Paano Naton Mapabakod ang Aton Pagtuo sa Promisa ni Jehova nga Bag-ong Kalibutan?

1-2. Samtang ginahulat naton ang bag-ong kalibutan, ano ang dapat naton himuon?

NAGPROMISA si Jehova nga buslan niya sang matarong nga bag-ong kalibutan ining malain nga kalibutan. Ginapasalamatan gid naton sia sa sini nga promisa. (2 Ped. 3:13) Bisan pa wala kita kabalo kon san-o gid matuman ini nga promisa, ginapakita sang mga hitabo sa kalibutan nga malapit na lang ini matabo.—Mat. 24:32-34, 36; Binu. 1:7.

² Samtang ginahulat naton ang bag-ong kalibutan, dapat naton tanan pabakuron ang aton pagtuo sa sini nga promisa, bag-uhan man kita ukon madugay na nga nagaalagad. Ngaa? Kay bisan pa mabakod ang aton pagtuo, posible ini magluya. Gintawag ni apostol Pablo ang kakulang sang pagtuo nga “sala nga madali magsalawid sa aton.” (Heb. 12:1) Para indi magluya ang aton pagtuo, dapat naton pirme pamalandungan ang mga ebidensia nga malapit na ang bag-ong kalibutan.—Heb. 11:1.

3. Ano ang binagbinagon naton sa sini nga artikulo?

³ Sa sini nga artikulo, binagbinagon naton ang tatlo ka paagi para mapabakod naton ang aton pagtuo sa promisa ni Jehova nga bag-ong kalibutan: (1) pamalandungan naton ang parte sa gawad, (2) pamalandungan naton ang parte sa gahom ni Jehova, kag (3) himuon naton ang mga hilikuton nga magapasuod sa aton kay Jehova. Dayon binagbinagon naton ang mensahe ni Jehova kay Habacuc nga makapabakod man sang aton pagtuo. Pero may mga sitwasyon nga kinahanglan nga mabakod ang aton pagtuo sa promisa nga bag-ong kalibutan. Una naton nga binagbinagon ang pila sa sini.

MGA SITWASYON NGA KINAHANGLAN NGA MABAKOD ANG ATON PAGTUO

4. Ano ang mga dapat naton desisyunan nga kinahanglan sang mabakod nga pagtuo?

⁴ Kada adlaw, may mga dapat kita desisyunan nga kinahanglan sang mabakod nga pagtuo. Nalakip sa sini ang pagpili sang mga abyan kag mga kalingawan, kon ano nga klase sang edukasyon ang tinguhaan naton, kon sin-o ang aton pangasaw-on ukon pamanahon, kon bala mabata kita ukon indi, kag kon ano nga trabaho ang pilion naton. Pamangkuton naton ang aton kaugalingon: ‘Makita bala sa akon mga desisyon nga nagapati ako nga malapit na lang buslan sang Dios ining malain nga kalibutan sang matarong nga bag-ong kalibutan? Ukon ang akon bala mga desisyon naimpluwensiahan sang mga tawo nga nagapati nga ang kamatayon amo ang katapusan sang tanan?’ (Mat. 6:19, 20; Luc. 12:16-21) Para makahimo kita sang pinakamaayo nga desisyon, kinahanglan nga mabakod ang aton pagtuo nga malapit na lang ang bag-ong kalibutan.

5-6. Ngaa kinahanglan nga mabakod ang aton pagtuo kon may mga problema kita? Maghatag sing halimbawa.

⁵ Kinahanglan man nga mabakod ang aton pagtuo kon may mga problema kita. Halimbawa, posible hingabuton kita, magbalatian kita sing grabe, ukon makaeksperiensia kita sang iban pa nga problema nga mahimo magpaluya sang aton buot. Sa primero, posible nga pamatyag naton masarangan naton ini. Pero bangod ini nga mga problema wala nagakadula dayon, kinahanglan naton sang mabakod nga pagtuo para makabatas kita kag makapadayon sa pag-alagad kay Jehova sing malipayon.—Roma 12:12; 1 Ped. 1:6, 7.

