Wala Gid Kita Nagaisahanon

1-2. (a) Ngaa masiling naton nga wala kita nagaisahanon kon may problema kita? (b) Ano ang binagbinagon naton sa sini nga artikulo?

KON may problema kita, pamatyag naton daw nagaisahanon kita sa gamay nga baruto sa mabalod nga dagat. Pero ang matuod, wala kita nagaisahanon. Kay man, nakita sang aton mahigugmaon nga Amay sa langit nga nabudlayan kita kag nagpromisa sia nga buligan niya kita. Ari ang iya promisa sa tagsa niya ka matutom nga alagad: “Buligan ko ikaw.”​—Isa. 41:10.

² Binagbinagon sa sini nga artikulo kon paano kita ginabuligan ni Jehova paagi sa (1) pagtuytoy sa aton, (2) pag-aman sa aton, (3) pag-amlig sa aton, kag (4) paglugpay sa aton. Ginapasalig kita ni Jehova nga bisan ano pa nga problema ang aton maeksperiensiahan, indi gid niya kita pagkalimtan kag pagpabay-an. Gani, wala gid kita nagaisahanon.

GINATUYTUYAN KITA NI JEHOVA

3-4. Paano kita ginatuytuyan ni Jehova? (Salmo 48:14)

³ Basaha ang Salmo 48:14. Kabalo si Jehova nga indi naton masarangan nga tuytuyan ang aton kaugalingon kag kinahanglan naton ang iya bulig. Paano niya ginatuytuyan ang iya matutom nga mga alagad subong? Ang isa nga ginagamit niya amo ang Biblia. (Sal. 119:105) Paagi sa Biblia, ginabuligan niya kita nga makahimo sang maalamon nga mga desisyon kag mapakita ang maayo nga mga kinaiya. Kon tumanon naton ang iya mga ginatudlo nga mabasa sa Biblia, mangin mas malipayon kita subong kag may paglaum kita nga mabuhi sing wala sing katapusan sa palaabuton.a Halimbawa, ginatudluan niya kita nga magpatawad, mangin bunayag ukon honest sa tanan naton nga ginahimo, kag maghigugmaanay sing tinagipusuon. (Sal. 37:8; Heb. 13:18; 1 Ped. 1:22) Kon ipakita naton ini nga mga kinaiya, mangin mas maayo kita nga mga ginikanan, bana ukon asawa, kag abyan.

⁴ Ginlakip man ni Jehova sa Biblia ang mga kasaysayan sang mga tawo nga may mga problema kag balatyagon pareho sa aton. (1 Cor. 10:13; Sant. 5:17) Kon basahon naton ining matuod nga mga kasaysayan kag iaplikar naton ang aton matun-an sa sini, makabulig ini sa aton sa duha ka paagi. Una, marealisar naton nga indi lang kita ang may problema. Naeksperiensiahan man ini sang iban kag nabatas nila ini sa bulig ni Jehova. (1 Ped. 5:9) Kag ikaduha, matun-an naton kon paano naton mabatas ang aton mga problema.​—Roma 15:4.

5. Sin-o ang ginagamit ni Jehova para tuytuyan kita?

⁵ Ginagamit man ni Jehova ang aton mga kauturan para tuytuyan kita.b Halimbawa, ang mga circuit overseer regular nga nagaduaw sa mga kongregasyon para palig-unon kita. Ang ila mga pamulongpulong nagapabakod sang aton pagtuo kag nagabulig sa aton nga indi maguba ang aton paghiusa. (Binu. 15:40–16:5) Ang mga gulang nagapangabudlay man para palig-unon ang espirituwalidad sang kada isa sa aton. (1 Ped. 5:​2, 3) Ang mga ginikanan nagabulig sa ila kabataan nga palanggaon si Jehova. Ginatudluan nila sila kon paano maghimo sang maayo nga mga desisyon kag magpakita sang maayo nga pamatasan. Ginatudluan man nila ang ila kabataan nga magbasa sang Biblia, magtambong sa mga miting, kag magbantala sing regular. (Hulu. 22:6) Kag ang hamtong nga mga sister nagabulig sa pamatan-on nga mga sister paagi sa ila maayo nga halimbawa, laygay, kag pagpalig-on.​—Tito 2:​3-5.

