Makabatyag Ka sang Paghidait Bisan Pa May mga Kabudlayan

1. Ano “ang paghidait sang Dios,” kag ano ang benepisyo kon may ara kita sini? (Filipos 4:6, 7)

MAY isa ka klase sang paghidait nga wala nabal-an sang mga tawo sa kalibutan. Amo ini “ang paghidait sang Dios,” ukon ang kalinong sa hunahuna bangod may hamili kita nga kaangtanan sa aton Amay sa langit. Kon may paghidait kita sang Dios, mabatyagan naton nga ginaamligan niya kita. (Basaha ang Filipos 4:6, 7.) May suod kita nga kaangtanan sa iban nga nagapalangga man sa iya, kag suod kita sa “Dios sang paghidait.” (1 Tes. 5:23) Kon kilala naton ang aton Amay, kon nagasalig kita sa iya, kag kon ginatuman naton sia, mapakalma kita sang paghidait sang Dios kon makaeksperiensia kita sang mabudlay nga mga sitwasyon.

2. Ngaa sigurado kita nga mabaton gid naton ang paghidait sang Dios?

² Posible gid bala nga makabatyag kita sang paghidait sang Dios bisan pa may mga kabudlayan pareho sang paglapta sang balatian, kalamidad, inaway, ukon paghingabot? Kon matabo ini nga mga kabudlayan, mahadlukan gid kita. Pero ginlaygayan ni Jesus ang iya mga sumulunod: “Indi kamo magkasubo ukon magkahadlok.” (Juan 14:27) Makalilipay gid kay ginsunod sang mga kauturan ining laygay ni Jesus. Paagi sa bulig ni Jehova, nakabatyag sila sang paghidait bisan pa may mabudlay sila nga mga problema.

MAKABATYAG KITA SANG PAGHIDAIT BISAN PA MAY NAGALAPTA NGA BALATIAN

3. Paano madula ang aton paghidait kon may epidemic ukon pandemic?

³ Daku gid ang epekto sang epidemic ukon pandemic sa kabuhi sang tawo. Binagbinaga ang epekto sang COVID-19 sa madamo nga tawo. Suno sa isa ka pagtuon, sobra katunga sang mga tawo nga nalakip sa isa ka survey ang nagsiling nga indi sila makatulog sa tion sang pandemic. Bangod man sa pandemic, daku ang gindugang sa kadamuon sang mga gin-atake sang nerbios, na-depress, nagapahubog kag nagadroga, nagapanakit sa miembro sang ila pamilya, kag gusto maghikog. Kon may nagalapta nga balatian sa inyo lugar, ano ang himuon mo para mabuhinan ang imo kabalaka kag mabatyagan mo ang paghidait sang Dios?

4. Bangod kabalo kita sang tagna ni Jesus parte sa katapusan nga mga adlaw, ngaa makabatyag kita sang paghidait?

⁴ Gintagna ni Jesus nga sa katapusan nga mga adlaw, may mga balatian “sa nagkalainlain nga lugar.” (Luc. 21:11) Bangod kabalo kita sini, makabatyag kita sang paghidait. Wala kita natingala kon may nagalapta nga mga balatian bangod nahangpan naton nga nagakatuman ang ginsiling ni Jesus. Gani dapat naton sundon ang ginlaygay ni Jesus para sa mga nagakabuhi sa tion sang katapusan: “Indi kamo dapat magkahadlok.”—Mat. 24:6.

5. (a) Base sa Filipos 4:8, 9, ano ang dapat naton ipangamuyo kon may nagalapta nga balatian sa aton lugar? (b) Paano nakabulig sa isa ka sister ang pagpamati sa audio recording sang Biblia, kag ano ang matun-an mo sa sini?

