Ano ang Matun-an Naton sa Tagna ni Jacob Antes Sia Mapatay?​—Bahin 2

1. Ano ang binagbinagon naton sa sini nga artikulo?

TIGULANG na gid si Jacob, kag ara sa tupad niya ang iya mga anak nga lalaki nga nagapamati sing maayo sa mga pagpakamaayo niya sa kada isa sa ila. Sa nagligad nga artikulo, natun-an naton nga wala gid nila ginpaabot ang ginsiling ni Jacob parte kay Ruben, Simeon, Levi, kag Juda. Gani posible gid nga ginapamensar nila kon ano naman ang isiling ni Jacob sa walo pa niya ka anak. Binagbinagon naton kon ano ang matun-an naton sa ginsiling niya kay Zebulon, Isacar, Dan, Gad, Aser, Neptali, Jose, kag Benjamin.a

SI ZEBULON

2. Ano ang ginsiling ni Jacob kay Zebulon, kag paano ini natuman? (Genesis 49:13) (Tan-awa man ang kahon.)

² Basaha ang Genesis 49:13. Nagsiling si Jacob nga ang kaliwatan ni Zebulon magaistar sa higad sang dagat, kag ara sa aminhan sang Ginsaad nga Duta ang ila teritoryo. Pagligad sang sobra 200 ka tuig, nabaton sang tribo ni Zebulon ang ila teritoryo bilang ila palanublion, kag lapit ini sa dagat. Ara sa pihak sini ang Dagat sang Galilea, kag sa pihak naman ang Mediteraneo. May rason gid nga magkalipay ang kaliwatan ni Zebulon. Ngaa? Kay man, mahapos lang para sa ila nga magkadto sa lugar sang negosyo kay ginapatung-an sila sang duha ka dagat. Posible nga amo ini ang rason kon ngaa nagtagna si Moises: “Magkasadya ka, O Zebulon, sa imo pagpanglakaton.”​—Deut. 33:18.

3. Ano ang makabulig sa aton nga mangin kontento?

³ Ano ang matun-an naton? Bisan diin man kita nagaistar ukon ano man ang aton kahimtangan, may rason gid kita nga mangin malipayon. Kag para mangin malipayon kita pirme, dapat mangin kontento kita. (Sal. 16:6; 24:5) Pero kon kaisa, mas nagapokus kita sa kon ano ang wala sa aton. Gani tinguhaan naton nga magpokus sa kon ano ang ara sa aton kag sa positibo nga mga butang sa aton sitwasyon.​—Gal. 6:4.

SI ISACAR

4. Ano ang ginsiling ni Jacob kay Isacar, kag paano ini natuman? (Genesis 49:​14, 15) (Tan-awa man ang kahon.)

⁴ Basaha ang Genesis 49:​14, 15. Gindayaw ni Jacob ang pagpangabudlay ni Isacar. Ginpaanggid niya si Isacar sa isa ka mabakod nga asno nga makasarang magpas-an sang mabug-at nga karga. Nagsiling man si Jacob nga ihatag kay Isacar ang maayo nga duta. Bilang katumanan sang ginsiling ni Jacob, ginhatag sa kaliwatan ni Isacar ang maayo nga duta sa tupad sang Suba Jordan. (Jos. 19:22) Magluwas nga nagpangabudlay sila sa pagpanguma sa ila duta, nagpangabudlay man sila sa pagbulig sa iban. (1 Hari 4:​7, 17) Halimbawa, handa ang tribo ni Isacar sa pagbulig sa pagpakig-away sa mga kaaway sang ila pungsod, pareho sang tion ni Hukom Barak kag ni manalagna Debora.​—Huk. 5:15.

5. Ano ang pagtamod ni Jehova sa aton pagpangabudlay?

⁵ Ano ang matun-an naton? Ginapabaloran gid ni Jehova ang aton pagpangabudlay sa pag-alagad sa iya pareho sa pagpabalor niya sa pagpangabudlay sang tribo ni Isacar. (Man. 2:24) Halimbawa, binagbinaga ang pagpangabudlay sang mga brother para maatipan ang kongregasyon. (1 Tim. 3:1) Wala sila literal nga nagapakig-away, pero nagapanikasog gid sila para maproteksionan ang kaangtanan sang ila mga kauturan kay Jehova. (1 Cor. 5:​1, 5; Jud. 17-23) Nagapangabudlay man sila sa paghanda sang mga pamulongpulong para pabakuron ang kongregasyon.​—1 Tim. 5:17.