6. Paano naton mapakita nga ginapabaloran naton ang panuytoy ni Jehova?

⁶ Ginatuytuyan kita ni Jehova kon ano ang dapat naton himuon. Paano naton mapakita nga ginapabaloran naton ang iya panuytoy? Ang Hulubaton 3:​5, 6 nagasiling: “Magsalig ka kay Jehova sa bug-os mo nga tagipusuon, kag indi ka magsalig sa imo kaugalingon nga paghangop.” Kon himuon naton ini, “tadlungon niya ang [aton] mga banas.” Buot silingon, buligan niya kita nga malikawan ang madamo nga problema kag mangin mas malipayon sa aton kabuhi subong. Nagapasalamat gid kita kay Jehova kay palangga niya kita kag ginahatagan niya kita sang laygay nga kinahanglan gid naton.​—Sal. 32:8.

GINAAMANAN KITA NI JEHOVA

7. Paano kita ginaamanan ni Jehova? (Filipos 4:19)

⁷ Basaha ang Filipos 4:19. Magluwas nga ginatuytuyan kita ni Jehova, ginapakamaayo man niya ang aton ginahimo para may pagkaon kita, bayo, kag ilistaran. (Mat. 6:33; 2 Tes. 3:12) Normal lang nga mabalaka kita sa aton materyal nga mga kinahanglanon, pero ginapalig-on kita ni Jehova nga indi kita dapat mabalaka sing sobra. (Mat. 6:25) Ngaa? Bangod indi gid pagpabay-an ni Jehova ang iya matutom nga mga alagad. (Mat. 6:8; Heb. 13:5) Masaligan gid naton ang iya ginsiling nga amanan niya kita.

8. Paano ginbuligan ni Jehova si David?

⁸ Binagbinaga kon paano ginbuligan ni Jehova si David. Sang nagpalagyo si David kay Hari Saul, mabudlay gid ang iya kahimtangan sa sulod sang madamo nga tinuig. Pero, gin-amanan ni Jehova si David kag ang iya mga tinawo sang ila mga kinahanglanon. Sang ginpamalandungan ni David kon paano sia ginbuligan ni Jehova, nagsiling sia: “Nangin pamatan-on ako kag karon tigulang na, apang wala pa ako makakita sang matarong nga ginpabay-an, ukon sang iya mga anak nga nagapangayukayo sing tinapay.” (Sal. 37:25) Sa imo bahin, mahimo nga nakita mo man kon paano ginaamanan ni Jehova ang iya matutom nga mga alagad.

9. Paano ginaamanan ni Jehova ang iya katawhan subong kon may kalamidad? (Tan-awa man ang mga piktyur.)

⁹ Ginaamanan man ni Jehova ang iya katawhan kon may kalamidad. Halimbawa, sang may tiggulutom sang unang siglo, nagpadala sing bulig ang mga Cristiano para sa ila mga kauturan nga nagakinahanglan. (Binu. 11:​27-30; Roma 15:​25, 26) Ginahimo man ini sang katawhan sang Dios subong. Kon may kalamidad, ginagamit ni Jehova ang iya katawhan para maghatag sing pagkaon, tubig, bayo, kag bulong sa mga naapektuhan sini. Ginakay-o naman sang mga nagaboluntaryo sa konstruksion ang naguba nga mga balay kag mga Kingdom Hall. Kag ginapaumpawan dayon kag ginapalig-on sang mga alagad ni Jehova ang mga wala na sing balay ukon napatyan sing pinalangga.c

10-11. Ano ang natun-an mo sa eksperiensia ni Borys?

¹⁰ Maalwan man nga ginaamanan ni Jehova ang mga wala pa nagasimba sa iya. Ginailog naton si Jehova, gani ginapakitaan man naton sing kaayo ang mga indi Saksi. (Gal. 6:10) Paagi sini, mahimo mangin interesado sila nga magtuon parte kay Jehova. Binagbinaga ang eksperiensia ni Borys nga isa ka prinsipal sa isa ka eskwelahan sa Ukraine. Bisan pa indi Saksi ni Jehova si Borys, ginarespeto niya ang mga ginapatihan sang iya estudyante nga mga Saksi. Bangod sa inaway, nagdesisyon sia nga magsaylo sa lugar nga indi masyado apektado sang inaway, kag ginbuligan sia sang aton mga kauturan. Sang ulihi, nagtambong si Borys sa Memoryal sang kamatayon sang Cristo. Sang ginpamalandungan ni Borys ang ginhimo sang mga kauturan para sa iya, nagsiling sia: “Wala gid ako ginpabay-an sang mga Saksi ni Jehova. Nagapasalamat gid ako sa ila.”

¹¹ Paano naton mailog ang aton maluluy-on nga Amay sa langit? Ipakita naton sa mga nagakinahanglan sing bulig nga palangga naton sila, Saksi man sila ukon indi. (Luc. 6:​31, 36) Nagalaum kita nga paagi sini mapalig-on sila nga magtuon parte kay Jehova kag mangin disipulo sila sang Cristo. (1 Ped. 2:12) Pero maalagad man sila kay Jehova ukon indi, makabatyag kita gihapon sang kalipay bangod nagaresulta sa mas daku nga kalipay ang paghatag.​—Binu. 20:35.