⁵ Kon may nagalapta nga balatian sa aton lugar, posible nga mabalaka kita kag makulbaan. Natabo ini sa isa ka sister nga si Desi.b Napatay ang iya tiyo, pakaisa, kag doktor bangod sa COVID-19. Bangod sini, nabalaka sia nga basi magmasakit man sia kag malatnan niya ang iya tigulang na nga iloy. Nabalaka man sia nga basi madulaan sia sang obra, gani nagapalibog sia kon diin sia mangita sang inugbakal sang ila pagkaon kag inugbayad sa arkila sa balay. Grabe gid ang iya kabalaka gani indi sia makatulog. Pero nakabatyag liwat sang paghidait si Desi. Paano? Nangamuyo sia kay Jehova nga buligan sia nga mangin kalmado kag maghunahuna sang maayo nga mga butang. (Basaha ang Filipos 4:8, 9.) Ginapamatian niya si Jehova paagi sa pagpamati sa audio recording sang Biblia. Nagsiling sia, “Ang makapaumpaw nga tingog sang mga nagabasa nagapakalma sa akon kag nagapahanumdom sa akon nga indi ako pagpabay-an ni Jehova.”—Sal. 94:19.

6. Paano makabulig sa imo ang personal nga pagtuon kag ang pag-attend sa mga miting?

⁶ Kon may nagalapta nga balatian, maapektuhan gid ang aton regular nga mga ginahimo. Pero panikasugi nga indi ini makaapekto sa imo personal nga pagtuon ukon pag-attend sa mga miting. Makita sa aton mga publikasyon kag mga video ang mga eksperiensia sang aton mga kauturan nga pareho sa imo ang sitwasyon, kag mapalig-on ka gid sa ila katutom. (1 Ped. 5:9) Ang mga miting naman makabulig sa imo nga hunahunaon ang makapalig-on nga mga impormasyon sa Biblia. Paagi sa mga miting, mapalig-on ka sang iban kag may kahigayunan ka nga palig-unon man sila. (Roma 1:11, 12) Kon pamalandungan mo kon paano ginbuligan ni Jehova ang iya mga alagad nga nagamasakit, nakulbaan, ukon nasubuan, magabakod ang imo pagtuo kag pagsalig nga buligan ka man niya.

7. Ano ang matun-an mo kay apostol Juan?

⁷ Panikasugi nga maistorya mo ang imo mga kauturan. Kon may nagalapta nga balatian, posible nga kinahanglan naton magdistansia sa iban. Posible nga dapat naton ini himuon bisan pa mga kauturan naton ang kaupod naton. Sa sini nga mga sitwasyon, posible nga mabatyagan mo ang ginbatyag ni apostol Juan. Gusto niya nga makita sa personal ang iya abyan nga si Gayo. (3 Juan 13, 14) Pero nahangpan ni Juan nga indi pa ini posible. Pero puede niya sulatan si Gayo, gani amo ini ang ginhimo ni Juan. Kon indi posible ang pagbisita sa imo mga kauturan, panikasugi nga tawgi sila sa telepono, mag-video call sa ila, ukon mag-text sa ila. Kon pirme mo ginaistorya ang imo mga kauturan, mabuhinan ang imo kasubo kag mangin kalmado ka. Kontaka ang mga gulang kon grabe ang imo kabalaka. Palangga ka nila, gani pamatii ang ila mga pagpalig-on.—Isa. 32:1, 2.

MAKABATYAG KITA SANG PAGHIDAIT BISAN PA MAY KALAMIDAD

8. Paano madula ang imo paghidait kon may kalamidad?

⁸ Kon nahalitan ka sang baha, linog, ukon sunog, posible nga grabe gid ang imo kabalaka sa sulod sang malawig nga tion. Kon may napatay sa imo mga pinalangga, nawasak ang imo balay, ukon naguba ang imo mga pagkabutang, posible nga nasubuan ka gid, nadulaan sang paglaum, ukon naakig pa gani. Pero indi buot silingon sini nga materyalistiko ka ukon kulang ang imo pagtuo. Nahangpan sang iban ang imo nabatyagan bangod mabudlay gid ang problema nga imo naeksperiensiahan. (Job 1:11) Pero makabatyag ka gihapon sang paghidait bisan sa mabudlay nga mga sitwasyon. Paano?

