Sa Ano Nagadepende ang Imo Palaabuton?

ANG GINAPATIHAN SANG KALABANAN

ASTROLOHIYA: Ang iban nagapati nga natalana na ang ila palaabuton depende sa posisyon sang mga bituon sang ginbata sila. Gani, nagabasa sila sang mga horoscope para mabal-an nila ang matabo sa ila kag makahimo sila sang maayo nga mga desisyon.

FENG SHUI: Ang iban nagapati nga may desinyo sang balay ukon mga gamit nga makadala kuno sa ila sang suerte ukon sang maayo nga palaabuton. Si Lo Wing,a nga nagaistar sa Hong Kong, nagsiling, “Ginsilingan ako sang isa ka feng shui master nga may lugar sa akon tindahan nga dapat ko butangan sang espesyal nga mga kristal para magdaku ang akon benta.”

PAGSIMBA SA NAPATAY NA NGA MGA KATIGULANGAN: May mga tawo nga nagapati nga dapat nila simbahon ang napatay na nila nga mga katigulangan ukon ang sarisari nga mga diosdios para proteksionan sila kag pakamaayuhon sini. Si Van, nga nagaistar sa Vietnam, nagsiling, “Nagapati ako nga kon simbahon ko ang akon mga katigulangan, mangin maayo ang akon kabuhi subong kag mangin maayo man ang akon palaabuton kag sang akon kabataan.”

REINKARNASYON: Madamo ang nagapati nga kon mapatay ang isa ka tawo, ibun-ag sia liwat. Kag ini kuno nga proseso, wala sing katapusan. Nagapati sila nga ang maayo ukon ang malain nga mga butang nga nagakatabo sa ila subong, resulta sang ila mga ginpanghimo sang nagligad nila nga kabuhi.

Para sa madamo, ini nga mga pagpati mga disparatis lang. Pero bisan pa sina, nagapahimalad sila gihapon, nagabasa sang mga horoscope, nagagamit sang mga Ouija^® board, sang mga tarot card, kag iban pa. Nagapati sila nga basi pa lang ini nga mga butang makabulig sa ila nga mabal-an ang ila paabuton.

NAKABULIG BALA INI?

Nangin maayo gid man bala ang kabuhi kag ang palaabuton sang mga tawo nga nagapati sa sini nga mga ritwal kag mga kustombre?

Binagbinaga ang eksperiensia ni Hào nga taga-Vietnam. Nagpati gid sia nga mabuligan sia sang astrolohiya, sang feng shui, kag sang pagsimba sa iya napatay na nga mga katigulangan. Nabuligan gid man bala sia? Si Hào nagsiling, “Naputo ang akon negosyo, nalubong ako sa utang, naggamo ang akon pamilya, kag na-depress ako.”

Si Qiuming nga taga-Taiwan nagapati man sa astrolohiya, sa reinkarnasyon, sa kapalaran, sa feng shui, kag nagasimba man sia sa iya napatay na nga mga katigulangan. Sang gintun-an niya sing maayo ini nga mga butang, nagsiling sia: “Na-realize ko nga ini nga mga panudlo kag mga kustombre nagakontrahanay kag makalilibog. Nakita ko man nga sala pirme ang prediksion sang horoscope. Kon parte naman sa reinkarnasyon, paano mo mabag-o ang imo kabuhi subong para mangin mas maayo ini sa masunod mo nga kabuhi, kon indi mo gani madumduman kon nangin ano ka sa imo nagligad nga kabuhi?”

Pareho sang na-realize ni Hào, ni Qiuming, kag sang madamo pa, ang aton palaabuton wala nagadepende sa kapalaran, sa mga bituon, sa napatay na nga mga katigulangan, ukon sa reinkarnasyon. Buot bala silingon sini nga wala na kita sing mahimo para mangin mas maayo ang aton palaabuton?

Madamo nga tawo ang nagapati nga mangin mas maayo ang ila palaabuton kon may tinapusan sila kag mangin manggaranon. Ano ang natabo sa mga tawo nga nagdesisyon nga amo sina ang ila himuon?