3 | Bulig Paagi sa mga Halimbawa sa Biblia

GINASUGID SANG BIBLIA ANG PARTE SA . . . Matutom nga mga lalaki kag babayi nga “may balatyagon kaangay sa aton.”—SANTIAGO 5:17.

Ang Buot Silingon

Mabasa sa Biblia ang matuodtuod nga kasaysayan sang mga lalaki kag babayi nga nakaeksperiensia sang sarisari nga mga emosyon. Kon basahon naton ini nga mga eksperiensia, basi may makita kita nga karakter sa Biblia nga pareho gid ang ginbatyag sa aton.

Kon Paano Ini Makabulig

Gusto naton tanan nga maintiendihan sang iban ang aton ginabatyag, ilabi na gid kon may problema kita sa mental health. Kon basahon naton ang inagihan sang mga karakter sa Biblia, mahimo mabatyagan ta nga ang ila ginahunahuna kag ginabatyag sadto pareho gid sa aton. Gani marealisar naton nga indi lang kita ang nagabatyag sini nga kabudlayan. Bilang resulta, kon mag-atake ang anxiety disorder ukon kon magbalikbalik sa aton pensar ang indi maayo nga mga hitabo, bal-an ta nga indi lang kita ang nagaantos sini.

Mabasa sa Biblia ang ginhambal sang mga karakter nga daw wala na gid sang mahimo kag desperado na. Nakasiling ka na bala, ‘Indi ko na gid ini maagwanta?’ Amo gid sina ang ginbatyag ni Moises, ni Elias, kag ni David.—Numeros 11:14; 1 Hari 19:4; Salmo 55:4.
Ginasugiran kita sang Biblia sang inagihan ni Hana nga “nasubuan gid” bangod indi sia makabata kag pirme pa sia ginahikayan sang isa pa ka asawa sang iya bana.—1 Samuel 1:6, 10.
Mabasa man naton sa Biblia ang parte kay Job nga ang inagihan mahimo pareho sa aton. Bisan pa mabakod gid ang iya pagtuo, grabe nga kasakit ang iya gin-antos amo nga nakasiling sia: “Ginakaugtan ko ang akon kabuhi; indi ko na luyag nga mabuhi pa.”—Job 7:16.

Kon nabal-an naton kon ano ang ginhimo sini nga mga karakter sa Biblia para mabatuan ang ila negatibo nga panghunahuna, makahatag man ini sa aton sing kusog para mabatuan ang aton mga problema.

Kon Paano Nabuligan sang Biblia si Kevin

Ang Epekto sa Akon sang Bipolar Disorder

“Na-diagnose ako nga may bipolar disorder sang dali na lang ako magsingkwenta anyos. Kon kaisa daw mahimo ko ang bisan ano kag daw masarangan ko ang tanan nga problema. Pero may mga tion man nga indi ko na gusto nga mabuhi.”

Kon Paano Ako Nabuligan sang Biblia

“Ang isa ka karakter sa Biblia nga daw pareho gid sa akon amo si apostol Pedro. Nakahimo sia sang mga sala amo nga nagbatyag sia nga daw wala sia sing pulos. Pero imbes nga pasundan lang ang iya ginabatyag, padayon sia nga nagpakig-upod sa iya mga abyan nga nagaulikid gid sa iya. Sa mga adlaw nga nagaatake ang akon bipolar disorder, nagabatyag ako nga wala sing pulos kay indi ko mahimo ang gusto ko himuon. Pareho kay Pedro gintinguhaan ko gid nga makig-upod pirme sa akon mga abyan nga gusto gid magbulig sa akon nga indi madaug sini nga balatyagon.

“Ang isa pa ka karakter sa Biblia nga nakapaumpaw gid sa akon amo si Hari David. Pirme gid sia gin-depress bangod sang iya sitwasyon kag ginhinulsulan gid niya ang iya mga sala nga nahimo. Pareho gid ako sa iya kay kon kaisa may mahimo ako ukon mahambal nga ginahinulsulan ko. Napalig-on gid ako sa ginsiling ni David sa Salmo 51. Sa bersikulo 3, si David nagsiling: ‘Nakahibalo gid ako sang akon mga paglapas, kag ang akon sala yara pirme sa akon atubang.’ Amo gid sina ang akon nabatyagan kon malala gid ang akon depresyon, kay daw wala na ako sing mapensaran nga maayo sa akon kaugalingon. Pero gusto ko man ang ginsiling ni David sa bersikulo 10: ‘O Dios ko, putlia ang akon tagipusuon, kag hatagi ako sing bag-o kag malig-on nga espiritu.’ Amo man sina ang ginasiling ko kon makitluoy ako sa Dios nga buligan ako nga mabag-o ang pagtan-aw ko sa akon kaugalingon. Dayon ang bersikulo 17 nagapaumpaw gid sa akon. Nagasiling ini: ‘Ang nagakalisod kag mahinulsulon nga tagipusuon, O Dios ko, indi mo pagsikwayon.’ Nagapasalig gid ini sa akon nga palangga ako sang Dios.

“Napabakod ko ang akon paglaum sa palaabuton, bangod nagapokus ako sa mga halimbawa sa Biblia kag sa mga ginahatag sa akon sang Dios subong. Matuod gid para sa akon ang mga promisa sa Biblia kag nakabulig ina sa akon nga makapadayon.”