Paano Kita Ginabuligan ni Jehova nga Makabatas?

1. Ngaa kinahanglan naton ang pagbatas, kag sin-o ang makabulig sa aton nga makabatas? (1 Pedro 5:10)

MABUDLAY gid ang aton kabuhi sa sining katapusan nga mga adlaw, gani kinahanglan naton ang pagbatas. Posible nga ang iban sa aton may malala nga balatian, napatyan sing pinalangga, ukon ginapamatukan sang ila pamilya ukon sang gobierno. (Mat. 10:18, 36, 37) Pero makasalig ka nga bisan ano man ang imo problema subong, buligan ka ni Jehova nga makabatas.​—Basaha ang 1 Pedro 5:10.

2. Ngaa masarangan naton nga magbatas?

² Kon nagabatas kita, ginapakita naton nga matutom kita kay Jehova bisan pa makaeksperiensia kita sang mga kabudlayan, paghingabot, ukon pagsulay. Ginapakita man naton nga wala kita nagakadulaan sing paglaum. Masarangan naton nga magbatas indi bangod sa aton kusog, kundi bangod kay Jehova nga nagahatag sa aton sang “gahom nga labaw sa kinaandan.” (2 Cor. 4:7) Sa sini nga artikulo, binagbinagon naton ang apat ka aman ni Jehova nga makabulig sa aton nga makabatas. Tun-an man naton kon ano ang puede naton himuon para makabenepisyo kita sa sini nga mga aman.

PANGAMUYO

3. Ngaa masiling naton nga isa ka milagro ang pangamuyo?

³ Isa gid ka milagro ang gin-aman ni Jehova para buligan kita nga makabatas. Bisan pa makasasala kita, makapangamuyo kita sa iya. (Heb. 4:16) Hunahunaa ini: Makapangamuyo kita kay Jehova bisan ano nga oras kag bisan ano nga topiko. Maintiendihan man niya kita bisan ano man ang aton lenguahe. Kag mabatian niya kita bisan diin man kita nagaistar, bisan pa malayo kita sa aton mga kauturan, ukon bisan pa ara kita sa prisuhan. (Jon. 2:1, 2; Binu. 16:25, 26) Kon grabe gid ang aton kabalaka kag indi kita kabalo kon paano naton isugid kay Jehova ang aton ginabatyag, kabalo sia kon ano ang gusto naton ihambal sa iya. (Roma 8:26, 27) Gani, masiling naton nga isa gid ka milagro ang pangamuyo.

4. Kon mangamuyo kita kay Jehova nga buligan niya kita nga makabatas, ngaa masiling naton nga suno ini sa iya kabubut-on?

⁴ Ginapasalig kita sang Pulong ni Jehova nga “bisan ano ang ipangamuyo naton suno sa iya kabubut-on, magapamati sia sa aton.” (1 Juan 5:14) Puede bala naton ipangamuyo kay Jehova nga buligan niya kita nga makabatas? Huo. Kay man, suno ini sa iya kabubut-on. Ngaa masiling naton ini? Kay man, kon ginabatas naton ang mga kabudlayan, masabat ni Jehova ang nagayaguta sa iya nga si Satanas nga Yawa. (Hulu. 27:11) Isa pa, ang Biblia nagasiling nga gusto gid ni Jehova nga “ipakita ang iya kusog para sa ila nga ang tagipusuon bug-os sa iya.” (2 Cron. 16:9) Gani, makasalig kita nga may gahom si Jehova sa pagbulig sa aton nga makabatas kag gusto gid niya ini himuon.​—Isa. 30:18; 41:10; Luc. 11:13.

