Ang Maayo nga Resulta sang Yuhum

SA Baguio City, sa Pilipinas, natalupangdan sang duha ka pamatan-on nga babayi ang isa ka cart. Ginagamit ini sang mga Saksi sa ila pagbantala sa publiko nga mga lugar. Ginyuhuman ni Helen, nga nagabantay sa cart, ang duha ka babayi. Nagdiretso lang sila sa paglakat, pero indi nila malipatan ang yuhum ni Helen.

Sang ulihi, samtang nagasakay sa bus ang duha ka babayi pauli sa ila balay, nakalabay sila sa isa ka Kingdom Hall kag nakita nila ang daku nga ngalan nga jw.org. Nadumduman nila nga amo man ini ang ngalan nga nakita nila sa cart. Nanaug sila dayon sa bus kag ginkadtuan nila ang Kingdom Hall. Nakita nila didto ang iskedyul sang mga miting sang lainlain nga kongregasyon.

Nagtambong ang duha ka babayi sa isa ka miting. Pagsulod nila sa Kingdom Hall, nakibot gid sila kay nakita nila si Helen. Nadumduman nila dayon nga sia ang nakita nila nga nagyuhum sa ila. Si Helen nagsiling: “Medyo ginkulbaan ako kay wala ako kabalo kon ngaa ginpalapitan nila ako. Ginhunahuna ko nga basi may nahimo ako nga indi maayo.” Pero ginpaathag sang duha ka babayi kay Helen nga nakita nila sia sa cart.

Nanamian gid ang duha ka babayi sa ila nabatian sa miting kag sa pagpakig-upod sa mga kauturan. Pagkatapos sang miting, nakita nila nga nagapanglimpyo ang iban nga kauturan, gani namangkot sila kon puede sila makabulig. Sang ulihi, ang isa sa ila nagkadto sa iban nga pungsod, pero ang isa ka babayi nagtambong sa mga miting kag nagtuon sa Biblia. Maayo gid ini nga resulta sang pagyuhum.