⁶ Kon may problema kita, posible magbatyag kita nga kadugay matuman sang promisa ni Jehova nga bag-ong kalibutan. Buot bala silingon sini nga maluya ang aton pagtuo? Indi. Binagbinaga ini nga ilustrasyon. Kon pila na ka semana nga nagainulan, posible magbatyag kita nga daw indi na gid mag-init. Pero sigurado kita nga magauntat gid ang ulan kag magainit liwat. Sing kaanggid, kon naluyahan kita sang buot, posible magbatyag kita nga kadugay sang bag-ong kalibutan. Pero kon mabakod ang aton pagtuo, sigurado kita nga matuman gid ang mga promisa sang Dios. (Sal. 94:3, 14, 15; Heb. 6:17-19) Kon nagasalig kita sa sini, makabulig ini sa aton nga unahon pirme sa aton kabuhi ang pagsimba kay Jehova.

7. Sa ano kita dapat maghalong?

⁷ Kinahanglan man nga mabakod ang aton pagtuo para matuman naton ang sugo nga magbantala. Para sa madamo nga tawo nga ginabantalaan naton, daw indi mapatihan ang “maayong balita” parte sa bag-ong kalibutan nga ginpromisa sang Dios. (Mat. 24:14; Ezeq. 33:32) Dapat gid kita maghalong kay basi maimpluwensiahan kita sang sini nga mga tawo kag duhaduhaan man naton ang mga panudlo ni Jehova. Para indi ini matabo, dapat naton padayon nga pabakuron ang aton pagtuo. Binagbinagon naton ang tatlo ka paagi para mahimo naton ini.

PAMALANDUNGI ANG PARTE SA GAWAD

8-9. Paano ang pagpamalandong parte sa gawad makapabakod sang aton pagtuo?

⁸ Ang isa ka paagi para mapabakod naton ang aton pagtuo amo ang pagpamalandong parte sa gawad. Paagi sa gawad, makasalig kita nga matuman gid ang mga promisa sang Dios. Kon pamalandungan naton kon ngaa gin-aman ni Jehova ang gawad kag kon ano ang ginsakripisyo niya, magabakod pa gid ang aton pagtuo nga tumanon sang Dios ang iya promisa nga hatagan kita sang kabuhi nga wala sing katapusan sa mas maayo nga kalibutan. Ngaa masiling naton ini?

⁹ Ano bala ang ginsakripisyo ni Jehova para maaman ang gawad? Halin sa langit, ginpadala niya ang iya pinalangga nga bugtong nga Anak nga pinakasuod niya nga kaupod para magkabuhi bilang perpekto nga tawo sa duta. Sang ari si Jesus sa duta, naeksperiensiahan niya ang tanan nga klase sang kabudlayan. Kag grabe gid ang iya pag-antos sang napatay sia. Daku gid ang ginsakripisyo sang aton mahigugmaon nga Dios nga si Jehova para hatagan kita sang maayo nga kabuhi. Sigurado nga indi gid niya pagtugutan nga mag-antos kag mapatay ang iya Anak kon malip-ot man lang nga kabuhi ang gusto niya ihatag sa aton. (Juan 3:16; 1 Ped. 1:18, 19) Bangod daku gid ang ginsakripisyo ni Jehova, siguraduhon niya nga makaistar kita sa bag-ong kalibutan sing wala sing katapusan.

PAMALANDUNGI ANG PARTE SA GAHOM NI JEHOVA

10. Suno sa Efeso 3:20, ano ang mahimo ni Jehova?

¹⁰ Ang ikaduha nga paagi para mapabakod naton ang aton pagtuo amo ang pagpamalandong parte sa gahom ni Jehova. May gahom sia nga tumanon ang tanan nga ginpromisa niya. Madamo nga tawo ang nagahunahuna nga imposible nga mabuhi kita sing wala sing katapusan sa isa ka bag-ong kalibutan. Pero madamo na sing ginpromisa si Jehova nga may himuon sia nga butang nga indi gid mahimo sang mga tawo. Mahimo niya ini bangod sia ang Labing Gamhanan nga Dios. (Job 42:2; Mar. 10:27) Gani wala kita natingala kon nagapromisa sia sang tumalagsahon nga mga butang.—Basaha ang Efeso 3:20.

11. Maghatag sing halimbawa sang tumalagsahon nga promisa sang Dios. (Tan-awa ang kahon nga “Ang Pila sa mga Tumalagsahon nga Promisa sang Dios nga Natuman Na.”)