9. Ano ang ginsiling ni Jesus nga makabulig sa aton nga mangin handa sa mga kalamidad?

⁹ Dumduma ang gintagna ni Jesus. Wala naton ginailog ang pila ka tawo nga nagahunahuna nga indi gid sila maapektuhan sang kalamidad. Kabalo kita nga magadamo pa gid ang kalamidad sa aton tion subong, kag posible gid nga maapektuhan kita sang pila sini. Ginsilingan ni Jesus ang iya mga sumulunod nga antes mag-abot ang katapusan, matabo ang “mabaskog nga mga linog” kag ang iban pa nga mga kalamidad. (Luc. 21:11) Nagtagna man sia nga ‘magadamo ang kalautan.’ Makita naton ini subong sa mga krimen, kasingki, kag pag-atake sang mga terorista. (Mat. 24:12) Wala nagsiling si Jesus nga kon maapektuhan kita sini nga mga kalamidad, nagapakita ini nga ginpabay-an kita ni Jehova. Ang matuod, madamo nga matutom nga alagad ni Jehova ang nahalitan sang mga kalamidad. (Isa. 57:1; 2 Cor. 11:25) Bisan pa wala nagamilagro si Jehova para amligan kita sa tanan nga kalamidad, makasigurado kita nga hatagan niya kita sang aton mga kinahanglanon para mangin kalmado kita kag mangin malinong ang aton hunahuna.

10. Kon ginahandaan naton ang kalamidad, ngaa pagpakita ini sang aton pagtuo? (Hulubaton 22:3)

¹⁰ Kon planuhon naton sing abanse ang dapat naton himuon kon may kalamidad, mas mangin kalmado kita. Kulang bala ang aton pagtuo kay Jehova kon maghanda kita? Indi. Kon ginahandaan naton ang kalamidad, ginapakita naton nga nagatuo kita nga atipanon niya kita. Ngaa masiling naton ini? Ginalaygayan kita sang Pulong sang Dios nga dapat naton handaan ang mga kalamidad. (Basaha ang Hulubaton 22:3.) Kag paagi sa mga artikulo sa mga magasin, sa mga miting sang kongregasyon, kag sa mga pahibalo, sulitsulit kita nga ginapalig-on sang organisasyon sang Dios nga handaan ang mga kalamidad.c Nagasalig bala kita kay Jehova? Kon huo, tumanon naton ang ginapahimo niya sa aton subong gid dayon. Indi na naton paghulaton ang kalamidad antes pa kita maghanda.

11. Ano ang matun-an mo sa halimbawa ni Margaret?

¹¹ Binagbinaga ang eksperiensia sang isa ka sister nga si Margaret. Ginsilingan sia sang mga opisyal nga magbakwit kay nasunog ang kagulangan malapit sa ila lugar. Bangod nagdulungan ang mga nagbakwit, madamo nga salakyan ang ara sa dalan kag indi sila makahalin. Napalibutan sila sang maitom nga aso, kag indi makagua si Margaret sa iya salakyan. Pero wala sia maano kay nakahanda sia. May mapa sia sa iya bag nga makatudlo sa iya sang lain nga dalan pagua sa ila lugar. Gintestingan na niya sadto nga mag-agi sa sini nga dalan para kabalo sia kon diin sia maagi kon may emerhensia. Bangod sang paghanda ni Margaret, naamligan niya ang iya kabuhi.