SI DAN

6. Ano nga asaynment ang ginhatag sa tribo ni Dan? (Genesis 49:​17, 18) (Tan-awa man ang kahon.)

⁶ Basaha ang Genesis 49:​17, 18. Ginpaanggid ni Jacob si Dan sa isa ka man-ug nga wala nahadlok sa mas daku nga mga sapat, pareho sang kabayo nga ginagamit sa inaway. Maisog gid ang tribo ni Dan kag handa sila sa pagpakig-away sa mga kaaway sang Israel. Sang nagapakadto sa Ginsaad nga Duta ang mga Israelinhon, ginproteksionan nila ang tanan nga tribo kay sila ang “mga bantay sa likuran.” (Num. 10:25) Bisan pa indi makita sang iban ang ginahimo sang tribo ni Dan, importante gid ang ila asaynment.

7. Ano ang dapat naton dumdumon parte sa aton mga asaynment sa pag-alagad?

⁷ Ano ang matun-an naton? May ginhimo ka bala nga asaynment nga daw wala natalupangdan sang iban? Halimbawa, basi nagbulig ka sa pagpaninlo kag pagmentinar sang Kingdom Hall, nagboluntaryo ka sa asembleya ukon sa kombension, ukon may ginhimo ka nga iban pa nga asaynment. Maayo gid ang imo ginhimo. Dumduma pirme nga makita ni Jehova ang tanan mo nga ginahimo para sa iya kag ginapabaloran niya ini. Nalipay gid sia kon ginaalagad mo sia indi bangod gusto mo nga dayawon ka sang iban, kundi bangod gusto mo ipakita nga palangga mo sia.​—Mat. 6:​1-4.

SI GAD

8. Ngaa mahapos lang salakayon ang tribo ni Gad? (Genesis 49:19) (Tan-awa man ang kahon.)

⁸ Basaha ang Genesis 49:19. Gintagna ni Jacob nga salakayon si Gad sang grupo sang mga tulisan. Pagligad sang sobra 200 ka tuig, nag-istar ang tribo ni Gad sa sidlangan nga bahin sang Suba Jordan. Bangod kaingod nila ang mga pungsod nga kaaway nila, mahapos lang sila salakayon. Pero gusto sang tribo ni Gad mag-istar didto bangod madamo ini sing halalban para sa ila kasapatan. (Num. 32:​1, 5) Gani, maisog gid ang mga Gadhanon. Daku ang ila pagsalig nga buligan sila ni Jehova sa pagpakig-away sa grupo sang mga tulisan para indi maagaw ang duta nga ginhatag sa ila. Sa sulod sang madamo nga tinuig, nagpadala man sila sang mga soldado para buligan ang iban nga mga tribo. Ginbuligan nila sila sa pagsakop sang iban pa nga bahin sang Ginsaad nga Duta sa pihak sang Suba Jordan. (Num. 32:​16-19) Nagsalig sila nga proteksionan ni Jehova ang ila mga asawa kag kabataan samtang malayo sa ila ini nga mga soldado. Ginpakamaayo gid ni Jehova ang ila kaisog kag pagsakripisyo.​—Jos. 22:​1-4.

9. Kon nagasalig kita kay Jehova, ano ang himuon naton?

⁹ Ano ang matun-an naton? Para maalagad naton si Jehova bisan pa may mga kabudlayan, dapat padayon kita nga magsalig sa iya. (Sal. 37:3) Subong, madamo ang nagapakita sang ila pagsalig kay Jehova paagi sa paghimo sang mga sakripisyo. Nagabulig sila sa mga konstruksion nga ginahimo sang organisasyon, nagaalagad sila sa mga lugar nga nagakinahanglan sang dugang nga manugbantala, ukon nagaboluntaryo sila sa iban pa nga mga pribilehiyo sa pag-alagad. Ginahimo nila ini bangod nagasalig sila nga indi gid sila pagpabay-an ni Jehova.​—Sal. 23:1.

SI ASER

10. Ano ang wala ginhimo sang tribo ni Aser, kag ano ang epekto sini sa ila pag-alagad kay Jehova? (Genesis 49:20) (Tan-awa man ang kahon.)

