Ano ang Himuon Mo Kon Nagaduhaduha Ka?

1-2. (a) Ano ang posible ginapamangkot sang mga alagad ni Jehova sa ila kaugalingon? (b) Ano ang binagbinagon naton sa sini nga artikulo?

BATA man kita ukon tigulang, nagaduhaduhaa kita kon kaisa. Halimbawa, imadyina ang isa ka pamatan-on nga nagaduhaduha kon bala interesado gid si Jehova sa iya. Bangod sini, indi sia sigurado kon bala mapabawtismo sia. Ang isa pa ka halimbawa amo ang isa ka brother nga may pamilya na. Sang pamatan-on pa sia, gin-una niya ang pag-alagad kay Jehova imbes nga magpokus sa pagpadamo sang kuarta. Subong, insakto lang ang iya kuarta para sa mga kinahanglanon sang iya pamilya. Bangod sini, posible nagaduhaduha sia kon bala husto ang iya desisyon sang pamatan-on pa sia. Imadyina man ang isa ka tigulang nga sister. Posible nagaluya ang iya buot bangod indi na niya masarangan himuon ang mga ginahimo niya sang una. Napamangkot mo na bala sa imo kaugalingon ini nga mga pamangkot: ‘Interesado gid man bala sa akon si Jehova? Husto bala nga nagsakripisyo ako para kay Jehova? May mahimo pa bala ako para kay Jehova?’

² Kon indi naton masabat ini nga mga pamangkot, posible nga magluya ang aton pagtuo kag mag-untat kita sa pag-alagad kay Jehova. Sa sini nga artikulo, binagbinagon naton kon paano makabulig ang mga prinsipio sa Biblia kon nagaduhaduha kita (1) kon bala interesado sa aton si Jehova, (2) kon bala husto ang ginhimo naton nga mga desisyon sang una, ukon (3) kon bala may mahimo pa kita para kay Jehova.

KON ANO ANG MAKABULIG SA ATON PARA MADULA ANG ATON PAGDUHADUHA

3. Ano ang isa nga puede naton himuon para madula ang aton pagduhaduha?

³ Ang isa nga puede naton himuon para madula ang aton pagduhaduha amo ang pagpangita sang mga sabat sa Biblia. Kon himuon naton ini, magabakod ang aton kaangtanan kay Jehova kag ‘makatindog kita sing malig-on sa aton pagtuo.’—1 Cor. 16:13.

4. Paano naton ‘mapat-od ang tanan nga butang’? (1 Tesalonica 5:21)

⁴ Basaha ang 1 Tesalonica 5:21. Ginapalig-on kita sang Biblia nga ‘pat-uron naton ang tanan nga butang.’ Paano naton ini mahimo? Para mapat-od naton nga matuod ang aton ginapatihan, dapat naton ini ikumparar sa ginasiling sang Biblia. Halimbawa, binagbinaga ang pamatan-on nga nagaduhaduha kon bala interesado sa iya ang Dios. OK lang bala nga pabay-an niya nga indi masabat ini nga pamangkot? Indi. Dapat niya ‘pat-uron ang tanan nga butang’ paagi sa pagtuon sang Biblia para mabal-an niya ang panghunahuna ni Jehova parte sa sini.

5. Paano naton mabal-an ang mga sabat ni Jehova sa aton mga pamangkot?

⁵ Sa kada tion nga ginabasa naton ang Biblia, daw pareho lang nga ginaistorya kita ni Jehova. Pero para mabal-an naton ang iya sabat sa aton mga pamangkot, indi bastante nga basahon lang naton ang Biblia. Dapat naton tun-an ang mga teksto nga makabulig sa aton nga masabat ang aton mga pamangkot. Puede kita maka-research sa aton mga publikasyon nga ginaaman sang organisasyon ni Jehova. (Hulu. 2:​3-6) Mangamuyo kita kay Jehova nga giyahan niya kita sa aton pag-research para mabal-an naton ang iya panghunahuna sa aton mga pamangkot. Dayon pangitaon naton ang mga prinsipio sa Biblia kag ang mga impormasyon nga maaplikar naton sa aton sitwasyon. Makabulig man ang pagbinagbinag sa kasaysayan sang mga karakter sa Biblia nga daw pareho sa aton ang sitwasyon.