12. Ngaa dapat naton tumanon ang mga instruksion nga makaamlig sa aton kabuhi?

¹² Para amligan kita kag ang iban, posible nga silingan kita sang mga opisyal nga dapat naton sundon ang ginapatuman nila nga curfew, dapat kita magbakwit, ukon dapat naton sundon ang iban pa nila nga mga instruksion. Wala ini ginasunod sang iban ukon nagapabuyanbuyan sila bangod indi nila gusto bayaan ang ila mga pagkabutang. Ano ang dapat naton himuon? Amo ini ang ginasiling sa aton sang Biblia: “Tungod sa Ginuo magpasakop kamo sa tanan nga awtoridad nga ginhimo sang tawo, sa hari man subong pinakamataas nga awtoridad ukon sa mga gobernador nga ginpadala niya.” (1 Ped. 2:13, 14) Ginahatagan man kita sang organisasyon sang Dios sang mga instruksion para maamligan ang aton kaugalingon. Pirme kita ginapahanumdom nga ihatag naton sa mga gulang ang aton pinakabag-o nga contact number kag address para makontak nila kita kon may emerhensia. Nahimo mo na bala ini? Posible nga makabaton man kita sang instruksion kon bala magpabilin lang kita sa aton balay ukon dapat kita magbakwit, kon paano kita makakuha sang aton mga kinahanglanon, ukon kon paano kag san-o naton buligan ang iban. Kon indi naton ini pagtumanon, posible nga mabutang sa peligro ang aton kabuhi kag ang kabuhi sang mga gulang. Tandai nga ginabantayan kita sining matutom nga mga lalaki. (Heb. 13:17) Nagsiling si Margaret, “Kumbinsido ako nga ang pagtuman sa instruksion sang mga gulang kag sang organisasyon amo ang nagluwas sa akon.”

13. Ano ang nakabulig sa madamo nga kauturan nga naghalin sa ila lugar para mangin malipayon gihapon sila kag mangin malinong ang ila hunahuna?

¹³ Madamo nga kauturan ang naghalin sa ila lugar bangod sang kalamidad ukon inaway. Pero ginhimo nila ang ila bug-os nga masarangan nga maka-adjust sa ila bag-o nga sitwasyon kag ginhimo nila dayon ang mga hilikuton sa pag-alagad kay Jehova. Pareho sa mga Cristiano sang una nga naglinapta bangod sang paghingabot, padayon nila nga ‘ginabantala ang maayong balita sang pulong sang Dios.’ (Binu. 8:4) Nabuligan sila sang ila pagbantala nga magpokus sa Ginharian imbes nga sa ila mabudlay nga sitwasyon. Bangod sini, malipayon gihapon sila kag malinong ang ila hunahuna.

MAKABATYAG KITA SANG PAGHIDAIT BISAN PA MAY PAGHINGABOT

14. Paano madula ang aton paghidait kon may paghingabot?

¹⁴ Kon hingabuton kita, posible nga indi na naton mahimo ang madamo nga hilikuton nga nagabulig sa aton nga mangin kalmado. Nalipay gid kita kon hilway kita nga makatipon kag makabantala. Gusto man naton nga himuon ang aton regular nga mga hilikuton nga wala ginakulbaan nga basi dakpon kita. Pero kon indi na naton ini mahimo, posible nga mabalaka kita kag makulbaan. Normal lang nga mabatyagan naton ini. Pero dapat kita maghalong. Nagsiling si Jesus nga posible mag-untat sa pag-alagad ang iya mga sumulunod bangod sa paghingabot. (Juan 16:1, 2) Ano ang himuon naton para makabatyag kita sang paghidait bisan pa ginahingabot kita?