5. Paano makabulig ang pangamuyo para makabatyag kita sang kalinong sa hunahuna? (Isaias 26:3)

⁵ Ang Biblia nagasiling nga kon hanuot naton nga ipangamuyo kay Jehova ang aton mga ginakabalak-an, “ang paghidait sang Dios nga labaw sa tanan nga paghangop magabantay sang [aton] tagipusuon kag ikasarang sa paghunahuna.” (Fil. 4:7) Binagbinaga kon ano ang buot silingon sini. Kon may problema ang mga tawo nga wala nagaalagad kay Jehova, ginatestingan nila ang lainlain nga paagi para mangin malinong ang ila hunahuna. Halimbawa, may pila nga gintestingan nila ang isa ka klase sang pagpamalandong. Paagi sa sini, mabakante kuno ang ila hunahuna kag indi na nila mapensaran ang ila mga ginakabalak-an. Pero kon himuon nila ini, ginahatagan nila sang tsansa ang mga demonyo nga impluwensiahan ang ila hunahuna. (Ipaanggid ang Mateo 12:43-45.) Kag bisan pa nagakalma sila kon himuon nila ini nga pagpamalandong, mas labaw gihapon ang paghidait ukon ang kalinong sa hunahuna nga ginahatag ni Jehova. Kon nagapangamuyo kita kay Jehova, ginapakita naton nga bug-os ang aton pagsalig sa iya. Kag suno sa iya ginpromisa, hatagan niya kita sing “dayon nga paghidait.” (Basaha ang Isaias 26:3.) Ginahimo ini ni Jehova paagi sa pagbulig sa aton nga madumduman ang mga teksto nga makapaumpaw sa aton. Paagi sa sini, madumduman naton nga palangga gid kita ni Jehova kag gusto niya kita buligan. Gani, makabatyag kita sang kalinong sa hunahuna.​—Sal. 62:1, 2.

6. Ano ang puede mo ilakip sa imo mga pangamuyo? (Tan-awa man ang piktyur.)

⁶ Ang puede mo himuon. Kon may ginabatas ka nga pagtilaw sa imo pagtuo, “itugyan ang imo lulan kay Jehova” kag mangamuyo nga hatagan ka niya sing malinong nga hunahuna. (Sal. 55:22) Mangamuyo man nga hatagan ka niya sing kaalam kon paano mo atubangon ang imo problema. (Hulu. 2:10, 11) Kag indi pagkalimti nga pasalamatan si Jehova sa imo mga pangamuyo. (Fil. 4:6) Pamensara kon paano ka ginabuligan ni Jehova nga mabatas ang mga pagtilaw, kag pasalamati sia. Kon may mga kabudlayan, posible daw indi mo na makita ang mga pagpakamaayo nga nabaton mo. Pero indi gid pagkalimti nga ginabuligan ka ni Jehova.​—Sal. 16:5, 6.

PULONG SANG DIOS

7. Paano makabulig ang pagtuon sang Biblia para makabatas kita?

⁷ Ginhatag ni Jehova ang Biblia para buligan kita nga makabatas. Madamo kita sing mabasa sa Biblia nga nagapasalig sa aton nga buligan gid kita ni Jehova. Binagbinaga ining isa ka halimbawa. Ang Mateo 6:8 nagasiling: “Nahibaluan sang inyo Amay ang inyo ginakinahanglan bisan wala pa kamo makapangayo sa iya.” Ginhambal ini ni Jesus, kag sia ang mas nakakilala kay Jehova. Gani makasalig kita nga kon may problema kita, kabalo si Jehova kon ano ang aton kinahanglan kag buligan gid niya kita. Madamo pa kita sing mabasa sa Biblia nga makabulig sa aton nga padayon nga magbatas.​—Sal. 94:19.

8. (a) Maghatag sing halimbawa sang prinsipio sa Biblia nga makabulig sa aton nga makabatas. (b) Ano ang himuon naton para madumduman naton dayon ang mga prinsipio nga kinahanglan naton?

⁸ Mabuligan kita sang mga prinsipio sa Biblia nga makabatas. Kay man, makatudlo ini sa aton sing praktikal nga kaalam nga makabulig sa aton sa paghimo sang maayo nga mga desisyon. (Hulu. 2:6, 7) Halimbawa, ginapalig-on kita sang Biblia nga indi pagkabalak-an ang posible nga matabo buas. Sa baylo, dapat kita magsalig kay Jehova kada adlaw. (Mat. 6:34) Kon ginabasa naton ang Biblia adlaw-adlaw kag ginapamalandungan ini, posible gid nga madumduman naton dayon ang mga prinsipio nga kinahanglan naton sa isa ka sitwasyon.

9. Paano makabulig ang mga kasaysayan sa Biblia para magbakod ang aton pagsalig kay Jehova?

⁹ Mabasa man sa Biblia ang matuod nga kasaysayan sang ordinaryo nga mga tawo nga nagsalig kay Jehova kag ginbuligan niya. (Heb. 11:32-34; Sant. 5:17) Kon pamalandungan naton ini nga mga kasaysayan, magabakod ang aton pagsalig nga si Jehova gid ang “aton dalangpan kag kusog, [kag] handa gid sia nga magbulig sa tion sang kalisdanan.” (Sal. 46:1) Kon hunahunaon naton ang katutom nga ginpakita sang mga alagad ni Jehova sang una, mapalig-on kita nga ilugon ang ila pagtuo kag pagbatas.​—Sant. 5:10, 11.