6. Paano makabulig ang aton mga miting para madula ang aton pagduhaduha?

⁶ Daw ginaistorya man kita ni Jehova kon ara kita sa aton mga miting. Kon regular kita nga naga-attend sa aton mga miting, posible may mabatian kita sa mga bahin ukon sa mga komento nga amo gid ang kinahanglan naton para madula ang aton pagduhaduha. (Hulu. 27:17) Binagbinagon naton ang pila sa mga ginapamangkot naton sa aton kaugalingon, kag kon paano naton makita ang mga sabat sa sini.

KON NAGADUHADUHA KA KON BALA INTERESADO SA IMO SI JEHOVA

7. Ano ang posible ginapamangkot sang iban?

⁷ Napamangkot mo na bala ini sa imo kaugalingon, ‘Interesado gid bala sa akon si Jehova?’ Kon nagabatyag ka nga indi ka importante, posible mahunahuna mo nga imposible nga mangin abyan mo ang Manunuga sang uniberso. Posible nga nahunahuna man ini ni Hari David. Nagdayaw gid sia kay nagaulikid si Jehova sa mga tawo. Nagsiling sia: “O Jehova, ano bala ang tawo nga ginatalupangod mo sia, ang anak sang mamalatyon nga tawo nga ginasapak mo sia?” (Sal. 144:3) Diin mo makita ang sabat sa sini nga pamangkot?

8. Suno sa 1 Samuel 16:​6, 7, 10-12, ano ang makita ni Jehova sa mga tawo?

⁸ May mga tawo nga daw wala ginahatagan sang importansia sang iban. Pero ginapamatud-an sang Biblia nga makita ni Jehova ini nga mga tawo. Halimbawa, ginpakadto ni Jehova si Samuel sa panimalay ni Jesse para haplasan ang isa sa iya mga anak nga mangin hari sang Israel sa ulihi. Ginpaatubang ni Jesse kay Samuel ang pito sa iya walo ka anak nga lalaki, pero wala niya ginlakip ang iya kamanghuran nga anak nga si David.b Pero, si David ang ginpili ni Jehova. (Basaha ang 1 Samuel 16:​6, 7, 10-12.) Nakita ni Jehova ang nasulod nga pagkatawo sang pamatan-on nga si David, gani kabalo si Jehova nga palangga gid sia ni David.

9. Ngaa makasigurado ka nga interesado sa imo si Jehova? (Tan-awa man ang piktyur.)

⁹ Hunahunaa kon paano ginapakita ni Jehova nga interesado sia sa imo. Halimbawa, maaplikar mo gid sa imo sitwasyon ang ginahatag niya nga mga laygay. (Sal. 32:8) Ti, paano niya ini mahimo kon indi ka niya kilala sing maayo? (Sal. 139:1) Kon iaplikar mo ang mga laygay ni Jehova kag makita mo nga epektibo gid ini, mangin kumbinsido ka nga interesado sa imo si Jehova. (1 Cron. 28:9; Binu. 17:​26, 27) Makita ni Jehova ang tanan mo nga ginahimo sa pag-alagad sa iya. Makita niya ang imo maayo nga mga kinaiya, kag gusto niya nga mangin abyan ka niya. (Jer. 17:10) Kag malipay gid sia kon gusto mo man nga mangin Abyan mo sia.​—1 Juan 4:19.

KON DAW NAGAHINULSOL KA SA GINHIMO MO NGA MGA DESISYON SANG UNA

10. Kon hunahunaon naton ang ginhimo naton nga mga desisyon sang una, ano ang posible ipamangkot naton sa aton kaugalingon?