15. Ngaa indi kita dapat mahadlok sa paghingabot? (Juan 15:20; 16:33)

¹⁵ Ginasilingan kita sang Pulong sang Dios: “Ang tanan nga luyag magkabuhi nga may diosnon nga debosyon may kaangtanan kay Cristo Jesus pagahingabuton man.” (2 Tim. 3:12) Nabudlayan ang isa ka brother nga si Andrei nga patihan ini. Sang gindumilian ang aton hilikuton sa ila pungsod, daw indi sia magpati nga hingabuton gid ang tanan nga alagad ni Jehova. Nagsiling sia: ‘Kadamo gid sang Saksi diri sa amon. Paano kami tanan madakop sang mga opisyal sang gobierno?’ Pero imbes nga maglinong ang hunahuna ni Andrei, pirme sia ginakulbaan. Lain naman ang panghunahuna sang iban nga kauturan. Nagsalig sila kay Jehova kag wala nila ginhunahuna nga indi gid sila pagdakpon. Kabalo sila nga posible gid nga dakpon sila, pero wala sila nagakabalaka sing sobra pareho kay Andrei. Gani gin-ilog ni Andrei ang ila panghunahuna kag nagsalig sia sing bug-os kay Jehova. Bangod sini, nangin malinong ang iya hunahuna kag malipayon sia bisan pa may mga kabudlayan. Puede man ini matabo sa aton. Nagsiling si Jesus nga hingabuton kita, pero ginpasalig man niya nga masarangan naton nga magpabilin nga matutom.—Basaha ang Juan 15:20; 16:33.

16. Ano nga mga instruksion ang dapat naton tumanon kon may paghingabot?

¹⁶ Kon dumilian ang aton hilikuton, posible nga makabaton kita sang mga instruksion halin sa branch office kag sa mga gulang. Mga instruksion ini para maamligan kita, para masigurado nga padayon kita nga makabaton sang espirituwal nga pagkaon, kag para buligan kita nga makapadayon sa pagbantala. Panikasugi nga tumana ini nga mga instruksion bisan pa daw wala mo ini nahangpan sing maayo. (Sant. 3:17) Kag kon may nabal-an ka nga mga impormasyon parte sa aton mga kauturan ukon parte sa mga hilikuton sang kongregasyon, indi mo gid ini dapat pag-isugid sa iban nga indi dapat makabalo sini.—Man. 3:7.

17. Pareho sa mga apostoles sang unang siglo, ano ang gusto naton nga padayon nga himuon?

¹⁷ Ang isa sa panguna nga rason kon ngaa nagapakig-away si Satanas sa katawhan sang Dios amo ang ila ‘pagpanaksi tuhoy kay Jesus.’ (Bug. 12:17) Indi ka dapat mahadlok kay Satanas kag sa iya kalibutan. Kon nagabantala kita kag nagatudlo sa iban bisan pa may paghingabot, mangin malipayon kita kag mangin malinong ang aton hunahuna. Sang unang siglo, ginsugo sang mga opisyal sang mga Judiyo ang mga apostoles nga mag-untat sa pagbantala. Pero matutom sa Dios ang mga apostoles, gani sia ang ila gintuman. Padayon sila nga nagbantala, gani nalipay gid sila. (Binu. 5:27-29, 41, 42) Kon ginadumilian ang aton hilikuton, dapat kita maghalong kon nagabantala. (Mat. 10:16) Pero kon himuon naton ang aton bug-os nga masarangan, makabatyag kita sang paghidait bangod kabalo kita nga nalipay sa aton si Jehova kag nabantala naton sa iban ang mensahe nga makaluwas sang kabuhi.

“ANG DIOS SANG PAGHIDAIT MANGIN KAUPOD NINYO”

18. Sin-o ang makahatag sa aton sang matuod nga paghidait?

¹⁸ Magsalig nga makabatyag kita sang paghidait bisan sa pinakamabudlay nga mga sitwasyon. Sa sini nga mga sitwasyon, dapat naton dumdumon nga kinahanglan naton ang paghidait sang Dios, ukon ang paghidait nga si Jehova lang ang makahatag. Magsalig sa iya kon may nagalapta nga balatian, kalamidad, ukon paghingabot. Indi magpalayo sa iya organisasyon. Pamalandungi ang dalayawon nga palaabuton nga ihatag sa imo. Kon himuon mo ini, “ang Dios sang paghidait mangin kaupod [mo].” (Fil. 4:9) Sa masunod nga artikulo, binagbinagon naton kon paano naton mabuligan ang aton mga kauturan nga may mga problema para mabatyagan nila ang paghidait sang Dios.