Indi Magduhaduha nga Palangga Ka ni Jehova

1. Ngaa nagdesisyon ka nga idedikar ang imo kaugalingon kay Jehova? (Tan-awa man ang piktyur.)

NADUMDUMAN mo pa bala sang gindedikar mo ang imo kaugalingon kay Jehova? Ginhimo mo ini nga desisyon bangod nakilala mo sia kag ginpalangga. Nagpromisa ka nga unahon mo ang pag-alagad sa iya kag padayon mo sia nga higugmaon sa bug-os mo nga tagipusuon, kalag, hunahuna, kag kusog. (Mar. 12:30) Sugod sadto, mas ginpalangga mo pa gid sia. Ti, ano ang imo isabat kon may mamangkot sa imo, “Palangga mo gid bala si Jehova?” Siguro masabat ka gid dayon, “Sia ang pinakapalangga ko sa tanan.”

2-3. Ano ang gusto ni Jehova nga indi naton pagduhaduhaan, kag ano ang binagbinagon naton sa sini nga artikulo? (Jeremias 31:3)

² Ano abi kon may mamangkot sa imo, “Sigurado ka nga palangga ka ni Jehova?” Indi ka bala makasabat dayon kay pamatyag mo indi ka nagakabagay nga palanggaon ni Jehova? Ang isa ka sister nga wala nakabatyag nga may nagapalangga sa iya sang bata pa sia nagsiling: “Sigurado ako nga palangga ko gid si Jehova. Pero nagaduhaduha ako pirme kon bala palangga gid man ako ni Jehova.” Ti, ano ang makabulig sa imo para mabal-an mo nga palangga ka ni Jehova?

³ Gusto ni Jehova nga mangin kumbinsido ka nga palangga ka niya. (Basaha ang Jeremias 31:3.) Ang matuod, si Jehova ang nagbuyok sa imo para magtuon ka parte sa iya kag mangin abyan niya. Kag sang gindedikar mo ang imo kaugalingon sa iya kag nagpabawtismo, ginhatagan ka niya sang isa ka importante nga regalo. Amo ini ang iya mainunungon nga gugma. Buot silingon, palangga ka gid niya kag indi ka gid niya pagbayaan. Bangod sini nga gugma, ginatamod ka ni Jehova kag ang tanan niya nga matutom nga alagad bilang iya “hamili nga ginapanag-iyahan.” (Mal. 3:17, footnote) Gusto ni Jehova nga mangin kumbinsido ka nga palangga ka niya, pareho sa ginbatyag ni apostol Pablo. Si Pablo nagsiling: “Kay kumbinsido ako nga bisan ang kamatayon ukon ang kabuhi ukon ang mga anghel ukon ang mga panguluhan ukon ang mga butang karon ukon ang mga butang nga maabot ukon ang mga kagamhanan ukon ang kataason ukon ang kadalumon ukon ang iban pa nga tinuga indi makapugong nga mabaton naton ang gugma sang Dios.” (Roma 8:38, 39) Sa sini nga artikulo, binagbinagon naton kon ngaa indi kita dapat magduhaduha nga palangga kita ni Jehova kag kon ano ang makabulig sa aton para mas makumbinsi pa gid kita sa sini.

NGAA INDI KITA DAPAT MAGDUHADUHA NGA PALANGGA KITA NI JEHOVA?

4. Paano naton mabatuan ang isa sa tuso nga mga pahito ni Satanas?

⁴ Kon wala kita nagaduhaduha nga palangga kita ni Jehova, mabatuan naton ang isa sa “tuso nga mga pahito” ni Satanas. (Efe. 6:11) Himuon gid ni Satanas ang tanan para pauntaton kita sa pag-alagad kay Jehova. Ang isa sa iya mga pahito amo ang pagpalapta sang kabutigan nga indi kita palangga ni Jehova. Dumduma nga nagahulat lang si Satanas sing tion nga maluya kita para sulayon kita. Halimbawa, posible nagaluya ang aton buot bangod sa mga eksperiensia naton sang una, sa mga kabudlayan naton subong, ukon sa mga kabalaka naton sa palaabuton. (Hulu. 24:10) Si Satanas daw pareho sa leon nga nagapangita sing tulukbon. Ginapili gid sang leon kon sin-o ang maluya. Ginasalakay man kita ni Satanas kon maluya kita para mag-untat kita sa pag-alagad kay Jehova. Pero kon kumbinsido gid kita nga palangga kita ni Jehova, masarangan naton nga “magtindog” kontra kay Satanas kag sa iya mga pahito.​—1 Ped. 5:8, 9; Sant. 4:7.