GINAAMLIGAN KITA NI JEHOVA

12. Ano nga klase sang pangamlig ang ginpromisa ni Jehova sa iya katawhan bilang grupo? (Salmo 91:​1, 2, 14)

¹² Basaha ang Salmo 91:​1, 2, 14. Nagapromisa si Jehova nga amligan niya kita para indi maguba ang aton kaangtanan sa iya. Siguraduhon ni Jehova nga padayon sia nga masimba sang iya katawhan sa husto nga paagi, kag indi ini mapunggan ni Satanas. (Juan 17:15) Kag sa tion sang “dakung kapipit-an,” makasalig gid kita nga tumanon ni Jehova ang iya promisa nga amligan niya kita sa espirituwal kag sa pisikal.​—Bug. 7:​9, 14.

13. Paano kita ginaamligan ni Jehova bilang indibiduwal?

¹³ Paano kita ginaamligan ni Jehova bilang indibiduwal? Paagi sa Biblia, ginabuligan kita ni Jehova nga mahibaluan ang husto kag sala. (Heb. 5:14) Kon ginaaplikar naton ang mga prinsipio sa Pulong sang Dios, maamligan kita sa espirituwal kag sa pisikal. (Sal. 91:4) Ginaamligan man kita ni Jehova paagi sa kongregasyon. (Isa. 32:​1, 2) Kon magpakig-upod kita sa aton mga kauturan nga nagapalangga kay Jehova kag nagatuman sa iya, mapalig-on nila kita kag mabuligan nga malikawan ang malain nga mga impluwensia.​—Hulu. 13:20.

14. (a) Ngaa ginatugutan sang Dios nga makaeksperiensia kita sang mga kabudlayan? (b) Ano ang ginapasalig sa aton sang Salmo 9:10? (Tan-awa man ang footnote.)

¹⁴ Sang una, may mga tion nga gin-amligan ni Jehova ang iya mga alagad para indi sila mahalitan. Pero, may mga tion man nga gintugutan niya ini. Ang Biblia nagasiling nga makaeksperiensia kita kon kaisa sang mga kabudlayan bangod sa “wala ginapaabot nga hitabo.” (Man. 9:11) Gintugutan man ni Jehova nga makaeksperiensia ang iya mga alagad sang paghingabot ukon mapatay pa gani para pamatud-an nga butigon si Satanas. (Job 2:​4-6; Mat. 23:34) Posible man naton ini maeksperiensiahan subong. Pero bisan pa indi pagkuhaon ni Jehova ang aton mga kabudlayan, makasalig kita nga indi gid niya pagbayaan ang mga nagapalangga sa iya.d—Sal. 9:10.

GINALUGPAYAN KITA NI JEHOVA

15. Paano makalugpay sa aton ang pangamuyo, ang Pulong sang Dios, kag ang aton mga kauturan? (2 Corinto 1:​3, 4)

¹⁵ Basaha ang 2 Corinto 1:​3, 4. Kon kaisa, nasubuan kita, nabalaka, ukon nagaantos. Grabe bala kabudlay sang imo problema subong? Posible pamatyag mo daw wala sing may nagabulig sa imo kag wala sing may nakaintiende sa imo ginabatyag. Pero, naintiendihan ka ni Jehova. Kabalo sia nga nagaantos kita kag ‘ginalugpayan niya kita sa tanan naton nga mga pagtilaw.’ Paano? Kon isugid naton kay Jehova ang tanan naton nga ginabatyag paagi sa pangamuyo, hatagan niya kita sang “paghidait sang Dios nga labaw sa tanan nga paghangop.” (Fil. 4:​6, 7) Malugpayan man kita kon basahon naton ang Biblia. Kay man, ginasugiran kita sini nga palangga gid kita ni Jehova, ginatudluan kita sini nga mangin maalamon, kag ginahatagan kita sini sang paglaum. Kag sa aton mga miting, malugpayan kita sang mga impormasyon nga nabase sa Biblia kag sang aton mga kauturan nga nagapabatyag sa aton nga palangga nila kita.