¹⁰ Basaha ang Genesis 49:20. Gintagna ni Jacob nga magamanggaranon ang tribo ni Aser, kag natuman gid ini. Ginhatag sa tribo ni Aser bilang ila palanublion ang pila sa pinakamaayo nga duta sa bilog nga Israel. (Deut. 33:24) Ara man sa higad sang Dagat Mediteraneo ang ila teritoryo, kag nalakip sa sini ang manggaranon nga pantalan sang Sidon sa Fenicia. Pero, wala nila gintabog ang mga Canaanhon. (Huk. 1:​31, 32) Bangod sang malain nga impluwensia sang mga Canaanhon sa ila tribo kag bangod nagmanggaranon sila, daw nabuhinan ang ila katutom sa pag-alagad kay Jehova. Halimbawa, sang nangabay si Hukom Barak sing bulig sa pagpakig-away sa mga Canaanhon, wala nagbulig ang tribo ni Aser. Bangod sini, wala nila makita ang milagro nga ginhimo ni Jehova “malapit sa katubigan sang Megiddo” para buligan ang mga Israelinhon nga magdaug. (Huk. 5:​19-21) Posible gid nga nahuya ang tribo ni Aser sang nabatian nila ang ginsambit ni Barak kag ni Debora sa ila kanta: “Si Aser nagpungko lang sa higad-baybay.”​—Huk. 5:17.

11. Ngaa dapat husto pirme ang aton pagtamod sa materyal nga mga butang?

¹¹ Ano ang matun-an naton? Gusto naton ihatag kay Jehova ang aton pinakamaayo. Para mahimo naton ini, indi naton dapat pag-ilugon ang pagtamod sang mga tawo sa kalibutan sa kuarta kag mga pagkabutang. (Hulu. 18:11) Panikasugan naton nga mangin husto pirme ang aton pagtamod sa kuarta. (Man. 7:12; Heb. 13:5) Indi naton dapat paggamiton ang aton tion kag kusog sa pagtigayon sang mga butang nga indi man naton kinahanglan. Sa baylo, gamiton naton ini para kay Jehova. Kabalo kita nga kon magpabilin kita nga matutom, padyaan kita ni Jehova sang pinakamaayo nga kabuhi sa palaabuton.​—Sal. 4:8.

SI NEPTALI

12. Paano mahimo natuman ang pagpakamaayo ni Jacob kay Neptali? (Genesis 49:21) (Tan-awa man ang kahon.)

¹² Basaha ang Genesis 49:21. Ang “matahom nga mga pulong” nga ginsambit ni Jacob mahimo nagapatuhoy sa paagi ni Jesus sa paghambal sa tion sang iya pagministeryo. Epektibo gid ang paagi sang pagtudlo ni Jesus. Nakaistar man si Jesus sa Capernaum sa teritoryo ni Neptali, gani gintawag ini nga “iya kaugalingon nga siudad.” (Mat. 4:13; 9:1; Juan 7:46) Parte kay Jesus, nagtagna si Isaias nga makita sang mga tawo sa Zebulon kag sa Neptali ang “daku nga kasanag.” (Isa. 9:​1, 2) Si Jesus “ang matuod nga kapawa nga nagahatag sang kasanag sa tanan nga sahi sang tawo” paagi sa iya mga gintudlo.​—Juan 1:9.

13. Paano naton masigurado nga makapahalipay kay Jehova ang aton ginahambal?

¹³ Ano ang matun-an naton? Importante kay Jehova kon ano ang aton ginahambal kag kon paano naton ini ginahambal. Paano kita makahambal sang “matahom nga mga pulong” nga makapahalipay kay Jehova? Una, dapat kita maghambal sing kamatuoran. (Sal. 15:​1, 2) Dayon, palig-unon naton ang iban paagi sa aton ginahambal. Halimbawa, komendahan naton sila imbes nga pakalainon ukon magreklamo. (Efe. 4:29) Kag panikasugan naton nga mangin mas epektibo sa pagsugod sa pag-istorya sa iban para mapanaksihan naton sila.

SI JOSE

14. Ipaathag kon paano natuman ang pagpakamaayo ni Jacob kay Jose. (Genesis 49:​22, 26) (Tan-awa man ang kahon.)

¹⁴ Basaha ang Genesis 49:​22, 26. Ginpabugal gid ni Jacob si Jose nga “ginpain sa iya mga utod.” Gintawag sia ni Jacob nga “sanga sang nagapamunga nga kahoy.” Si Jacob amo ang kahoy, kag si Jose amo ang sanga. Si Jose ang panganay sang pinalangga nga asawa ni Jacob nga si Raquel. Gintagna ni Jacob nga ihatag kay Jose ang doble nga parte imbes nga kay Ruben nga anak niya kay Lea kag panganay sa tanan niya nga anak. (Gen. 48:​5, 6; 1 Cron. 5:​1, 2) Natuman ini sang nangin duha ka tribo sang Israel ang mga anak ni Jose, nga si Efraim kag si Manases, kag ginhatagan ang kada isa sa ila sang duta bilang ila palanublion.​—Gen. 49:25; Jos. 14:4.