¹¹ Binagbinaga ang pila sa mga ginpromisa ni Jehova sa iya katawhan sang una nga daw imposible matabo. Ginsilingan niya ang tigulang na nga sanday Abraham kag Sara nga makabata sila. (Gen. 17:15-17) Ginsilingan man niya si Abraham nga magaistar ang iya mga kaliwat sa duta sang Canaan. Pero nangin ulipon sa Egipto ang mga kaliwat ni Abraham, nga mga Israelinhon, sa sulod sang madamo nga tinuig. Gani daw imposible matabo ini nga promisa. Pero natuman gid ini. Sang ulihi, nagsiling si Jehova nga makabata si Elisabet bisan pa tigulang na sia. Ginsilingan man niya ang isa ka birhen nga si Maria nga magabun-ag sia sang isa ka anak nga lalaki, nga amo ang Anak sang Dios. Paagi sa sini, matuman ang ginpromisa ni Jehova sa hardin sang Eden linibo ka tuig na ang nagligad.—Gen. 3:15.

12. Ano ang ginapasalig sa aton sang Josue 23:14 kag Isaias 55:10, 11 parte sa gahom ni Jehova?

¹² Kon pamalandungan naton ang mga promisa ni Jehova kag kon paano niya ini gintuman, mahangpan naton kon daw ano sia ka gamhanan. Gani magabakod pa gid ang aton pagtuo sa iya ginpromisa nga bag-ong kalibutan. (Basaha ang Josue 23:14; Isaias 55:10, 11.) Makabulig ini sa aton nga mapaathag sing maayo sa iban nga indi isa ka damgo ang ginpromisa sang Dios nga bag-ong kalibutan. Parte sa bag-o nga langit kag bag-o nga duta, nagsiling si Jehova: “Ini nga mga pulong matutom kag matuod.”—Bug. 21:1, 5.

HIMUA ANG MGA HILIKUTON NGA MAGAPASUOD SA IMO KAY JEHOVA

13. Paano mapabakod sang mga miting sang kongregasyon ang aton pagtuo? Ipaathag.

¹³ Ang ikatlo nga paagi para mapabakod naton ang aton pagtuo amo ang paghimo sang mga hilikuton nga magapasuod sa aton kay Jehova. Halimbawa, binagbinaga ang mga benepisyo kon naga-attend kita sa aton mga miting sang kongregasyon. Si Anna, nga pila na ka dekada nga nagaalagad sing bug-os tion kag madamo na sang nangin pribilehiyo, nagsiling: “Nagabakod gid ang akon pagtuo kon naga-attend ako sa mga miting. Bisan pa daw indi maayo magpamulongpulong ang speaker ukon bisan pa wala man sia sing may ginsiling nga bag-o, may ara gid ako sang mabatian nga nagabulig sa akon nga mas mahangpan sing maayo ang Biblia. Bangod sini, nagabakod pa gid ang akon pagtuo.”b Makapabakod man sang aton pagtuo ang mga komento sang mga naga-attend sa miting.—Roma 1:11, 12; 10:17.

14. Paano mapabakod sang pagbantala ang aton pagtuo?

¹⁴ Makapabakod man sang aton pagtuo ang pagbantala. (Heb. 10:23) Si Barbara, nga sobra na 70 ka tuig nga nagaalagad kay Jehova, nagsiling: “Kon nagabantala ako, nagabakod ang akon pagtuo. Amo ini pirme ang akon mabatyagan. Kon pirme ko ginasugid sa iban ang parte sa dalayawon nga mga promisa ni Jehova, mas nagabakod pa gid ang akon pagtuo.”

15. Paano mapabakod sang personal nga pagtuon ang aton pagtuo? (Tan-awa man ang mga piktyur.)

¹⁵ Ang isa pa ka hilikuton nga makapabakod sang aton pagtuo amo ang personal nga pagtuon. Binagbinaga ang isa ka sister nga si Susan. Nagsiling sia nga nakabulig sa iya ang pag-iskedyul kon san-o sia matuon. Nagsiling sia: “Kon Domingo, ginatun-an ko ang artikulo nga pagatun-an sa masunod nga Pagtinuon sa Ang Lalantawan. Kon Lunes kag Martes, ginatun-an ko ang mga binagbinagon sa midweek miting. Ginagamit ko naman ang iban nga mga adlaw para sa personal nga pagtuon.” Bangod ginasunod gid ni Susan ang iya iskedyul sa pagtuon, padayon niya nga napabakod ang iya pagtuo. Si Irene, nga pila ka dekada nga nag-alagad sa world headquarters, nagsiling nga nagabakod ang iya pagtuo kon ginatun-an niya ang mga tagna sa Biblia. Nagsiling sia: “Natuman gid ang tanan nga detalye sa mga tagna ni Jehova, kag nagadayaw gid ako sa sini.”c

