Mangin Maayo Bala ang Imo Palaabuton Kon Maayo Ka nga Tawo?

Halin pa sang una, madamo nga tawo ang nagapati nga kon maayo ka nga tawo, mangin maayo man ang imo palaabuton. Halimbawa, ang mga tawo sa Sidlangan nagapati sa isa ka kilala nga philosopher nga si Confucius (551-479 B.C.E.) nga nagsiling: “Ang indi mo gusto nga himuon sa imo, indi paghimua sa iban.”a

ANG GINAHIMO SANG MADAMO NGA TAWO

Madamo gihapon nga tawo ang nagapati nga kon maayo ang ila ginahimo, mangin maayo man ang ila palaabuton. Gani nagatinguha sila nga magpakita sing respeto, sing maayo nga mga pamatasan, maghimo sang ila mga obligasyon, kag ginatinguhaan man nila nga mangin matinlo ang ila konsiensia. Ang babayi nga si Linh nga taga-Vietnam, nagsiling: “Nagapati gid ako nga kon honest ako kag sinsero, pakamaayuhon man ako.”

Ang ini gihapon nga babayi, naga-serve sing pagkaon para sa mga pigado kag wala sing balay.

Ang iban naman nagahimo sing maayo bangod sa ginatudlo sang ila relihion. Ang lalaki nga si Hsu-Yun, nga taga-Taiwan, nagsiling, “Natun-an ko nga nagadepende sa mga ginahimo sang isa ka tawo subong kon bala mangin malipayon sia ukon magaantos sa tapos sang iya kamatayon.”

MAKABULIG BALA INI?

Sang gab-i na, masinulub-on gid ini nga babayi kag nakapoy samtang nagakugos sa iya bata nga lalaki.

Matuod gid man nga kon maghimo kita sing kaayuhan sa iban, madamo kita sing mabaton nga benepisyo. Pero, madamo man nga tawo ang nakaeksperiensia nga bisan pa nagahimo sila sing maayo sa iban, may malain gihapon nga nagakatabo sa ila kabuhi. “Naeksperiensiahan ko gid nga bisan pa maghimo ka sing maayo, puede gihapon nga may malain nga matabo sa imo,” siling sang babayi nga si Shiu Ping, nga taga-Hong Kong. “Ginatinguhaan ko gid nga maghimo sing maayo sa iban kag ginaatipan ko gid ang akon pamilya. Pero nagbulagay kami gihapon sang akon bana kag ginbayaan niya ako kag ang amon bata nga lalaki.”

Nakita man sang madamo nga indi tanan nga relihioso nga tawo maayo. “Nagsulod ako sa isa ka relihion kag ako ang naga-organize sang activities para sa mga pamatan-on,” siling ni Etsuko, nga isa ka babayi nga taga-Japan. “Daw indi ako makapati nga ang iban nga miembro sang akon relihion mga imoral, nagaagaway sa puesto, kag ginakawat nila ang pondo.”

“Ginatinguhaan ko gid nga maghimo sing maayo sa iban kag ginaatipan ko gid ang akon pamilya. Pero nagbulagay kami gihapon sang akon bana kag ginbayaan niya ako kag ang amon bata nga lalaki.”—SHIU PING, HONG KONG

Ang iban naman nga debotado gid nagalalain kay pamatyag nila wala sing pulos ang ila paghimo sing maayo. Amo gid sina ang nabatyagan ni Van nga taga-Vietnam. “Kada adlaw, nagahalad ako sing mga prutas, bulak, kag pagkaon sa altar sang akon napatay na nga mga katigulangan kay nagapati ako nga kon himuon ko ini mangin maayo ang akon palaabuton,” siling niya. “Pero bisan pa sang tanan nga kaayuhan kag mga ritwal nga ginhimo ko sa sulod sang madamo nga tinuig, nagmasakit sing malubha ang akon bana. Dayon, ang akon bata nga babayi nga nagaeskwela sa iban nga pungsod, napatay.”

KON NGAA INDI BASTANTE ANG PAGHIMO SING MAAYO

Importante gid nga maayo ka nga tawo. Pero indi buot silingon nga kon maayo ka nga tawo mangin maayo man ang imo palaabuton. Ngaa? Binagbinaga ang ginasiling sa aton sang Balaan nga mga Sinulatan.

INDI TANAN NAGAHIMO SING MAAYO

“Ang isa lamang ka makasasala, makaguba sang madamo nga kaayuhan.”—MANUGWALI 9:18.

Bisan pa ginatinguhaan mo gid nga mangin maayo nga tawo, puede ka gihapon mahalitan sang mga tawo nga kaugalingon lang ang ginapensar. Halimbawa, sa tion sang pandemic, mahimo nga ginasunod mo gid ang tanan nga protocol nga ginapatuman sang awtoridad kag ginalikawan mo nga magpalapit sa iban. Pero may mga tawo gid ’ya nga wala nagatuman sa mga protocol. Bangod sa ila ginahimo, posible gihapon nga malatnan bisan ang maayo nga mga tawo.

KON KIS-A, INDI MAATHAG SA MGA TAWO KON ANO ANG HUSTO UKON SALA

“May dalanon nga daw husto sa pagtamod sang tawo, apang ang padulungan gali sini kamatayon.”—HULUBATON 14:12.

Halin pa sang una, madamo na nga tawo ang nagahimo sang mga butang nga abi nila maayo gid. Pero sang ulihi, na-realize nila nga sala gali sila. Gani bisan pa maayo man ang ila intension, anihon gihapon nila ang resulta sang ila sala nga mga desisyon.

INDI MAPAKTAN ANG KABUHI

“Wala kamo makahibalo kon ano ang matabo sa inyo buas.”—SANTIAGO 4:14.

Bisan pa daw ano kaayo sang isa ka tawo, mahimo nga gulpi lang sia mapatay. Halimbawa, sa tion sang COVID-19 nga pandemic, madamo sa mga nag-volunteer para magbulig sa iban ang napatay. Binagbinaga man ang eksperiensia ni Liting nga isa ka babayi sa China. Napatay ang iya tatay bangod sa aksidente sa salakyan. Nagsiling sia: “Indi ko gid maintiendihan kon ngaa ang isa ka maayo nga tawo pareho kay tatay napatay. Mapisan sia, mapainubuson, kag sinsero. Si Tatay lang ang napatay sa amo nga aksidente.”

Kon ang paghimo sing maayo indi makagarantiya sang maayo nga palaabuton, ano gali ang makagarantiya? Para masabat ina nga pamangkot, kinahanglan naton sing masaligan nga giya nga makatudlo sa aton sang dapat naton himuon para mangin maayo ang aton palaabuton. Sa diin naton makita ina nga giya?

a Para sa dugang nga impormasyon parte sa mga panudlo ni Confucius, basaha ang kapitulo 7, parapo 31-35, sang libro nga Mankind’s Search for God, nga ginhimo sang mga Saksi ni Jehova. Mabasa man ini online sa www.jw.org.