¹⁰ May mga tion nga ginahunahuna sang iban ang ila ginhimo nga mga desisyon sang una kag daw ginahinulsulan nila ini. Posible nga may maayo sila nga trabaho ukon negosyo sang una, pero ginsakripisyo nila ini para madamo sila sing mahimo sa ila pag-alagad kay Jehova. Pero subong, pagligad sang madamo nga tinuig, posible makita nila nga nagmanggaranon ang ila mga kilala nga gin-una ang pagtrabaho ukon ang pagnegosyo. Bangod sini, posible mahunahuna nila: ‘Husto bala nga nagsakripisyo ako para kay Jehova? Ukon mas maayo bala kuntani kon nagpokus na lang ako sa pagtrabaho para madamo ako sang kuarta subong?’

11. Ngaa nagluya ang buot sang manunulat sang Salmo 73?

¹¹ Kon ginahunahuna mo man ang pareho sa sini nga mga pamangkot, binagbinaga ang ginasiling sang Biblia parte sa manunulat sang Salmo 73. Nakita niya nga mapagros, manggaranon, kag daw wala sing problema ang mga tawo nga wala nagaalagad kay Jehova. (Sal. 73:​3-5, 12) Bangod daw maayo ang kabuhi sang sini nga mga tawo, nahunahuna niya nga wala sing pulos ang iya pag-alagad kay Jehova. Nagluya ang iya buot bangod sa iya negatibo nga panghunahuna kag ‘gin-antos niya ini sa bug-os nga adlaw.’ (Sal. 73:​13, 14) Ano ang ginhimo niya para madula ini?

12. Suno sa Salmo 73:​16-18, ano ang ginhimo sang salmista para madula ang iya negatibo nga panghunahuna?

¹² Basaha ang Salmo 73:​16-18. Nagkadto ang salmista sa santuaryo ni Jehova, kag nakapamensar sia sing maayo didto. Narealisar niya nga bisan pa daw maayo ang kabuhi sang iban, wala sila sing paglaum sa palaabuton. Bangod sini, nadula ang iya negatibo nga panghunahuna kag nangin kumbinsido sia nga ang pag-una kay Jehova amo ang pinakamaayo nga desisyon nga iya nahimo. Gani, nangin determinado pa gid sia nga padayon nga alagaron si Jehova.​—Sal. 73:​23-28.

13. Ano ang puede mo himuon kon daw nagahinulsol ka sa ginhimo mo nga mga desisyon sang una? (Tan-awa man ang piktyur.)

¹³ Sa bulig sang Pulong sang Dios, madula mo man ang negatibo nga panghunahuna. Paano? Pamalandungi ang mga pagpakamaayo nga ginhatag sa imo ni Jehova lakip na ang imo maayo nga kaangtanan sa iya, kag ikumparar ini sa masarangan nga ihatag sa imo sang kalibutan. Para sa mga tawo nga wala nagaalagad kay Jehova, gusto gid nila nga mangin maayo ang ila kabuhi subong bangod wala sila kabalo nga may mas maayo pa nga kabuhi sa palaabuton. Pero sa imo bahin, madamo na nga pagpakamaayo ang ginhatag sa imo ni Jehova kag nagapromisa sia nga madamo pa sia sing ihatag sa imo sa palaabuton. (Sal. 145:16) Binagbinaga man ini: Kon wala naton gin-una ang pag-alagad kay Jehova, sigurado bala kita nga maeksperiensiahan gid naton ang ginahunahuna kuntani naton nga kabuhi? Pero ari ang sigurado: Kon ginabase naton sa aton gugma kay Jehova kag sa aton gugma sa iban ang aton mga desisyon, mabaton gid naton pirme ang mga butang nga makahatag sa aton sang matuod nga kalipay.

KON NAGADUHADUHA KA KON BALA MAY MAHIMO KA PA PARA KAY JEHOVA

14. Ano ang sitwasyon sang pila sa mga alagad ni Jehova, kag ano ang posible ipamangkot nila sa ila kaugalingon?

¹⁴ Limitado na lang ang mahimo sang pila sa mga alagad ni Jehova bangod tigulang na sila, nagamasakit, ukon may kasablagan sa lawas. Bangod sini, posible maghunahuna sila nga indi sila importante kay Jehova. Posible pamangkuton nila ang ila kaugalingon, ‘May mahimo pa bala ako para kay Jehova?’

