Kon Paano Magtuon

Ano ang Unahon Mo nga Tun-an?

Gusto naton tanan magtuon, pero diutay lang ang aton tion. Paano naton magamit sing maayo ini nga tion? Una, indi magdali sa imo pagtuon. Mas makabenepisyo ka kon tun-an mo sing maayo ang pila lang ka topiko sangsa dalidalion mo basa ang madamo nga topiko.

Dayon, hibalua kon ano ang unahon mo nga tun-an. (Efe. 5:15, 16) Ari ang pila ka panugda:

• Basaha ang Biblia adlaw-adlaw. (Sal. 1:2) Puede mo ini umpisahan paagi sa pagbasa sang mga kapitulo sa Biblia nga gin-iskedyul nga binagbinagon sa midweek miting kada semana.

• Handai ang Pagtinuon sa Ang Lalantawan kag ang midweek miting. Maghanda man sang imo komento.—Sal. 22:22.

• Basaha man kag tan-awa ang iban pa nga mga impormasyon nga nabase sa Biblia. Ang halimbawa sa sini amo ang aton pangpubliko nga mga magasin, ang aton mga video, kag ang mga impormasyon nga makita sa aton website.

• Mag-research. Puede mo i-research ang parte sa imo problema, ang pamangkot nga ginapaligban mo, ukon ang topiko sa Biblia nga gusto mo mas mahangpan sing maayo. Para mahatagan ka sang ideya kon ano ang puede mo i-research, tan-awa ang seksion nga “Para sa Pagtuon sang Biblia” sa jw.org/hil.