Gusto Gid sang Tanan ang Maayo nga Palaabuton
Ano nga palaabuton ang gusto mo? Pareho sa kalabanan nga tawo, sigurado nga gusto mo man nga mangin maayo ang imo palaabuton kag sang imo pamilya. Gusto mo nga mangin malipayon kamo, wala nagamasakit, may kalinong, kag may masulhay nga kabuhi.
Pero madamo nga tawo ang nagaduhaduha kon bala matabo pa ini. Kay man naeksperiensiahan nila ang gulpi lang kag wala ginapaabot nga mga sitwasyon, pareho sang COVID-19 nga pandemic. Ginguba gid sini ang kabuhi sang madamo nga tawo kay nagresulta ini sa grabe nga kapigaduhon kag kamatayon. Bangod sini, madamo ang wala na nagapati nga mangin maayo pa ang ila palaabuton.
Ginapakita sini nga indi gid sigurado ang mga tawo sa matabo, gani nagapangita sila sing paagi para mangin maayo ang ila palaabuton. Ang iban nagasalig sa indi kinaandan nga gahom pareho sang kapalaran ukon suerte. Ang iban naman nagatinguha gid nga makatapos sa pag-eskwela kag magmanggaranon, kay nagapati sila nga paagi sini makuha nila ang ila gusto. Ang iban naman nagapati nga kon maayo sila nga tawo, mangin maayo man ang ila kabuhi.
Makabulig gid man bala ini nga mga butang para mangin maayo ang imo palaabuton? Para mabal-an mo ang sabat, binagbinaga ang masunod nga mga pamangkot:
Sa ano nagadepende ang imo palaabuton?
Mangin maayo gid man bala ang imo palaabuton kon may tinapusan ka kag kuarta?
Mangin maayo bala ang imo palaabuton kon maayo ka nga tawo?
Sa diin ka makakita sang masaligan nga giya para mangin maayo ang imo palaabuton?
Ini nga isyu sang Ang Lalantawan makabulig sa imo nga masabat ina nga mga pamangkot.