Paano Naton Padayon nga Mapabakod ang Aton Gugma sa Isa kag Isa?

1-2. (a) Ngaa nagsiling si apostol Pablo nga gugma “ang pinakaimportante” nga kinaiya? (b) Ano nga mga pamangkot ang binagbinagon naton?

SANG ginbinagbinag ni apostol Pablo ang parte sa pagtuo, paglaum, kag gugma, nagsiling sia nga “ang pinakaimportante sa sining tatlo amo ang gugma.” (1 Cor. 13:13) Ngaa nasiling ini ni Pablo? Sa palaabuton, indi na naton kinahanglan magtuo ukon maglaum nga matuman ang mga promisa sang Dios parte sa bag-ong kalibutan bangod matuman na ini tanan. Pero kinahanglan naton pirme higugmaon si Jehova kag ang iya katawhan. Ang matuod, padayon nga magabakod ang aton gugma sa ila asta sa wala sing katapusan.

² Bangod kinahanglan naton pirme magpakita sang gugma, binagbinagon naton ang tatlo ka pamangkot. Una, ngaa dapat naton higugmaon ang isa kag isa? Ikaduha, paano naton mapakita nga ginahigugma naton ang isa kag isa? Ikatlo, paano naton padayon nga mapabakod ang aton gugma sa isa kag isa?

NGAA DAPAT NATON HIGUGMAON ANG ISA KAG ISA?

3. Ngaa dapat naton higugmaon ang isa kag isa?

³ Ngaa importante nga higugmaon naton ang isa kag isa? Ang isa ka rason amo nga nagapamatuod ini nga matuod kita nga mga Cristiano. Ginsilingan ni Jesus ang iya mga apostoles: “Paagi sini mahibaluan sang tanan nga mga disipulo ko kamo, kon nagahigugmaanay kamo.” (Juan 13:35) Nagabulig man ang aton gugma sa isa kag isa para indi maguba ang aton paghiusa. Nagsiling si Pablo nga ang gugma amo ang “himpit nga higot sang paghiusa.” (Col. 3:14) Pero, may isa pa ka importante nga rason kon ngaa dapat naton higugmaon ang isa kag isa. Ginsulatan ni apostol Juan ang iya mga kauturan: “Ang bisan sin-o nga nagahigugma sa Dios dapat man maghigugma sa iya utod.” (1 Juan 4:21) Gani kon ginahigugma naton ang isa kag isa, ginapakita naton nga ginahigugma naton ang Dios.

4-5. Maghatag sing ilustrasyon nga nagapakita sang koneksion sang aton gugma sa Dios kag sang aton gugma sa aton mga kauturan.

⁴ Ngaa masiling naton nga may koneksion ang aton gugma sa Dios kag ang aton gugma sa aton mga kauturan? Binagbinaga ini nga ilustrasyon. May koneksion ang aton tagipusuon sa iban pa nga bahin sang aton lawas. Halimbawa, gina-check sang doktor ang aton pulso para mabal-an niya kon bala madasig ukon mahinay ang pagpitik sini. Paagi sa sini, mahatagan sia sang ideya parte sa kondisyon sang aton tagipusuon. Ano ang matun-an naton sa sini nga ilustrasyon?

⁵ Mabal-an sang doktor ang kondisyon sang aton tagipusuon paagi sa pag-check sang aton pulso. Sing kaanggid, mabal-an naton kon daw ano kabakod ang aton gugma sa Dios paagi sa pag-usisa kon daw ano kabakod ang aton gugma sa iban. Gani kon daw nagaluya ang aton gugma sa aton mga kauturan, ginapakita sini nga posible nagaluya man ang aton gugma sa Dios. Pero kon pirme naton ginapakitaan sang gugma ang aton mga kauturan, ginapakita sini nga mabakod man ang aton gugma sa Dios.

6. Ngaa dapat kita mabalaka kon nagaluya ang aton gugma sa aton mga kauturan? (1 Juan 4:​7-9, 11)

⁶ Dapat kita mabalaka kon nagaluya ang aton gugma sa aton mga kauturan. Ngaa? Bangod ginapakita sini nga may posibilidad nga maguba ang aton kaangtanan kay Jehova. Maathag ini sa ginpahanumdom sa aton ni apostol Juan. Nagsiling sia: “Ang isa nga wala nagahigugma sa iya utod, nga makita niya, indi makahigugma sa Dios, nga wala niya makita.” (1 Juan 4:20) Ano ang matun-an naton sa sini? Malipay lang sa aton si Jehova kon ‘nagahigugmaanay kita.’—Basaha ang 1 Juan 4:​7-9, 11.

