-on ang estudyante nga ibutang ang brosyur sa maayo kag kombeniente nga lugar agod makuha ini dayon sa imo masunod nga pagduaw.
8 Mangin Determinado: Samtang ang yabi sa kadalag-an amo ang paghanda, dapat kita mangin determinado sa pagtatap sini. Ang pagtudlo sing isa ka leksion sa sulod sang pila ka minuto mahimo nga makahalangkat, gani mangin determinado nga ensayuhon ang presentasyon sing madamo nga beses kon kinahanglanon agod mangin talunsay sa pagpasundayag sang pagtuon. Tilawi nga ipasundayag ang isa ka pagtuon sa tanan nga masugilanon mo sa ganhaan, sing dipormal, kag sa pagpanaksi sa telepono. Kon nabudlayan ka nga makasugod sing pagtuon sa Biblia, indi maluyahan sing buot. Ang kadalag-an sa pagsugod sing mga pagtuon sa Biblia nagakinahanglan sing determinasyon kag sing hanuot nga handum nga mapaambit ang kamatuoran sa iban.—Gal. 6:9.
9 Paagi sa pagsunod sini nga mga panugda, may pribilehiyo man ikaw nga mabuligan ang isa nga makalakat sa dalan padulong sa kabuhi, paagi sa pagsugod kag sa pagdumala sing pagtuon sa Biblia sa Ginapatuman nga brosyur.—Mat. 7:14.