Ginpamatian ni Jehova ang Akon mga Pangamuyo

NAGBAG-O ANG AMON KABUHI SANG GINKADTUAN KAMI SANG MGA PAYUNIR

Natawo ako sang Disiembre 22, 1929, sa Noville. Isa ini ka gamay nga baryo nga may siam ka uma. Malapit ini sa Bastogne nga ara sa Belgian Ardennes. Madamo ako sing makalilipay nga mga eksperiensia sang bata pa ako sa amon uma upod ang akon mga ginikanan. Adlaw-adlaw, manomano namon nga ginagatasan sang akon manghod nga si Raymond ang amon mga baka. Nagabulig man kami kada magpatubas ang amon uma. Suod ang mga tawo sa amon gamay nga baryo, kag nagabuligay gid ang kada isa.

Debotado nga mga Katoliko ang akon mga ginikanan nga sanday Emile kag Alice. Nagasimba gid sila kada Domingo. Pero, sang mga 1939, may mga payunir halin sa England nga nagkadto sa amon baryo. Gintanyagan nila si Tatay sang subscription para regular sia nga makabaton sang Consolation nga magasin (Magmata! subong). Narealisar dayon ni Tatay nga kamatuoran ang ginasiling sini nga mga magasin, gani napalig-on sia nga basahon ang Biblia. Sang wala na nagasimba si Tatay, grabe ang pagpamatok sa iya sang amon mga kaingod. Sang una, kanami man sang ila pagtratar kay Tatay. Dayon gin-pressure nila si Tatay para indi sia maghalin sa Katoliko, kag madamo nga beses sila nga nagbaisay.

Nasakitan gid ako sa pagpamatok sang amon mga kaingod kay Tatay. Bangod sini, nangamuyo ako sa Dios nga buligan si Tatay. Amo ini ang pangamuyo nga ginsambit ko sa umpisa. Nalipay gid ako sang amat-amat nga nag-untat ang pagpamatok sang amon mga kaingod. Nakumbinsi ako nga si Jehova amo ang “Manugpamati sang pangamuyo.”

ANG AMON KABUHI SA TION SANG INAWAY

Sang Mayo 10, 1940, ginsalakay sang Nazi Germany ang Belgium. Bangod sini, madamo nga tawo ang naghalin sa Belgium. Ang amon pamilya nagpalagyo pakadto sa nabagatnan sang France. Samtang nagapalagyo kami, may maagyan kami nga mga engkuentro sang mga soldado sang Germany kag sang France.

Pagbalik namon sa amon uma, wala na ang halos tanan namon nga pagkabutang kay ginkawat ini. Pero ara pa ang amon ido nga si Bobbie, kag nalipay gid sia nga nagbalik kami. Bangod sa sini nga mga eksperiensia, nahunahuna ko, ‘Ngaa may inaway kag grabe nga pag-antos?’

Sadto nga tion, napalig-on gid kami sa mga pagbisita ni Brother Emile Schrantza nga isa ka matutom nga payunir kag gulang. Gingamit niya ang Biblia sa pagpaathag kon ngaa nagaantos ang mga tawo, kag ginsabat man niya ang iban ko pa nga mga pamangkot. Ginpanikasugan ko nga mangin suod kay Jehova kag nakumbinsi ako nga Dios sia sang gugma.

Sige pa sadto ang inaway, pero regular nga nagapakig-upod ang amon pamilya sa mga Saksi. Sang Agosto 1943, ginbisitahan kami ni Brother José-Nicolas Minet sa amon uma kag nagpamulongpulong sia. Namangkot sia, “Sin-o ang gusto magpabawtismo?” Nagbayaw si Tatay, kag nagbayaw man ako. Gani ginbawtismuhan kami sa isa ka gamay nga suba malapit sa amon uma.

Sang Disiembre 1944, ginsugdan sang mga soldado sang Germany ang ila katapusan nga pagsalakay sa western Europe. Gintawag ini nga Battle of the Bulge. Malapit lang sa amon lugar ang inaway, gani mga isa ka bulan kami nga nagpanago sa basement sang amon balay. Isa ka adlaw, sang naggua ako para pakaunon ang amon kasapatan, may nagtupa nga mga bomba sa amon uma kag naguba gid ang atop sang amon kamalig. Sadto nga tion, may isa ka soldado sang Amerika nga ara sa amon kuadra. Nagsinggit sia, “Hapa!” Gani nagdalagan ako pakadto sa iya kag naghapa ako sa tupad niya. Dayon ginbutang niya ang iya helmet sa akon ulo.