15. Sa ano sigurado ang manunulat sang Salmo 71?

¹⁵ Daw pareho man sa sini ang nahunahuna sang manunulat sang Salmo 71. Nangamuyo sia: “Indi ako pagbayai kon magluya na ako.” (Sal. 71:​9, 18) Pero bisan pa nagaluya na ang salmista, sigurado sia nga kon padayon sia nga mag-alagad sing matutom kay Jehova, giyahan Niya sia kag buligan. Natun-an sang salmista nga nalipay si Jehova sa Iya mga alagad nga padayon nga nagaalagad sa Iya sa bug-os nila nga masarangan bisan pa limitado na lang ang ila mahimo.​—Sal. 37:​23-25.

16. Ano ang puede himuon sang mga tigulang para kay Jehova? (Salmo 92:​12-15)

¹⁶ Kon tigulang ka na, pamalandungi kon ano ang pagtan-aw sa imo ni Jehova. Bisan pa limitado na lang ang imo mahimo, buligan ka ni Jehova para padayon mo sia nga maalagad sing matutom. (Basaha ang Salmo 92:​12-15.) Imbes nga magpokus sa indi mo na mahimo, magpokus sa masarangan mo nga himuon. Halimbawa, puede mo palig-unon ang iban paagi sa imo maayo nga halimbawa kag ipabatyag sa ila nga nagaulikid ka sa ila. Puede mo isugid sa ila kon paano ka ginbuligan ni Jehova sa sulod sang madamo na nga tinuig kag kon ano nga mga promisa sa Biblia ang excited ka na gid nga matuman. Kag indi pagkalimti nga daku gid ang mabulig sang imo hanuot nga mga pangamuyo para sa iban. (1 Ped. 3:12) Gani, ano man ang aton kahimtangan, may mahimo gid kita tanan para kay Jehova kag para sa iban.

17. Ngaa indi naton dapat pag-ikumparar ang aton kaugalingon sa iban?

¹⁷ Kon nasubuan ka bangod limitado na lang ang imo mahimo sa pag-alagad kay Jehova, makasalig ka nga ginapabaloran niya ang imo masarangan nga himuon. Indi mo dapat pag-ikumparar ang imo mahimo sa masarangan nga himuon sang iban. Ngaa? Bangod wala kita ginakumparar ni Jehova. (Gal. 6:4) Halimbawa, malahalon gid nga lana ang ginbubo ni Maria kay Jesus. (Juan 12:​3-5) Sa bahin naman sang isa ka imol nga balo nga babayi, duha lang ka sensilyo ang gin-amot niya sa templo. (Luc. 21:​1-4) Pero wala ginkumparar ni Jesus ining duha ka babayi. Sa baylo, nakita niya ang ila pagtuo. Perpekto nga gin-ilog ni Jesus ang iya Amay. Gani, makasalig ka nga makita ni Jehova ang tanan mo nga ginahimo bangod sa imo pagtuo kag gugma sa iya. Bisan pa pamatyag mo gamay lang ang imo mahimo para kay Jehova, ginapabaloran gid niya ini.

18. Ano ang himuon naton para madula ang aton pagduhaduha? (Tan-awa man ang kahon nga “Mabuligan Ka sang Pulong ni Jehova Para Madula ang Imo Pagduhaduha.”)

¹⁸ May mga tion nga nagaduhaduha kita. Pero natun-an naton nga mabuligan kita sang Biblia para madula ini. Gani panikasugan gid naton nga makita ang mga sabat sa aton mga pamangkot para madula ang aton pagduhaduha. Interesado gid si Jehova sa kada isa sa aton. Ginapabaloran niya ang aton mga sakripisyo kag tumanon gid niya ang iya promisa nga padyaan niya kita. Makasalig kita nga palangga ni Jehova ang tanan niya nga mainunungon nga mga alagad kag nagaulikid sia sa ila.