Kon Paano Malab-ot ang Tagipusuon sang Aton Ginatudluan
1. Ano ang epekto sang panudlo ni Jesus sa tagipusuon sang mga nagpamati sa iya?
1 Nalab-ot ni Jesucristo ang tagipusuon sang mga nagpamati sa iya. Isa ka bes, “natandog gid” ang tagipusuon sang iya mga disipulo pagkatapos niya mapaathag sing maayo ang Kasulatan sa ila. (Luc. 24:32) Bangod ang pagtuman sa Dios dapat maghalin sa tagipusuon, paano naton matandog ang balatyagon sang aton ginatudluan agod mapahulag sila nga maghimo sang mga pagbag-o sa ila kabuhi?—Roma 6:17.
2. Paano makabulig ang pagkamataktikanhon kag pagkamahinantupon para malab-ot ang tagipusuon?
2 Mangin Mataktikanhon kag Mahinantupon: Para sa madamo nga tawo, ang pagtudlo lang sa ila kon ano ang maayo kag malain indi makapahulag sa ila nga magbag-o. Ang matuod, mahimo madula ang ila gana sa pagtuon kon paulanan naton sila sang mga teksto para pamatud-an nga sala ang ila ginapatihan. Gani, dapat naton anay hantupon kon ngaa amo sina ang iya ginapatihan kag ginahimo para mapahulag sia nga magbag-o. Ang mataktikanhon kag nahunahuna sing maayo nga mga pamangkot magapalig-on sa iya nga ipabutyag ang iya panghunahuna. (Hulu. 20:5) Paagi sini, makapili kita sang impormasyon halin sa Pulong sang Dios nga makalab-ot sa iya tagipusuon. Gani, dapat kita magpakita sing personal nga interes kag mangin mapailubon. (Hulu. 25:15) Dumduma nga indi palareho ang pag-uswag sang kada isa sa espirituwal. Kinahanglan ang tion para makaimpluwensia ang espiritu ni Jehova sa ila panghunahuna kag ginahimo.—Mar. 4:26-29.
3. Paano naton mabuligan ang aton ginatudluan nga mapalambo ang positibo nga mga kinaiya?
3 Buligi Sila nga Palambuon ang Positibo nga mga Kinaiya: Ang mga teksto sa Biblia nga nagasugid sang kaayo kag gugma ni Jehova makabulig sa aton ginatudluan nga mapalambo ang positibo nga mga kinaiya. Mahimo naton gamiton ang Salmo 139:1-4 ukon Lucas 12:6, 7 agod ipakita sa iya nga interesado gid sa aton si Jehova. Kon matun-an nila nga apresyahon ang wala tupong nga kaayo ni Jehova, mapalambo nila ang gugma kag debosyon sa Dios. (Roma 5:6-8; 1 Juan 4:19) Kag kon mahibaluan nila nga apektado si Jehova sa ila ginahimo, mapahulag sila nga himuon ang mga butang nga makapahamuot kag makapadungog sa iya.—Sal. 78:40, 41; Hulu. 23:15.
4. Ngaa importante nga tahuron naton ang kahilwayan sa pagpili sang aton ginatudluan?
4 Wala kita ginapilit ni Jehova nga tumanon sia. Sa baylo, ginapangabay niya kita nga mangin maalamon paagi sa pagsunod sa iya mga laygay. (Isa. 48:17, 18) Kon ginatudluan naton ang mga tawo nga maghimo sang ila kaugalingon nga desisyon, ginailog naton si Jehova. Kon sila mismo ang maghimo sang pagbag-o sa ila kabuhi, magaresulta ini sa dayon nga kaayuhan. (Roma 12:2) Magapasuod man ini sa ila kay Jehova, nga “nagausisa sang mga tagipusuon.”—Hulu. 17:3.