NANGIN HAMTONG AKO NGA CRISTIANO

Pagkatapos sang inaway, nakakomunikar kami sing regular sa mga kauturan sa Liège. Ara ini sa aminhan sang amon lugar, kag mga 90 ka kilometro ang kalayuon sini. Sang ulihi, nakaporma kami sing gamay nga grupo sa Bastogne. Nakaobra ako sa departamento nga nagaasikaso sang mga buhis, kag nahatagan ako sing tsansa nga mag-eskwela sing law ukon abogasiya. Sang ulihi, nakaobra ako sa isa ka notaryo sang gobierno. Sang 1951, nag-organisar kami sang isa ka gamay nga sirkito nga asembleya sa Bastogne. Mga 100 ka tawo ang nag-attend sa sini, kag isa sa ila amo si Elly Reuter nga mapisan gid nga payunir. Nagbisikleta sia sing 50 ka kilometro para maka-attend sa asembleya. Sang ulihi, naluyag kami sa isa kag isa kag nagplano kami nga magpakasal. Sadto nga tion, nakabaton si Elly sang imbitasyon nga mag-eskwela sa Gilead School sa United States. Nagsulat sia sa world headquarters para ipaathag kon ngaa indi sia makaeskwela sa Gilead. Ginsabat ni Brother Knorr, nga nagapanguna sadto sa katawhan ni Jehova, ang iya sulat. Kanami sang sabat ni Brother Knorr kay nagsiling sia nga may posibilidad nga makaeskwela si Elly sa Gilead sa ulihi upod ang iya bana. Nagpakasal kami ni Elly sang Pebrero 1953.

Sadto man nga tuig, nag-attend kami ni Elly sa New World Society Assembly nga ginhiwat sa Yankee Stadium, New York. May nakilala ako didto nga isa ka brother, kag gintanyagan niya ako sang isa ka maayo nga obra. Ginsilingan man niya ako nga magsaylo sa United States. Ginpangamuyo namon kay Jehova ang parte sa sini, kag nagdesisyon kami ni Elly nga indi pagbatunon ang ginatanyag sang brother. Dayon nagbalik kami sa Belgium para magbulig sa gamay nga grupo sa Bastogne nga mga pulo lang ang manugbantala. Pagkasunod nga tuig, nalipay gid kami sang ginbun-ag ni Elly ang amon bata nga lalaki nga si Serge. Pero pagligad sang pito ka bulan, nagmasakit si Serge kag napatay sia. Ginpabutyag namon kay Jehova ang amon grabe nga kasubo, kag napalig-on kami sang paglaum nga pagkabanhaw nga sigurado gid nga matabo.

BUG-OS TION NGA PAG-ALAGAD

Sang Oktubre 1961, nakakita ako sang part-time nga obra gani puede ako makapayunir. Pero sadto man nga adlaw, gintawgan ako sang branch servant sang Belgium. Ginpamangkot niya ako kon puede ako makaalagad bilang circuit servant (circuit overseer subong). Ginsilingan ko sia, “Puede bala nga makaalagad kami anay bilang mga payunir antes namon batunon ini nga asaynment?” Ginpasugtan niya ang akon pangabay. Pagkatapos namon mag-alagad bilang mga payunir sing walo ka bulan, nag-alagad kami sa sirkito sang Septiembre 1962.

Pagkatapos namon mag-alagad sa sirkito sing duha ka tuig, gin-agda kami nga mag-alagad sa Bethel sa Brussels. Nag-umpisa kami sa pag-alagad didto sang Oktubre 1964. Madamo gid nga pagpakamaayo ang nabaton namon sa sining bag-o nga asaynment. Wala madugay pagkatapos sang pagbisita ni Brother Knorr sa Bethel sang 1965, nakibot ako sang gintangdo ako bilang branch servant. Sang ulihi, gin-agda kami ni Elly nga mag-eskwela sa ika-41 nga klase sang Gilead. Nangin matuod ang ginsiling ni Brother Knorr 13 ka tuig na ang nagligad. Pagkatapos sang amon gradwasyon, nagbalik kami sa Bethel sa Belgium.

