KON PAANO MATAPOS ANG WALA UNTAT NGA PAGDUMTANAY

3 | Dulaa ang Dumot sa Imo Hunahuna

Panudlo sang Biblia:

“Bag-uha na ninyo ang inyo panghunahuna, agod mapamatud-an ninyo sa inyo kaugalingon kon ano ang maayo kag kalahamut-an kag himpit nga kabubut-on sang Dios.”—ROMA 12:2.

Ang Buot Silingon:

Importante sa Dios ang aton mga ginahunahuna. (Jeremias 17:10) Gani magluwas nga likawan naton ang pagdumot paagi sa aton mga ginahambal ukon mga ginahimo, may dapat pa kita himuon. Dapat naton dumdumon nga ang dumot nagasugod sa aton hunahuna kag tagipusuon. Gani, dapat naton dayon untatan ang paghunahuna sang mga butang nga makapaugot sa aton, kay ginabangdan ina sang dumot. Amo lang ina ang paagi nga ‘mabag-o’ naton ang aton kaugalingon kag matapos ang wala untat nga pagdumtanay.

Ang Puede Mo Himuon:

Usisaa sing maayo ang imo ginahunahuna kag ginabatyag parte sa iban, ilabi na sa mga lain sing rasa ukon pungsod, kag dapat mangin honest ka sa sini. Pamangkuta ang imo kaugalingon: ‘Ano ang pagtan-aw ko sa ila? Amo bala sina ang akon pagtan-aw bangod kilala ko gid sila sing personal ukon basi may diskriminasyon ako?’ Likawi ang social media, mga pelikula, ukon mga kalingawan nga nagapadaku sang dumot kag kapintas.

Mabuligan kita sang Pulong sang Dios nga madula ang dumot sa aton hunahuna kag tagipusuon

Mabudlay mangin honest kon ang aton mismo mga ginahunahuna kag ginabatyag ang aton usisaon. Pero mabuligan kita sang Pulong sang Dios nga ‘mahantop ang mga panghunahuna kag mga tinutuyo sang tagipusuon.’ (Hebreo 4:12) Gani padayon nga hibalua kon ano ang ginasiling sang Biblia. Ipaanggid ang mga panudlo sini sa imo mga ginahunahuna, kag panikasugi nga maghunahuna base sa mga panudlo sang Biblia. Mabuligan kita sang Pulong sang Dios nga madula ang dumot nga “natukod sing malig-on” ukon nakapanggamot na sa aton hunahuna kag tagipusuon.—2 Corinto 10:4, 5.

Eksperiensia—STEPHEN

Ginbag-o Niya ang Iya Panghunahuna

Si Stephen kag ang iya pamilya gindumtan sang mga puti. Bangod sini, naimpluwensiahan sia sang isa ka pulitikal nga grupo nga nakilala sa pagpakig-away para sa kinamatarong sang mga sibilyan. Sang ulihi, nag-entra man sia sa mga krimen bangod sa dumot nga iya ginabatyag. Si Stephen nagsiling: “Isa ka bes nagtan-aw kami sang akon mga barkada sing pelikula tuhoy sa pag-antos sadto sang mga ulipon nga Aprikano sa Estados Unidos. Naakig gid kami sa sini nga inhustisya, gani ginsakit namon ang puti nga mga pamatan-on sa sulod mismo sang sinehan. Dayon nagkadto kami sa lugar sang mga puti, kag nagpangita pa sing mga tawo nga sakiton.”

Nagbag-o gid ang pagtamod ni Stephen sang magsugod sia sa pagtuon sing Biblia upod sa mga Saksi ni Jehova. Nagsiling sia: “Bangod nakita ko ang grabe nga pag-ihig-ihig sa rasa, may nakita ako sa mga Saksi nga nagdayaw gid ako. Halimbawa, sang nagbiyahe sa iban nga pungsod ang isa ka puti nga Saksi, ginbilin niya ang iya kabataan sa isa ka itom nga pamilya. Isa pa, ginpaistar sang puti nga pamilya sa ila balay ang isa ka itom nga pamatan-on.” Nakita ni Stephen nga ang mga Saksi ni Jehova daw pareho sa isa ka mahigugmaon nga pamilya kag nakabulig ini sa iya nga maintiendihan nga ginatuman nila ang promisa ni Jesus nga ang iya mga sumulunod magapakita sing matuod nga gugma.—Juan 13:35.

Ano ang nagbulig kay Stephen nga untatan ang pagdumot kag pagpamintas? Nakabulig sa iya ang Roma 12:2. Nagsiling sia: “Narealisar ko nga kinahanglan ko bag-uhon ang akon panghunahuna. Dapat magdesisyon ako indi lamang agod mangin mahidaiton kundi bangod kumbinsido man ako nga amo ini ang pinakamaayo nga pagkabuhi.” Subong, malinong na ang kabuhi ni Stephen kay sobra 40 ka tuig na nga gindula niya ang dumot sa iya tagipusuon.