“MAHANABO GID INI”

16. Ngaa makasiling kita nga para man sa aton ang ginpasalig ni Jehova kay Habacuc? (Hebreo 10:36, 37)

¹⁶ Madugay na nga ginahulat sang pila ka alagad ni Jehova ang kalaglagan sining malain nga kalibutan. Para sa iban, daw kadugay matuman sang promisa sang Dios. Kabalo si Jehova sang ginabatyag sang iya mga alagad, gani ginpasalig niya si manalagna Habacuc: “Ang palanan-awon mahanabo pa sa gintalana nga tion sini, kag nagadalidali ini padulong sa katapusan sini, kag indi ini magbutig. Bisan pa maatrasar ini, padayon nga paabuta ini! Kay mahanabo gid ini. Indi ini maulihi!” (Hab. 2:3) Para lang bala kay Habacuc ini nga pasalig sang Dios? Ukon para man sa aton subong? Gintuytuyan ni Jehova si apostol Pablo nga gamiton ini nga pasalig para palig-unon ang mga Cristiano nga gusto na gid nga makita ang bag-ong kalibutan. (Basaha ang Hebreo 10:36, 37.) Gani bisan pa nagabatyag kita nga daw kadugay matuman sang promisa ni Jehova nga luwason niya kita, makasalig kita nga “mahanabo gid ini. Indi ini maulihi!”

17. Paano gin-aplikar sang isa ka sister ang laygay ni Jehova kay Habacuc?

¹⁷ Ginaaplikar sang madamo nga alagad ni Jehova ang laygay nga ‘padayon nga magpaabot.’ Ginahimo ini sang pila sa ila sa sulod sang madamo na nga dekada. Binagbinaga ang halimbawa sang isa ka sister nga si Louise. Nag-umpisa sia sa pag-alagad kay Jehova sang 1939. Nagsiling sia: “Sadto nga tion, abi ko indi na ako makatapos sa high school kag maabot ang Armageddon. Pero wala ini natabo. Sa sulod sang madamo nga tinuig, ginbasa ko ang mga kasaysayan sa Biblia parte sa mga tawo nga naghulat kay Jehova kon san-o niya tumanon ang iya mga promisa. Nakabulig ini sa akon nga maghulat man kay Jehova. Ginbasa ko ang kasaysayan nanday Noe, Abraham, Jose, kag sang iban pa. Padayon ko nga ginapaabot ang tion nga tumanon na ni Jehova ang iya mga promisa. Nakabulig ini sa akon kag sa iban pa nga nagahimo man sini nga magtuo nga malapit na lang gid ang bag-ong kalibutan.” Madamo nga madugay na nga alagad ni Jehova ang amo man sini ang ginabatyag.

18. Paano mapabakod ang aton pagtuo sa promisa sang Dios nga bag-ong kalibutan kon obserbahan naton ang iya mga tinuga?

¹⁸ Wala pa ang bag-ong kalibutan subong. Pero hunahunaa ang pila ka butang nga ara subong, pareho sang mga bituon, mga kahoy, mga sapat, kag mga tawo. May tion sadto nga wala ini nga mga butang, pero wala gid sing may makapanghiwala subong nga matuod gid ini tanan. Ara ini nga mga butang subong bangod gintuga ini ni Jehova. (Gen. 1:1, 26, 27) Nagpromisa man si Jehova nga magahimo sia sang bag-ong kalibutan, kag tumanon gid niya ini. Sa bag-ong kalibutan, magakabuhi sing wala sing katapusan ang mga tawo nga may perpekto nga panglawas. Mangin matuod gid ang bag-ong kalibutan pareho sa mga butang nga gintuga sang Dios. Makasalig kita nga matuman gid ini sa iya gintalana nga tion.—Isa. 65:17; Bug. 21:3, 4.

19. Paano mo mapabakod ang imo pagtuo?

¹⁹ Pero samtang wala pa ini nga tion, himua ang imo bug-os nga masarangan para pabakuron ang imo pagtuo. Ipakita pirme sa imo pagkabuhi nga ginapabaloran mo ang gawad. Pamalandungi ang parte sa gahom ni Jehova. Himua ang mga hilikuton nga magapasuod sa imo kay Jehova. Kon himuon mo ini, malakip ka sa ‘mga nagpanubli sang mga saad paagi sa pagtuo kag paghulat sing mapinasensiahon.’—Heb. 6:11, 12; Roma 5:5.