5. Ngaa importante nga mabatyagan naton nga palangga kita kag ginapabaloran ni Jehova?

⁵ Kon wala kita nagaduhaduha nga palangga kita ni Jehova, mangin suod pa gid kita sa iya. Ngaa masiling naton ina? Sang gintuga kita ni Jehova, nagakinahanglan kita sang pagpalangga kag kinahanglan man naton magpakita sang pagpalangga. Kon pakitaan kita sang pagpalangga sang isa ka tawo, mapalig-on kita nga palanggaon man sia. Gani kon mas mabatyagan naton nga palangga kita kag ginapabaloran ni Jehova, mas palanggaon man naton sia. (1 Juan 4:19) Kag kon mas ginapalangga naton si Jehova, mas palanggaon pa gid niya kita. Ang Biblia nagasiling: “Magpalapit kamo sa Dios, kag magapalapit sia sa inyo.” (Sant. 4:8) Pero ano ang puede naton himuon para makumbinsi pa gid kita nga palangga kita ni Jehova?

ANO ANG HIMUON NATON PARA MAKUMBINSI KITA NGA PALANGGA GID KITA NI JEHOVA?

6. Kon nagaduhaduha ka kon bala palangga ka ni Jehova, ano ang puede mo ipangamuyo?

⁶ Ipangamuyo pirme kay Jehova nga buligan ka niya nga mangin kumbinsido nga palangga ka niya. (Luc. 18:1; Roma 12:12) Kada adlaw, pangabaya si Jehova sing madamo nga beses nga buligan ka niya nga mahibaluan kon ano ang pagtamod niya sa imo. Kon kaisa, negatibo ang pagtan-aw mo sa imo kaugalingon nga pamatyag mo indi ka nagakabagay nga palanggaon ni Jehova. Pero dumduma nga si Jehova labaw pa sa imo tagipusuon. (1 Juan 3:19, 20) Nakita niya ang imo maayo nga mga kinaiya nga indi mo matalupangdan sa imo kaugalingon. (1 Sam. 16:7; 2 Cron. 6:30) Gani “ipautwas” sa iya ang imo ginabatyag, kag mangayo sa iya sing bulig nga makumbinsi ka pa gid nga palangga ka niya. (Sal. 62:8) Pagkatapos mo pangamuyo, importante man nga himuon mo ang masunod nga mga panugda.

7-8. Paano ang Salmo nagapasalig sa aton nga palangga kita ni Jehova?

⁷ Saligi ang mga ginasiling ni Jehova. Gingiyahan ni Jehova ang mga manunulat sang Biblia, gani makasalig kita nga matuod gid ang ila ginsulat parte sa iya. Binagbinaga ang ginsulat ni David parte sa pag-ulikid ni Jehova sa aton. Sia nagsiling: “Malapit si Jehova sa mga nagaantos; ginaluwas niya ang mga naluyahan sing buot.” (Sal. 34:18, footnote) Kon naluyahan ka, nagabatyag ka nga wala sing makaintiende kag makabulig sa imo. Pero nagpromisa si Jehova nga malapit sia sa imo kon nagaantos ka. Sa isa pa ka salmo, si David nagsulat: “Isulod ang akon mga luha sa imo panit nga suludlan.” (Sal. 56:8) Nakita ni Jehova ang imo pag-antos kag nagaulikid sia sa imo. Kon nagalakat ang isa ka tawo sa desyerto, importante gid katama sa iya ang tagsa ka tulo sang tubig nga ara sa panit nga suludlan. Sing kaanggid, importante man kay Jehova ang imo tagsa ka luha kon makaeksperiensia ka sing kabudlayan. Ang Salmo 139:3 nagasiling: “Nahibaluan mo [Jehova] ang tanan ko nga ginahimo.” Makita ni Jehova ang tanan mo nga ginahimo, pero nagapokus sia sa maayo nga ginahimo mo. (Heb. 6:10) Ngaa? Bangod ginapabaloran niya ang tanan mo nga ginahimo para malipay sia.a

⁸ Paagi sini nga mga teksto sa Biblia, daw pareho lang nga nagasiling si Jehova: “Gusto ko mabal-an mo nga palangga ko gid ikaw kag nagaulikid ako sa imo.” Pero sa ginsambit naton kaina, ginapalapta ni Satanas ang kabutigan nga indi kita palangga ni Jehova. Gani kon nagaduhaduha ka kon kaisa kon bala palangga ka ni Jehova, pamangkuta ang imo kaugalingon, ‘Sin-o ang patihan ko, ang “amay sang kabutigan” ukon “ang Dios sang kamatuoran”?’—Juan 8:44; Sal. 31:5.