PAANO NATON MAPAKITA NGA GINAHIGUGMA NATON ANG ISA KAG ISA?

7-8. Ano ang pila ka paagi para mapakita naton nga ginahigugma naton ang isa kag isa?

⁷ Madamo nga beses nga mabasa naton sa Pulong sang Dios ang sugo nga dapat kita “maghigugmaanay.” (Juan 15:​12, 17; Roma 13:8; 1 Tes. 4:9; 1 Ped. 1:22; 1 Juan 4:11) Pero ang gugma isa ka balatyagon nga ara sa aton tagipusuon, kag indi ini makita sang tawo. Gani, paano naton mapakita nga ginahigugma naton ang isa kag isa? Paagi sa aton mga ginasiling kag ginahimo.

⁸ Madamo sing paagi para mapakita naton sa aton mga kauturan nga ginahigugma naton sila. Ari ang pila ka paagi: “Maghambal kamo sing matuod sa isa kag isa.” (Zac. 8:16) “Magpakighidait [kamo] sa isa kag isa.” (Mar. 9:50) Manguna kamo “sa pagpadungog sa isa kag isa.” (Roma 12:10) “Abiabiha ninyo ang isa kag isa.” (Roma 15:7) “Padayon [kamo nga] magpinatawaray.” (Col. 3:13) “Padayon kamo nga magbuligay sa pagdala sang inyo mga kabug-atan.” (Gal. 6:2) “Padayon ninyo nga lugpayan ang isa kag isa.” (1 Tes. 4:18) “Padayon [ninyo nga] pabaskuga ang isa kag isa.” (1 Tes. 5:11) “Ipangamuyo ninyo ang isa kag isa.”​—Sant. 5:16.

9. Ngaa isa ka importante nga paagi ang paglugpay sa iban para mapakita naton ang aton gugma sa ila? (Tan-awa man ang piktyur.)

⁹ Binagbinagon naton ang isa ka paagi nga ginsambit ni Pablo sa nagligad nga parapo. Nagsiling sia: “Padayon ninyo nga lugpayan ang isa kag isa.” Ngaa isa ka importante nga paagi ang paglugpay sa iban para mapakita naton ang aton gugma sa ila? Suno sa isa ka reperensia sa Biblia, ang tinaga nga gingamit ni Pablo para sa “lugpay” nagakahulugan sing “pagtindog sa kiliran sang isa ka tawo nga may daku nga problema para palig-unon sia.” Gani, kon ginalugpayan naton ang aton utod nga may ginabatas nga problema, ginabuligan naton sia nga padayon nga mag-alagad sing matutom kay Jehova, kag ginapakita naton nga ginahigugma naton sia.​—2 Cor. 7:​6, 7, 13.

10. Ano ang koneksion sang pagbatyag sing kaluoy kag sang paghatag sing lugpay?

¹⁰ May koneksion ang pagbatyag sing kaluoy kag ang paghatag sing lugpay. Ngaa masiling naton ini? Kon naluoy kita sa isa ka tawo nga may ginabatas nga problema, gusto naton sia lugpayan kag buligan. Gani kon nagabatyag kita sing kaluoy, nagahatag kita dayon sing lugpay. Ginpaathag ni Pablo nga ginalugpayan ni Jehova ang mga tawo bangod naluoy Sia sa ila. Ginlaragway ni Pablo si Jehova bilang “Amay nga may mapinalanggaon nga kaluoy kag ang Dios nga nagahatag sang tanan nga sahi sang lugpay.” (2 Cor. 1:3) Gani si Jehova amo ang tuburan ukon ginahalinan sang “mapinalanggaon nga kaluoy.” Kag bangod sa sini nga kaluoy, ginalugpayan niya kita “sa tanan naton nga mga pagtilaw.” (2 Cor. 1:4) Binagbinaga ini nga ilustrasyon. Ang matinlo nga tubig nga nagagua sa tuburan makahatag gid sing paumpaw sa mga nauhaw. Sing kaanggid, makahatag gid si Jehova sing lugpay sa mga nasubuan. Paano naton mailog si Jehova? Ari ang isa ka paagi: Panikasugan naton nga ipakita ang mga kinaiya nga makabulig sa aton nga makabatyag sing kaluoy kag makahatag sing lugpay. Ano ang pila sa sini nga mga kinaiya?