16. Ano ang natun-an mo sa eksperiensia nanday Nathan kag Priscilla?

¹⁶ Ari ang isa ka halimbawa kon paano kita ginalugpayan kag ginapalig-on ni Jehova paagi sa Biblia. Binagbinaga ang eksperiensia nanday Nathan kag Priscilla nga taga-United States. Pila ka tuig na ang nagligad, nagsaylo sila sa lugar nga nagakinahanglan sang dugang nga manugbantala. Nagsiling si Nathan, “Kumbinsido kami nga pakamaayuhon ni Jehova ang amon pagsaylo.” Pero pag-abot nila sa ila bag-o nga kongregasyon, nagmasakit sila kag nabudlayan sila makakita sang obra. Wala gid nila ginpaabot ini nga problema. Sang ulihi, nagdesisyon sila nga magpauli na lang. Pero, nabudlayan gihapon sila nga suportahan ang ila kaugalingon. Nagsiling si Nathan: “Abi ko pakamaayuhon kami ni Jehova. Gani, nagpalibog ako kon ngaa wala niya ini ginhimo. Nahunahuna ko pa gani nga basi may nahimo ako nga sala.” Pero sang ulihi, narealisar nanday Nathan kag Priscilla nga wala gid sila ginpabay-an ni Jehova. Nagsiling si Nathan: “Sang ara kami sa mabudlay nga kahimtangan, ang Biblia daw nangin isa namon ka maayo nga abyan nga nagapalig-on kag nagagiya sa amon. Bangod wala kami nagpokus sa problema kundi sa kon paano kami ginbuligan ni Jehova nga mabatas ini, nagbakod ang amon pagsalig nga padayon niya kami nga buligan sa palaabuton.”

17. Paano nalugpayan ang isa ka sister nga si Helga? (Tan-awa man ang piktyur.)

¹⁷ May mahimo pa gid ang aton mga kauturan para lugpayan kita. Ano ini? Binagbinaga ang halimbawa ni Helga nga taga-Hungary. Sa sulod sang madamo nga tinuig, nakaeksperiensia sia sang mabudlay nga mga problema. Bangod sini, grabe ang iya kabalaka kag pamatyag niya wala sia sing pulos. Pero sang ginpamalandungan niya ang iya naeksperiensiahan, narealisar niya nga gingamit ni Jehova ang mga kauturan para lugpayan sia. Nagsiling si Helga: “Ginabuligan gid ako pirme ni Jehova sa kada tion nga nakapoy ako sa akon trabaho, sa akon pag-atipan sa akon bata nga nagamasakit, kag sa iban ko pa nga mga problema. Sa sulod sang nagligad nga 30 ka tuig, gintuman gid ni Jehova ang iya promisa kay ginalugpayan niya ako kada adlaw. Sa masami, ginapabakod niya ako paagi sa mga pagpalig-on nga mabaton ko halin sa iban. Kanami sa pamatyag nga ginadumdom nila ako. Tayming gid pirme ang mabaton ko nga text, card, ukon komendasyon.”

18. Paano naton malugpayan ang iban?

¹⁸ Mailog naton ang aton Dios paagi sa paglugpay sa iban. Paano naton ini mahimo? Paagi sa pagpamati sa ila sing mapinasensiahon, pagpaumpaw sa ila, kag pagbulig sa ila. (Hulu. 3:27) Ginapanikasugan naton nga lugpayan ang tanan nga nagaantos, lakip na ang mga indi Saksi. Kon nasubuan, nagamasakit, ukon nabalaka ang aton mga kaingod, ginabisitahan naton sila, ginapamatian, kag ginapaumpawan paagi sa Biblia. Kon ginailog naton si Jehova nga “nagahatag sang tanan nga sahi sang lugpay,” ginabuligan naton ang aton mga kauturan nga mabatas ang mga kabudlayan. Magluwas sa sini, posible nga mabuligan man naton ang mga indi Saksi nga magtuon parte kay Jehova.​—Mat. 5:16.

BULIGAN GID KITA PIRME NI JEHOVA

19. Ano ang ginahimo ni Jehova para sa aton, kag paano naton sia mailog?

¹⁹ Nagaulikid gid si Jehova sa tanan nga nagapalangga sa iya. Wala niya kita ginapabay-an kon ara kita sa kabudlayan. Pareho sa isa ka mahigugmaon nga ginikanan nga nagaatipan sa iya bata, ginaatipan man ni Jehova ang iya matutom nga mga alagad. Ginatuytuyan niya kita, ginaamanan, ginaamligan, kag ginalugpayan. Mailog naton ang aton mahigugmaon nga Amay sa langit kon buligan kag palig-unon man naton ang iban nga ara sa kabudlayan. Ano man nga problema ang aton maeksperiensiahan, makasalig kita nga buligan gid kita pirme ni Jehova. Kay man, nagpromisa sia: “Indi ka mahadlok, kay kaupod mo ako.” (Isa. 41:10) Gani, makasalig kita nga wala gid kita nagaisahanon.