9. Ano ang ginpromisa ni Jehova sa mga nagapalangga sa iya? (Exodo 20:5, 6)

⁹ Pamalandungi kon ano ang ginabatyag ni Jehova sa mga nagapalangga sa iya. Binagbinaga ang ginsiling ni Jehova kay Moises kag sa mga Israelinhon. (Basaha ang Exodo 20:5, 6.) Nagpromisa si Jehova nga padayon niya nga pakitaan sing mainunungon nga gugma ang mga nagapalangga sa iya. Mainunungon si Jehova, gani makasalig kita nga balusan gid niya ang pagpalangga nga ginapakita sa iya sang iya mga alagad. (Neh. 1:5) Gani kon nagaduhaduha ka kon kaisa kon bala palangga ka ni Jehova, pamangkuta ang imo kaugalingon, ‘Palangga ko bala si Jehova?’ Dayon pamensara ini: Kon palangga mo sia kag ginahimo mo ang tanan para malipay sia, makasalig ka nga palangga ka niya. (Dan. 9:4; 1 Cor. 8:3) Buot silingon, kon sigurado ka nga palangga mo si Jehova, sigurado man nga palangga ka niya kag indi ka niya pagbayaan.

10-11. Ano ang gusto ni Jehova nga pagtamod mo sa gawad? (Galacia 2:20)

¹⁰ Pamalandungi ang gawad. Ang halad-gawad ni Jesucristo amo ang pinakahamili nga regalo ni Jehova para sa mga tawo. (Juan 3:16) Pero ini bala nga regalo para man sa imo? Huo. Binagbinaga si apostol Pablo. Antes sia nangin Cristiano, nakahimo sia sing serioso nga mga sala kag padayon niya nga ginapakigbatuan ang iya mga kaluyahon. (Roma 7:24, 25; 1 Tim. 1:12-14) Pero gintamod niya ang gawad bilang isa ka regalo ni Jehova para sa iya. (Basaha ang Galacia 2:20.) Dumduma nga gingiyahan ni Jehova si Pablo nga isulat ini. Kag ang tanan nga nasulat sa Biblia ginpasulat ni Jehova para tudluan kita. (Roma 15:4) Ginapakita sang ginsiling ni Pablo kon ano ang gusto ni Jehova nga pagtamod mo sa gawad. Dapat tamdon mo ini bilang isa ka regalo ni Jehova para sa imo. Kon amo sini ang imo pagtamod sa gawad, mas makumbinsi ka nga palangga ka ni Jehova.

¹¹ Nagapasalamat gid kita kay Jehova kay ginpadala niya si Jesus diri sa duta para ihatag ang iya kabuhi para sa aton. Pero ang isa pa ka rason kon ngaa nagkadto si Jesus sa duta amo ang pagsugid sa iban sang kamatuoran parte sa Dios. (Juan 18:37) Kag nalakip sa sini ang kamatuoran nga palangga ni Jehova ang iya mga anak.

GINTUDLUAN KITA NI JESUS NGA PALANGGA KITA NI JEHOVA

12. Ngaa masaligan naton ang ginsiling ni Jesus parte kay Jehova?

¹² Sang ari si Jesus sa duta, ginsugiran niya ang mga tawo parte kay Jehova. (Luc. 10:22) Masaligan gid naton ang iya mga ginsiling. Kay man, nakaupod niya si Jehova sa langit sa malawig gid nga tion antes sia nagkadto sa duta. (Col. 1:15) Nakita kag naeksperiensiahan mismo ni Jesus kon daw ano ka palangga ni Jehova ang Iya matutom nga mga anak. Paano kita ginabuligan ni Jesus nga indi magduhaduha nga palangga kita ni Jehova?

13. Ano ang gusto ni Jesus nga pagtamod naton kay Jehova?

¹³ Gusto ni Jesus nga ilugon naton ang iya pagtamod kay Jehova. Sa mga Ebanghelyo, gintawag ni Jesus si Jehova nga “Amay” sing sobra 160 ka beses. Sang nagpakig-istorya sia sa iya mga sumulunod, gingamit niya ang mga tinaga nga “inyo Amay” ukon “inyo langitnon nga Amay.” (Mat. 5:16; 6:26) Sang wala pa si Jesus sa duta, gintawag si Jehova sang iya matutom nga mga alagad nga ‘Labing Gamhanan,’ ‘Labing Mataas,’ ‘Daku nga Manunuga,’ kag iban pa nga titulo nga pareho sini. Pero sa masami, gintawag ni Jesus si Jehova nga aton ‘Amay.’ Ginapakita sini nga gusto ni Jesus nga tamdon naton si Jehova nga aton Amay nga nagapalangga gid sa aton bilang Iya mga anak. Binagbinagon naton ang duha ka halimbawa nga gintawag ni Jesus si Jehova nga “Amay.”

14. Paano ginpakita ni Jesus nga importante gid sa aton Amay sa langit ang kada isa sa aton? (Mateo 10:29-31) (Tan-awa man ang piktyur.)