NAGBULIG AKO SA PAGPANGAPIN SA ATON LEGAL NGA MGA KINAMATARONG

Sa sulod sang madamo nga tinuig, nakabulig ako sa pagpangapin sa aton kahilwayan sa pagsimba sa Europe kag sa iban pa nga lugar. Parte sa sini, nagamit ko ang akon ineskwelahan kag eksperiensia sa obra. (Fil. 1:7) Bangod sa sini nga pribilehiyo, naistorya ko ang mga opisyal sang sobra 55 ka pungsod diin ginadumilian ang aton hilikuton. Kon magpakilala ako sa mga opisyal, wala ko ginasugid ang akon ineskwelahan kag eksperiensia sa obra, kundi nagapakilala ako bilang isa ka alagad sang Dios. Pirme ako nagapangabay sang paggiya ni Jehova bangod kabalo ako nga “ang tagipusuon sang hari [ukon sang hukom] kaangay sang nagailig nga tubig sa kamot ni Jehova. Ginapailig Niya ini sa bisan diin nga luyag Niya.”​—Hulu. 21:1.

Indi ko malipatan ang akon eksperiensia sang naistorya ko ang isa ka miembro sang European Parliament. Pila ka beses ako nga nagpangabay nga mag-istorya sa iya, kag nagpasugot gid man sia sang ulihi. Nagsiling sia, “May lima ka lang ka minutos nga makaistorya sa akon.” Nagduko ako dayon kag nangamuyo. Natingala sia, gani ginpamangkot niya ako kon ngaa nagaduko ako. Nagtungkaaw ako kag ginsilingan ko sia, “Ginpasalamatan ko ang Dios kay isa ikaw sa iya mga alagad.” Ginpamangkot niya ako, “Ano ang buot mo silingon?” Ginpakita ko sa iya ang Roma 13:4. Isa sia ka Protestante, gani naapresyar gid niya ang ginasiling sang teksto. Ano dayon ang natabo? Nakaistorya kami sing tunga sa oras, kag kanami gid sang amon pag-istoryahanay. Nagsiling pa gani sia nga nagadayaw gid sia sa aton hilikuton.

Sa sulod sang madamo nga tinuig, madamo na nga beses nga ginpangapinan sang katawhan ni Jehova sa Europe ang aton legal nga mga kinamatarong. Nalakip sa sini ang mga kaso parte sa neutralidad, kustodiya sa bata, buhis, kag madamo pa. Nalipay gid ako nga makita kon paano kita ginbuligan ni Jehova nga magdaug sa madamo nga mga kaso. Sobra na 140 ka kaso ang gindag-an sang mga Saksi ni Jehova sa European Court of Human Rights.

AMAT-AMAT NGA NANGIN HILWAY ANG ATON HILIKUTON SA CUBA

Sang dekada ’90, nakaupod ko si Brother Philip Brumley nga halin sa world headquarters kag si Brother Valter Farneti nga halin sa Italy. Ginbuligan namon ang aton mga kauturan sa Cuba para hilway nila nga masimba si Jehova bangod ginadumilian ang aton hilikuton didto. Ginsulatan ko ang embassy sang Cuba sa Belgium, kag nagpakigkita ako sa opisyal nga nagaasikaso sang aton pangabay. Gusto namon ipaathag sa gobierno ang mga wala nila nahangpan sa aton hilikuton nga amo ang ginagamit nila nga rason para dumilian kita. Pero sa amon una nga mga pag-istoryahanay sa opisyal, wala namon masolbar ini nga mga isyu.

Pagkatapos namon mangamuyo kay Jehova para magpagiya sa iya, naglisensia kami sa gobierno kon puede kami makapasulod sing 5000 ka Biblia sa Cuba. Nagpasugot ang gobierno sa amon ginpangabay. Pag-abot sang mga Biblia, ginpanagtag ini sa mga kauturan. Nagkumbinsi ini sa amon nga ginapakamaayo ni Jehova ang amon mga pagpanikasog. Gani naglisensia kami liwat kon puede kami makapasulod sing 27,500 pa ka Biblia, kag ginpasugtan man ini. Nalipay gid ako nga nakabulig ako para makabaton sang Biblia ang aton mga kauturan sa Cuba.