11. Suno sa Colosas 3:12 kag 1 Pedro 3:​8, ano ang iban pa nga mga kinaiya nga makabulig sa aton nga higugmaon kag lugpayan ang iban?

¹¹ Ano ang makabulig sa aton para mapakita naton kada adlaw nga padayon kita nga nagahigugmaanay kag ‘padayon naton nga ginalugpayan ang isa kag isa’? Dapat naton panikasugan nga ipakita ang simpatiya, utudnon nga pagpalangga, kag kaayo. (Basaha ang Colosas 3:12; 1 Pedro 3:8.) Paano makabulig sa aton ini nga mga kinaiya? Kon mangin bahin na sang aton personalidad ang pagbatyag sing kaluoy kag ang iban pa nga mga kinaiya pareho sini, magabaskog ang aton handum nga lugpayan ang mga nabudlayan. Suno kay Jesus, “sa kabuganaan sang tagipusuon nagahambal ang baba. Ang maayo nga tawo nagapagua sang maayo nga mga butang halin sa iya maayo nga bahandi.” (Mat. 12:​34, 35) Gani isa gid ka importante nga paagi ang paglugpay sa aton mga kauturan para mapakita naton ang aton gugma sa ila.

PAANO NATON PADAYON NGA MAPABAKOD ANG ATON GUGMA SA ISA KAG ISA?

12. (a) Ngaa dapat kita maghalong? (b) Ano nga pamangkot ang binagbinagon naton?

¹² Gusto naton tanan nga “padayon kita nga maghigugmaanay.” (1 Juan 4:7) Pero, importante nga dumdumon naton nga ginpaandaman kita ni Jesus nga “ang gugma sang madamo nga tawo magabugnaw.” (Mat. 24:12) Indi buot silingon ni Jesus nga magauntat sa pagpakita sang gugma ang kalabanan sa iya mga disipulo. Pero, dapat kita maghalong para indi kita maimpluwensiahan sang mga tawo sa kalibutan nga wala nagapakita sang gugma. Gani, binagbinagon naton ining importante nga pamangkot: May paagi bala para mabal-an naton kon daw ano kabakod ang aton gugma sa aton mga kauturan?

13. Ano nga sitwasyon ang posible magtilaw sa aton gugma?

¹³ Ang isa ka paagi para mabal-an naton kon daw ano kabakod ang aton gugma amo ang pag-usisa sa aton reaksion sa pila ka sitwasyon sa aton kabuhi. (2 Cor. 8:8) Ginsambit ni apostol Pedro ang isa ka sitwasyon. Nagsiling sia: “Labaw sa tanan, maghigugmaanay kamo sing tudok, bangod ang gugma nagatabon sang madamo nga sala.” (1 Ped. 4:8) Gani matilawan ang aton gugma sa aton mga kauturan kon may ginhimo sila ukon ginsiling nga nagpalain sang aton buot.

14. Suno sa 1 Pedro 4:​8, ano nga klase sang gugma ang dapat naton ipakita? Maghatag sing ilustrasyon.

¹⁴ Binagbinagon naton sing maayo ang ginsiling ni Pedro. Ang una nga bahin sang bersikulo 8 nagasiling nga dapat “tudok” ang aton gugma sa isa kag isa. Ang tinaga nga gingamit ni Pedro para sa “tudok” literal nga nagakahulugan sing “gin-inat.” Ginalaragway sang ikaduha nga bahin sang teksto kon ano ang mahimo sang aton tudok nga gugma. Matabunan sini ang mga sala sang aton mga kauturan. Imadyina ang isa ka lamesa nga madamo sing mantsa. Para indi lang isa ukon duha ka mantsa ang imo matabunan, dapat mo inaton ang tela nga ginatabon mo sa sini. Sing kaanggid, para indi lang isa ukon duha ka sala sang aton mga kauturan ang aton matabunan ukon mapatawad, dapat tudok ang aton gugma sa ila ukon dapat naton ini inaton. Paagi sa sini, mapatawad naton ang ila “madamo nga sala.”

