PAGKABUHI BILANG CRISTIANO
Magkalipay sa Pagbantala sing Maayong Balita
Nabudlayan ka bala sa pagbantala? Madamo sa aton ang magasabat sing huo. Ngaa? Siguro pirme may nagapamatok ukon wala nagasapak sa aton teritoryo ukon nakulbaan kita mag-istorya sa indi naton kilala. Makadula ini sang aton kalipay. Ang aton Dios nga ginasimba malipayon, gani gusto niya nga malipayon kita sa pag-alagad sa iya. (Sa 100:2; 1Ti 1:11) Ano ang tatlo ka rason nga dapat kita magkalipay sa pagbantala?
Una, ang mensahe nga aton ginasugid nagahatag sing paglaum. Bisan pa nadulaan na sing paglaum ang mga tawo subong, mahatagan naton sila sing paglaum paagi sa “maayong balita tuhoy sa mas maayo nga butang.” (Isa 52:7) Ang maayong balita sang Ginharian sang Dios makapahalipay man sa aton. Antes magbantala, pamalandungi ang mga pagpakamaayo nga ihatag sang Ginharian sang Dios sa duta.
Ikaduha, ang maayong balita nga aton ginabantala magahatag sing pisikal kag espirituwal nga benepisyo sa mga tawo. Matun-an nila nga biyaan ang malain nga mga buhat kag matigayon ang kabuhi nga wala sing katapusan. (Isa 48:17, 18; Ro 1:16) Ang aton hilikuton pareho sang search-and-rescue. Bisan pa indi gusto sang iban nga luwason sila, padayon naton nga ginapangita ang mga gusto maluwas.—Mat 10:11-14.
Ikatlo, kag ang pinakaimportante, ang aton pagbantala nagapadungog kay Jehova. Ginapabaloran gid niya ang aton pagbantala. (Isa 43:10; Heb 6:10) Maalwan nga ginahatag niya ang iya balaan nga espiritu para matuman naton ini nga hilikuton. Gani, mangabay kay Jehova sing kalipay, nga isa ka aspekto sang bunga sang balaan nga espiritu. (Ga 5:22) Paagi sa iya bulig, malandas naton ang mga kabalaka kag makabantala nga may kaisog. (Bin 4:31) Bisan ano man ang reaksion sang mga tawo sa aton teritoryo, magakalipay kita sa aton asaynment nga pagbantala.—Eze 3:3.
Diin sa sini nga panimuot ang gusto mo ipakita sa ministeryo? Paano ka mangin malipayon?
TAN-AWA ANG VIDEO NGA IBALIK ANG KALIPAY PAAGI SA PAGTUON KAG PAGPAMALANDONG, DAYON SABTI ANG MASUNOD NGA MGA PAMANGKOT:
Ngaa dapat prioridad naton ang regular nga personal nga pagtuon bisan pa mapisan kita sa pagbantala kada bulan?
Paano naton masunod si Mary?
San-o ka nagapamalandong sa Pulong sang Dios?
Ano ang nagapahalipay sa imo sa pagbantala sing maayong balita?