2 | “Ining Kasulatan . . . Nagapabakod”

ANG GINASILING SANG BIBLIA: “Ang tanan nga butang nga ginsulat sadto ginsulat sa pagtudlo sa aton. Nagahatag ini sa aton sing paglaum bangod ining Kasulatan nagabulig sa aton sa pagbatas kag nagapabakod sa aton.”—ROMA 15:4.

Ang Buot Silingon

Ang Biblia may makapaumpaw nga mensahe nga makapabakod sa aton kag makabulig para makabatas kita kon nagapensar kita sang negatibo. Ang mensahe sang Biblia nagahatag sa aton sang paglaum nga sa indi madugay ang kasakit nga ginaantos naton madula na.

Kon Paano Ini Makabulig

Tanan kita ginasubuan kon kaisa, pero ang may depresyon ukon anxiety disorder mahimo nga nagaantos sang kasakit sa emosyon adlaw-adlaw. Paano makabulig ang Biblia?

Madamo sang makalilipay nga mensahe sa Biblia nga makabulig para mabatuan ang negatibo nga panghunahuna. (Filipos 4:8) Kon pirme naton pensaron ang makapaumpaw kag makapakalma nga mensahe sini, makabulig ini sa aton nga makontrol ang aton emosyon.—Salmo 94:18, 19.
Makabulig ang Biblia para mabatuan naton ang paghunahuna nga wala kita sing pulos.—Lucas 12:6, 7.
Madamo nga teksto sa Biblia ang nagapasalig sa aton nga wala kita nagaisahanon. Ang Dios, ang aton Manunuga, nakaintiende gid sang aton balatyagon.—Salmo 34:18; 1 Juan 3:19, 20.
Nagapromisa ang Biblia nga magaabot ang tion nga panason sang Dios sa aton hunahuna ang tanan naton nga masakit nga inagihan. (Isaias 65:17; Bugna 21:4) Ini nga promisa nagahatag sa aton sang kusog nga makabatas kon nagabalikbalik sa aton pensar ang indi maayo nga inagihan naton sadto.

Kon Paano Nabuligan sang Biblia si Jessica

Ang Epekto sa Akon sang Depresyon

“Sang 25 anyos ako, na-nervous breakdown ako kag na-diagnose nga may malala nga depresyon. Indi ko makontrol ang pagbalikbalik sa akon pensar sang masakit nga nagkalatabo sa akon kabuhi. Ginbuligan ako sang mga doktor nga maintiendihan nga ang rason sang akon depresyon amo ang pagpamensar pirme sang negatibo nga mga butang bangod sa akon malain nga inagihan sadto. Nagatomar ako sang bulong kag nagapa-therapy para mabuligan ako nga mabal-an kon nagasugod na ang negatibo nga panghunahuna kag kon paano ko ini mabatuan.”

Kon Paano Ako Nabuligan sang Biblia

“Sang malala gid ang akon depresyon, naeksperiensiahan ko ang panic attack, grabe nga kabalaka, kag indi ako makatulog. Masami kon gab-i indi ko mapunggan ang pagpamensar sang madamo kag malain nga mga hitabo kag indi na ako dayon mahim-os. Suno sa Salmo 94:19, ang Dios makapaumpaw kag makapakalma sa aton kon ginalumos kita sang mga kabalaka. Gani ginahulid ko ang akon Biblia kag ang akon notebook nga ginsulatan ko sang makapalig-on nga mga teksto. Kon indi gani ako makatulog, nagabasa ako sang pila ka teksto sa Biblia, para maumpawan ako sang mensahe sang Dios.

“Ginapalig-on kita sang Biblia nga batuan ang mga panghunahuna nga baliskad sa aton nahibaluan parte sa Dios. Sang una, nagapati gid ako nga wala ako sing pulos, kag wala sang nagapalangga sa akon. Pero natun-an ko nga indi amo sina ang ginatudlo sang Biblia, kay sa Biblia ang Dios isa ka mahigugmaon kag maluluy-on nga Amay nga nagaulikid sa kada isa sa aton. Imbes nga magpakontrol lang sa akon hunahuna, amat-amat ko nga natun-an nga kontrolon ini. Natun-an ko nga tan-awon ang akon kaugalingon pareho sa pagtan-aw sang Dios sa akon. Nakabulig gid ini para mabatuan ko ang manubo ko nga pagtan-aw sa akon kaugalingon.

“Excited na gid ako nga maabot ang tion nga ang tanan nga masakit nga mga eksperiensia kag negatibo nga mga panghunahuna madula na. Nahibaluan ko nga sa palaabuton wala na sang mga mental disorder. Nakabulig ini sa akon nga mabatas ang akon mga limitasyon subong kag maglaum sa matahom nga palaabuton diin wala na ako sang depresyon.”