15. Kon mabakod gid ang aton gugma sa aton mga kauturan, ano ang masarangan naton nga himuon? (Colosas 3:13)

¹⁵ Dapat mabakod gid ang aton gugma sa aton mga kauturan para mapatawad naton sila sa ila mga sala bisan pa mabudlay ini himuon kon kaisa. (Basaha ang Colosas 3:13.) Kon ginapatawad naton ang iban, ginapakita naton nga mabakod ang aton gugma sa ila kag gusto naton nga malipay sa aton si Jehova. Ano pa ang makabulig sa aton para mapalampas naton ang daw makaulugot nga mga kinaiya sang iban kag mapatawad sila?

16-17. Ano pa ang makabulig sa aton para mapalampas naton ang gamay nga mga sala sang iban? Maghatag sing ilustrasyon. (Tan-awa man ang piktyur.)

¹⁶ Magpokus sa maayo nga mga kinaiya sang imo mga kauturan, kag indi magpokus sa ila indi maayo nga mga kinaiya. Binagbinaga ini nga ilustrasyon. Ibutang ta nga nagtipontipon kamo upod sa pila ka kauturan. Masadya gid ang inyo pagtipontipon, kag nagpapiktyur kamo. Pagkatapos sang inyo una nga piktyur, duha ka beses ka pa gid nga nagkuha sing piktyur engkaso indi manami ang inyo kuha sa una nga piktyur. Gani, tatlo tanan ang inyo piktyur. Ano ang himuon mo kon nakita mo sa isa ka piktyur nga nagakusmod ang isa ka brother? I-delete mo ini bangod may duha ka pa ka piktyur nga nagakadlaw kamo tanan lakip na ang brother.

¹⁷ Daw pareho sa mga piktyur nga wala naton gina-delete ang mga eksperiensia nga gusto naton dumdumon. Madamo gid kita sang manami nga mga eksperiensia kaupod ang aton mga kauturan. Pero ano abi kon naglain ang aton buot bangod may indi maayo nga ginsiling ukon ginhimo ang isa ka utod? Ano ang himuon naton sa sini nga eksperiensia? Dapat naton panikasugan nga kalimtan ini pareho sa pag-delete naton sa indi manami nga piktyur. (Hulu. 19:11; Efe. 4:32) Kon indi manami ang aton eksperiensia bangod sa gamay nga sala sang isa ka utod, puede naton ini kalimtan kay madamo pa man kita sang manami nga mga eksperiensia kaupod sia. Ining manami nga mga eksperiensia amo ang gusto naton dumdumon kag pabaloran.

KON NGAA KINAHANGLAN GID NATON ANG GUGMA SUBONG

18. Ano nga mga punto parte sa gugma ang ginbinagbinag naton sa sini nga artikulo?

¹⁸ Ngaa dapat naton pabakuron ang aton gugma sa isa kag isa? Ginbinagbinag naton nga kon ginapakitaan naton sang gugma ang aton mga kauturan, ginapakita naton ang aton gugma kay Jehova. Paano naton mapakita ang aton gugma sa aton mga kauturan? Ang isa ka paagi amo ang paglugpay sa ila. Kag ‘padayon naton nga malugpayan ang isa kag isa’ kon may kaluoy kita sa isa kag isa. Paano naton padayon nga mapabakod ang aton gugma sa isa kag isa? Paagi sa pagpatawad sa mga sala sang aton mga kauturan bisan pa mabudlay ini himuon kon kaisa.

19. Ngaa importante gid nga ipakita naton subong ang aton gugma sa isa kag isa?

¹⁹ Ngaa importante gid nga ipakita naton subong ang aton gugma sa isa kag isa? Talupangda ang rason nga ginsiling ni Pedro: “Ang katapusan sang tanan nga butang malapit na. Gani, . . . maghigugmaanay kamo sing tudok.” (1 Ped. 4:​7, 8) Ano ang mapaabot naton nga matabo samtang nagahilapit ang katapusan sining malain nga kalibutan? Amo ini ang gintagna ni Jesus nga matabo sa iya mga disipulo: “Dumtan kamo sang tanan nga pungsod bangod sa akon ngalan.” (Mat. 24:9) Para mabatas naton ini nga dumot, dapat nahiusa kita pirme. Kon ginahigugma naton ang aton mga kauturan, indi gid kita mabahinbahin ni Satanas bangod ang gugma amo ang “himpit nga higot sang paghiusa.”​—Col. 3:14; Fil. 2:​1, 2.