15. Ano ang reaksion ni Jose sa inhustisya nga iya naeksperiensiahan?

¹⁵ Nagsiling man si Jacob nga may mga manugpana nga ‘nagapana kay Jose kag nagadumot sa iya.’ (Gen. 49:23) Nagapatuhoy ini sa iya mga utod nga nahisa sa iya, nga amo ang rason sang madamo nga inhustisya nga iya naeksperiensiahan. Pero, wala naghinakit si Jose sa iya mga utod kag wala niya ginbasol si Jehova. Sa baylo, amo ini ang ginsiling ni Jacob parte kay Jose: “Ang iya pana nagpabilin nga mabakod, kag ang iya mga kamot makusog kag maabtik.” (Gen. 49:24) Nagsalig si Jose kay Jehova sa tion sang kabudlayan. Kag magluwas nga ginpatawad niya ang iya mga utod, ginpakitaan man niya sila sang kaayo. (Gen. 47:​11, 12) Bisan pa nakaeksperiensia si Jose sang mga kabudlayan, gintugutan niya nga hanason sia sini nga mangin mas maayo nga tawo. (Sal. 105:​17-19) Bangod sini, gingamit sia ni Jehova sa paghimo sang dalayawon nga mga butang.

16. Kon makaeksperiensia kita sang mga kabudlayan, paano naton mailog si Jose?

¹⁶ Ano ang matun-an naton? Kon makaeksperiensia kita sang mga kabudlayan, indi kita dapat magpalayo kay Jehova kag sa aton mga kauturan. Dumdumon naton nga ginatugutan ni Jehova ang mga pagtilaw sa aton pagtuo para hanason kita. (Heb. 12:​7, footnote) Paagi sa sini nga paghanas, mabuligan niya kita nga mapakita ang maayo nga mga kinaiya pareho sang kaluoy kag pagkamapinatawaron. (Heb. 12:11) Makasalig kita nga kon magbatas kita, padyaan kita ni Jehova pareho sa ginhimo niya kay Jose.

SI BENJAMIN

17. Paano natuman ang tagna parte kay Benjamin? (Genesis 49:27) (Tan-awa man ang kahon.)

¹⁷ Basaha ang Genesis 49:27. Gintagna ni Jacob nga ang mga Benjaminhon mangin mga soldado nga maayo magpakig-away pareho sa isa ka lobo. (Huk. 20:​15, 16; 1 Cron. 12:2) “Sa aga” nga bahin sang ginharian sang Israel, naghalin sa tribo ni Benjamin ang pinakauna nga hari sang Israel nga si Saul. Nangin maisog gid si Saul sa pagpakig-away sa mga Filistinhon. (1 Sam. 9:​15-17, 21) “Sa gab-i” nga bahin sang ginharian sang Israel, pamatyon na kuntani ang mga Israelinhon nga ara sa Emperyo sang Persia. Pero ginluwas sila ni Rayna Ester kag sang primer ministro nga si Mardoqueo, nga pareho nga naghalin sa tribo ni Benjamin.​—Est. 2:​5-7; 8:3; 10:3.

18. Paano naton mailog ang pagkamainunungon sang tribo ni Benjamin kay Jehova?

¹⁸ Ano ang matun-an naton? Sigurado nga nalipay gid ang mga Benjaminhon sang nangin hari si Saul nga naghalin sa ila tribo. Pero sang ulihi, si David nga naghalin sa tribo ni Juda ang ginhimo ni Jehova nga hari. Bisan pa sini, ginsuportahan sang ulihi sang mga Benjaminhon ini nga pagbag-o. (2 Sam. 3:​17-19) Pagligad sang madamo nga tinuig, nagrebelde ang napulo ka tribo sa tribo ni Juda. Pero mainunungon gihapon ang mga Benjaminhon sa tribo ni Juda kag sa hari nga gintangdo ni Jehova. (1 Hari 11:​31, 32; 12:​19, 21) Kabay nga mainunungon man naton nga suportahan ang mga gintangdo ni Jehova nga magpanguna sa iya katawhan subong.​—1 Tes. 5:12.

19. Paano makabulig sa aton ang tagna ni Jacob antes sia mapatay?

¹⁹ Makabulig gid sa aton ang tagna ni Jacob antes sia mapatay. Paagi sa pagrepaso kon paano ini natuman, nagbakod pa gid ang aton pagsalig nga matuman gid ang iban pa nga mga tagna sa Pulong ni Jehova. Kag paagi sa pagbinagbinag kon paano ginpakamaayo ang mga anak ni Jacob, nahangpan naton sing maayo kon paano naton mapahalipay si Jehova.