Mga Pamangkot Gikan sa mga Bumalasa

Ang mabasa bala sa Galacia 5:22, 23 amo lang “ang mga kinaiya nga ginapatubas sang espiritu”?

Mabasa sa sini nga teksto ang siam ka kinaiya: “Ang mga kinaiya nga ginapatubas sang espiritu amo ang gugma, kalipay, paghidait, pagkamapinasensiahon, maayo nga kabubut-on, kaayo, pagtuo, kalulo, kag pagpugong sa kaugalingon.” Pero, indi lang ini ang mga kinaiya nga mapakita naton paagi sa bulig sang espiritu sang Dios.

Talupangda ang ginsulat ni apostol Pablo antes sang sini nga teksto: “Ang mga buhat sang unod . . . amo ang seksuwal nga imoralidad, kahigkuan, matampalason nga paggawi, pagsimba sa mga diosdios, espiritismo, pag-ilinaway, kinagamo, kaimon, pagsilabo sang kaakig, pagbinaisay, pagbinahinbahin, mga sekta, kahisa, pagpahubog, magansal nga kinalipay, kag ang iban pa nga mga butang nga kaangay sini.” (Gal. 5:19-21) Gani may iban pa nga mga butang nga puede idugang ni Pablo sa “mga buhat sang unod,” pareho sang mga ginsambit sa Colosas 3:5. Sing kaanggid, pagkatapos niya masambit ang siam ka maayo nga kinaiya, nagsiling sia: “Wala sing kasuguan nga batok sa sini nga mga butang.” Sa Griego, ang “sini nga mga butang” puede man i-translate nga “kaangay sini nga mga butang.” Gani wala ginlista ni Pablo ang tanan nga maayo nga kinaiya nga mapakita naton paagi sa bulig sang balaan nga espiritu.

Mahangpan pa gid naton ini kon ipaanggid naton ang mga kinaiya nga ginapatubas sang espiritu sa mga bunga sang kapawa, nga ginsambit ni Pablo sa iya sulat sa kongregasyon sa Efeso. Nagsulat sia: “Ang mga bunga sang kapawa nagalakip sang tanan nga sahi sang kaayo, pagkamatarong kag kamatuoran.” (Efe. 5:8, 9) Gani pareho sang pagkamatarong kag kamatuoran, ang “kaayo” isa man ka “bunga sang kapawa.” Pero isa man ini ka “kinaiya nga ginapatubas sang espiritu.”

Sa sulat naman ni Pablo kay Timoteo, ginpalig-on niya sia nga ‘tinguhaan nga ipakita ang pagkamatarong, diosnon nga debosyon, pagtuo, gugma, pagbatas, kag kalulo.’ (1 Tim. 6:11) Ginsambit ni Pablo ang anom ka kinaiya, pero tatlo lang sa sini (pagtuo, gugma, kag kalulo) ang nalakip sa “mga kinaiya nga ginapatubas sang espiritu.” Pero siempre, kinahanglan man ni Timoteo ang bulig sang balaan nga espiritu para mapakita niya ang pagkamatarong, diosnon nga debosyon, kag pagbatas.—Ipaanggid ang Colosas 3:12; 2 Pedro 1:5-7.

Gani, wala ginsambit sang Galacia 5:22, 23 ang tanan nga kinaiya nga dapat ipakita sang mga Cristiano. Mabuligan kita sang balaan nga espiritu sang Dios nga mapakita ang siam ka “kinaiya nga ginapatubas sang espiritu.” Pero madamo pa nga kinaiya ang dapat naton ipakita para mangin hamtong kita nga mga Cristiano kag para ‘masuklob naton ang bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.’—Efe. 4:24.