10. Ano ang puede mo himuon para makabulig gid sa imo ang Biblia?

¹⁰ Ang puede mo himuon. Basaha ang Biblia adlaw-adlaw, kag listaha ang mga teksto nga nakabulig gid sa imo. Madamo man ang nagabasa sang teksto kag komento sa Pag-usisa sa Kasulatan Adlaw-adlaw kada aga. Paagi sini, may mapamalandungan sila nga makapalig-on nga punto sa bilog nga adlaw. Binagbinaga ang isa ka sister nga si Marie.a Nabal-an niya nga may kanser ang iya amay kag iloy kag indi na maglawig ang ila kabuhi. Ano ang nakabulig sa iya nga makabatas samtang ginaatipan niya sila sa nabilin nga binulan sang ila kabuhi? Nagsiling si Marie: “Kada aga, ginabasa ko ang teksto sa Pag-usisa sa Kasulatan Adlaw-adlaw kag ginapamalandungan ko ini. Nakabulig ini sa akon nga magpokus kay Jehova kag sa iya dalayawon nga mga promisa imbes nga sa akon mabudlay nga sitwasyon.”​—Sal. 61:2.

MGA KAUTURAN

11. Ngaa makapaumpaw mahibaluan nga indi lang kita ang nagabatas sang mga problema?

¹¹ Gin-aman man ni Jehova ang aton mga kauturan para buligan kita nga makabatas. Makapaumpaw mahibaluan nga indi lang kita ang nagabatas sang mga problema. Kay man, ‘naeksperiensiahan man sang tanan naton nga kauturan’ ang mga problema nga ginaantos naton. (1 Ped. 5:9) Buot silingon, ano man ang aton problema, may utod kita nga nakaeksperiensia na sini kag nabatas niya ini. Gani, mabatas man naton ini.​—Binu. 14:22.

12. Paano kita ginabuligan sang aton mga kauturan, kag ano ang puede naton himuon para sa ila? (2 Corinto 1:3, 4)

¹² Mapalig-on kita sang aton mga kauturan nga padayon nga magbatas. Naeksperiensiahan ini ni apostol Pablo. Ginpasalamatan niya sa iya mga sulat ang mga nagbulig sa iya sang napriso sia sa isa ka balay, kag ginsambit niya ang ila mga ngalan. Ginlugpayan nila si Pablo, ginpalig-on, kag gin-amanan sang iya mga kinahanglanon. (Fil. 2:25, 29, 30; Col. 4:10, 11) Subong, ginalugpayan man kita kag ginabuligan sang aton mga kauturan kon may ginabatas kita nga problema. Gani kon sila naman ang may problema, buligan man naton sila.​—Basaha ang 2 Corinto 1:3, 4.

13. Ano ang nakabulig sa isa ka sister nga si Maya nga makabatas?

¹³ Daku gid ang nabulig sang mga kauturan sa isa ka sister sa Russia nga si Maya. Sang 2020, gin-raid sang mga pulis ang iya balay. Sang ulihi, ginpasakaan sia sing kaso bangod ginasugid niya sa iban ang iya mga ginapatihan. Nagsiling si Maya: “Sang ginaluyahan ako sang buot, gintawgan ako kag ginsulatan sang mga kauturan, kag ginpasalig nga palangga nila ako. . . . Sadto pa, bal-an ko na nga may isa ako ka daku kag mahigugmaon nga pamilya. Pero mas nabatyagan ko gid ini halin sang 2020.”

14. Ano ang puede naton himuon para mabuligan kita sang aton mga kauturan? (Tan-awa man ang piktyur.)

¹⁴ Ang puede mo himuon. Kon may ginabatas ka nga problema, importante gid nga magpakigsuod ka sa imo mga kauturan. Indi matahap nga magpabulig sa mga gulang. “Mangin kaangay [sila] sang palasilungan sa hangin, isa ka duog nga dalangpan sa unos.” (Isa. 32:2, footnote) Kag dumduma nga may ginabatas man nga mga kabudlayan ang imo mga kauturan. Kon may himuon ka para sa isa ka utod nga nagakinahanglan, makabatyag ka sing kalipay kag makabulig ini sa imo nga mabatas ang imo problema.​—Binu. 20:35.