¹⁴ Una, binagbinaga ang ginsiling ni Jesus sa Mateo 10:29-31. (Basaha.) Ang maya gamay nga mga pispis nga indi makapalangga ukon makasimba kay Jehova. Pero ang isa ka maya importante sa iya kay nahibaluan niya kon mahulog ini sa duta. Gani sigurado gid nga mas importante kay Jehova ang iya matutom nga mga alagad kay ginapalangga kag ginasimba nila sia. Nagsiling man si Jesus nga naisip sang aton Amay ang mga buhok sa aton ulo. Kon nahibaluan ni Jehova ining gamay nga detalye parte sa aton, makasalig kita nga nagaulikid gid sia sa aton. Gani gusto ipakita ni Jesus nga importante gid sa aton Amay sa langit ang kada isa sa aton.

15. Ano ang ginasugid sa imo sang ginsiling ni Jesus sa Juan 6:44 parte sa imo Amay sa langit?

¹⁵ Binagbinaga ang ikaduha nga halimbawa nga gingamit ni Jesus ang tinaga nga “Amay.” (Basaha ang Juan 6:44.) Ang imo Amay sa langit ang nagbuyok sa imo sa kamatuoran. Ngaa ginbuyok ka niya? Kay nakita niya nga may ara ka sing husto nga panimuot. (Binu. 13:48) Sang ginhambal ni Jesus ang narekord sa Juan 6:44, posible nga ginapatuhuyan niya ang ginsiling ni Jehova sa Jeremias 31:3. Si Jehova nagsiling sa iya katawhan: “Bangod sang akon mainunungon nga gugma, ginpapalapit ko ikaw sa akon [ukon, padayon ako nga nagpakita sing mainunungon nga gugma sa imo].” (Jer. 31:3; footnote; ipaanggid ang Oseas 11:4.) Buot silingon, pirme gid ginatan-aw sang aton mahigugmaon nga Amay sa langit ang aton maayo nga mga kinaiya nga indi gani naton matalupangdan.

16. (a) Ano ang gintudlo ni Jesus sa aton, kag ngaa dapat naton ini patihan? (b) Ano ang puede mo himuon para makumbinsi ka nga si Jehova amo ang Amay nga ginakinahanglan mo? (Tan-awa ang kahon nga “Ang Amay nga Ginakinahanglan Naton Tanan.”)

¹⁶ Gintudlo ni Jesus nga si Jehova ang aton Amay. Daw pareho lang nga ginasilingan ka niya: “Si Jehova indi lang akon Amay, kundi sia man ang imo Amay. Kag makasalig ka nga palangga ka ni Jehova kag nagaulikid gid sia sa imo.” Gani kon nagaduhaduha ka kon bala palangga ka ni Jehova, pamangkuta ang imo kaugalingon, ‘Indi bala nga dapat patihan ko ang ginsiling sang Anak nga nakakilala gid sa aton Amay kag pirme gid nagasugid sang matuod?’—1 Ped. 2:22.

PADAYON NGA MANGIN KUMBINSIDO NGA PALANGGA KA NI JEHOVA

17. Ngaa dapat padayon kita nga mangin kumbinsido nga palangga kita ni Jehova?

¹⁷ Dapat himuon gid naton ang tanan para padayon kita nga mangin kumbinsido nga palangga kita ni Jehova. Sa ginsambit na kaina, tinguhaan gid ni Satanas nga pauntaton kita sa pag-alagad kay Jehova. Gusto niya nga paluyahon kita. Gani padayon sia nga mangita sing paagi para magduhaduha kita nga palangga kita sang Dios. Indi gid kita dapat magpati sa kabutigan ni Satanas.​—Job 27:5.

18. Paano ka mangin kumbinsido pa gid nga palangga ka ni Jehova?

¹⁸ Para mangin kumbinsido ka pa gid nga palangga ka ni Jehova, padayon nga ipangamuyo nga buligan ka niya nga mailog mo ang pagtamod niya sa imo. Pamalandungi ang mga teksto sa Biblia nga nagapakita nga nagaulikid gid si Jehova sa mga nagapalangga sa iya. Pamensara nga ginapalangga ni Jehova ang mga nagapalangga sa iya. Indi pagkalimti nga ginhatag ni Jehova ang iya Anak bilang isa ka regalo para sa imo. Kag indi pagduhaduhai ang pasalig ni Jesus nga si Jehova amo ang imo Amay sa langit. Gani kon may mamangkot sa imo: “Sigurado ka nga palangga ka ni Jehova?” makasabat ka gid: “Huo, palangga niya ako. Kag kada adlaw, himuon ko gid ang akon masarangan para ipakita nga palangga ko sia.”