Pila ka beses ako nga nakakadto sa Cuba para magbulig sa pagpaathag sa gobierno parte sa aton hilikuton. Bangod sini, nangin maayo ang akon kaangtanan sa madamo nga opisyal sang gobierno.

PAGBULIG SA ATON MGA KAUTURAN SA RWANDA

Sang 1994, ginpamatay ang mga Tutsi sa Rwanda, kag sobra 1,000,000 ka tawo ang napatay sa sini. Masubo gid kay ginpatay man ang pila sa aton mga kauturan. Sang ulihi, may mga brother nga gin-asayn para magdala sang mga kinahanglanon sang aton mga kauturan didto.

Pag-abot namon sa Kigali, nga kapital sang Rwanda, nakita namon nga puno sang igo sang mga bala ang opisina sang translation kag ang bodega nga ginabutangan sang mga publikasyon. Masubo gid mabatian ang madamo nga istorya parte sa aton mga kauturan nga ginpatay paagi sa espading. Pero madamo man kami sing nabatian nga istorya parte sa gugma nga ginpakita sang mga kauturan sa isa kag isa. Halimbawa, nakilala namon ang isa ka Tutsi nga brother nga nagpanago sa buho sa idalom sang duta sa sulod sang 28 ka adlaw. Gintago sia sang isa ka Hutu nga pamilya nga mga Saksi. Sa tion sang isa ka miting sa Kigali, ginpanikasugan gid namon nga palig-unon ang sobra 900 ka kauturan.

Dayon nagkadto kami sa Zaire (Democratic Republic of the Congo subong) para pangitaon ang madamo nga kauturan halin sa Rwanda. Nagpalagyo sila sa mga refugee camp malapit sa siudad sang Goma. Indi namon sila makita, gani nangamuyo kami kay Jehova para giyahan niya kami. Dayon may nakita kami nga isa ka lalaki nga nagalakat pakadto sa amon. Ginpamangkot namon sia kon may kilala sia nga Saksi ni Jehova. “Saksi ako,” siling niya. “Upod kamo sa akon kay dal-on ko kamo sa relief committee.” Pagkatapos sang amon makapalig-on nga miting upod ang relief committee, nakigkita kami sa mga 1,600 ka refugee para paumpawan sila kag palig-unon. Ginbasa man namon sa ila ang sulat halin sa Nagadumala nga Hubon. Napalig-on gid ang mga kauturan sang mabatian nila ining ginsiling sa sulat: “Pirme gid namon kamo ginalakip sa amon mga pangamuyo. Sigurado kami nga indi gid kamo pagpabay-an ni Jehova.” Matuod gid ining ginsiling sang Nagadumala nga Hubon. Subong, sobra na 30,000 ka Saksi ang malipayon nga nagaalagad sa Rwanda.

DETERMINADO AKO NGA MAGPABILIN NGA MATUTOM

Pagkatapos sang halos 58 ka tuig namon nga pag-asawahay, napatay ang akon pinalangga nga si Elly sang 2011. Ginsugid ko kay Jehova ang akon grabe nga kasubo kag ginpaumpawan niya ako. Nakabulig man sa akon ang pagsugid sa iban parte sa maayong balita sang Ginharian.

Sobra na ako 90 anyos subong, pero nagabantala gihapon ako kada semana. Nagabulig man ako sa Legal Department diri sa branch sa Belgium, ginasugid ko ang akon mga eksperiensia sa iban, kag gina-shepherding ko ang mga pamatan-on nga Bethelite. Nagahatag gid ini sa akon sang kalipay.

Nangamuyo ako kay Jehova sa pinakauna nga tion mga 84 ka tuig na ang nagligad. Amo ato ang umpisa sang akon pagpakig-abyan kay Jehova. Kag samtang nagaligad ang tion, mas nagasuod pa gid ako sa iya. Nagapasalamat gid ako kay sa bilog ko nga kabuhi, ginpamatian ni Jehova ang akon mga pangamuyo.​—Sal. 66:19.b