ATON PAGLAUM

15. Paano nakabulig kay Jesus ang iya paglaum, kag paano makabulig sa aton ang aton paglaum? (Hebreo 12:2)

¹⁵ Gin-amanan kita ni Jehova sang sigurado nga paglaum para buligan kita nga makabatas. (Roma 15:13) Dumduma nga nabatas ni Jesus ang pinakamabudlay niya nga pagtilaw sang ari sia sa duta bangod sa iya paglaum. (Basaha ang Hebreo 12:2.) Kabalo si Jesus nga kon padayon sia nga mangin matutom, mabindikar niya ang ngalan ni Jehova. Nalipay man sia nga hunahunaon ang tion nga makaupod na niya liwat ang iya Amay, pati na ang tion nga makaupod niya ang iya hinaplas nga mga utod sa Ginharian sa langit. Sing kaanggid, ang aton paglaum nga mabuhi sing wala sing katapusan sa bag-ong kalibutan sang Dios makabulig man sa aton nga mabatas ang bisan ano nga kabudlayan sa kalibutan ni Satanas.

16. Paano ang paglaum nakabulig sa isa ka sister nga makabatas, kag ano ang natun-an mo sa iya ginsiling?

¹⁶ Binagbinaga kon paano nakabulig sa isa ka sister sa Russia nga si Alla ang paglaum nga mabuhi sing wala sing katapusan. Sang gin-aresto kag ginpriso ang iya bana, amo ini ang ginsiling ni Alla: “Ang pagpangamuyo kag pagpamalandong sa aton paglaum sa palaabuton nakabulig sa akon para indi maluyahan gid. Nabal-an ko nga matapos gid ini nga pagtilaw. Magadaug si Jehova kag amo man kita.”

17. Paano naton mapakita nga nagapasalamat kita sa paglaum nga ginhatag ni Jehova? (Tan-awa man ang piktyur.)

¹⁷ Ang puede mo himuon. Hatagi sing tion ang pagpamalandong sa matahom nga palaabuton nga ginpromisa ni Jehova. Imadyina nga ara ka sa bag-ong kalibutan sang Dios kag ang mga pagpakamaayo nga mabaton naton didto. Kon himuon mo ini, marealisar mo nga ‘umalagi lang kag mamag-an’ ang imo mga problema subong. (2 Cor. 4:17) Isugid man sa iban ang parte sa mga promisa sang Dios sa bug-os mo nga masarangan. Mabudlay gid para sa ila nga atubangon ang mga problema sa kalibutan ni Satanas, ilabi na nga wala sila kabalo sang mga promisa sang Dios sa palaabuton. Bisan pa diutay lang nga impormasyon ang masugid mo sa ila, posible mapalig-on sila nga magtuon parte kay Jehova kag sa iya mga promisa.

18. Ngaa masaligan naton ang mga promisa ni Jehova?

¹⁸ Pagkatapos mabatas ni Job ang madamo nga pagtilaw, ginsilingan niya si Jehova: “Nahibaluan ko na karon nga masarangan mo himuon ang tanan nga butang, kag wala sing butang nga ginahunahuna mo nga indi mo mahimo.” (Job 42:2) Natun-an ni Job nga wala sing makapugong kay Jehova sa pagtuman Niya sa Iya mga promisa. Mapabakod kita sini nga kamatuoran samtang nagabatas kita. Binagbinaga ini nga ilustrasyon: Ibutang ta nga madugay na nga may balatian ang isa ka babayi. Madamo na sia sing ginkadtuan nga doktor, pero wala sing may nakapaayo sa iya. Bangod sini, naluyahan gid sia. Sang ulihi, nakakita sia sang isa ka eksperiensiado kag masaligan nga doktor. Ginpaathag sa iya sang doktor kon ano ang iya balatian kag kon paano niya sia bulngon. Naghaganhagan dayon ang iya kabalaka bisan pa kabalo sia nga amat-amat lang ang iya pag-ayo. Mas mahapos na sa iya nga batason ang iya balatian bangod sa paglaum nga magaayo sia sa ulihi. Sing kaanggid, padayon kita nga nagabatas bangod kabalo kita nga matuman gid ang ginpromisa sang Dios nga Paraiso.

19. Ano ang dapat naton himuon para makabatas kita?

¹⁹ Natun-an naton nga ginabuligan kita ni Jehova nga makabatas paagi sa pangamuyo, sa iya Pulong, sa aton mga kauturan, kag sa aton paglaum. Kon gamiton naton ini nga mga aman, buligan kita ni Jehova ano man ang aton problema. Gani, padayon kita nga makabatas asta sa tion nga laglagon na ang kalibutan ni Satanas kag dulaon na ang pag-antos.​—Fil. 4:13.