Ginbuligan Kami ni Jehova nga Mangin Malipayon sa Amon mga Asaynment

Nag-eskwela ang mag-asawa nga Kassholm sa Gilead School sang 1979. Sa sulod sang madamo nga tinuig, gin-asayn sila sa Iran, Mauritius, Myanmar, Tanzania, Uganda, kag Zaire. Sa Gilead, ginlaygayan sila sang ila instruktor nga si Jack Redford nga nakabulig sa ila kada makabaton sila sang bag-o nga asaynment. Interbyuhon naton sila.

Paano ninyo natun-an ang kamatuoran?

Mats: Nagaistar si Tatay sa Poland sa tion sang Bug-os Kalibutan nga Inaway II, kag nakita niya nga hipokrito katama ang Katoliko nga relihion. Pero, pirme niya ginasiling, “Sigurado ako nga may matuod gid nga relihion.” Sang ulihi, narealisar ko nga husto ang iya ginsiling. Nagbakal ako sang madamo nga secondhand nga libro. Ang isa sa sini amo ang asul nga libro nga Ang Kamatuoran nga Nagadul-ong sa Kabuhi nga Dayon. Interesado gid ako sa tig-ulo sini, gani ginbasa ko ang bilog nga libro sa sina mismo nga gab-i. Pagkaaga, nakumbinsi ako nga amo ini ang kamatuoran.

Sugod sang Abril 1972, ginbasa ko ang madamo pa nga publikasyon sang mga Saksi ni Jehova kag nasabat ang akon mga pamangkot parte sa Biblia. Daw pareho ako sa negosyante sa ilustrasyon ni Jesus. Sang makita niya ang isa ka malahalon nga perlas, ginbaligya niya ang tanan niya nga pagkabutang para mabakal ini. (Mat. 13:45, 46) Daw pareho man sa sini ang ginhimo ko. Kay man, wala na ako mag-eskwela sa unibersidad para mangin isa kuntani ka doktor. Sa baylo, nagdesisyon ako nga mag-alagad kay Jehova. Nabawtismuhan ako sang Disiembre 10, 1972.

Sa sulod sang isa ka tuig, nagtuon man sang Biblia ang akon mga ginikanan kag ang akon manghod nga lalaki kag nabawtismuhan sila. Sang Hulyo 1973, nagpayunir ako. May isa ka payunir sa amon kongregasyon nga si Ann-Catrin. Guapa sia, mapisan, kag matutom. Naluyag kami sa isa kag isa, kag nagpakasal kami sang 1975. Dayon nag-istar kami sa sulod sang apat ka tuig sa matahom nga banwa sang Strömsund sa Sweden. Madamo gid sang interesado magtuon sang Biblia didto.

Ann-Catrin: Natun-an ni Tatay ang kamatuoran sang nagaeskwela sia sa unibersidad sa Stockholm. Tatlo ka bulan pa lang ako sadto, pero ginadala niya ako sa mga miting kag sa pagbantala. Wala nanamian sa sini si Nanay, gani gintinguhaan niya nga pamatud-an nga sala ang ginatudlo sang mga Saksi. Pero indi niya ini mapamatud-an, gani nagpabawtismo sia sang ulihi. Ginbawtismuhan man ako sang 13 anyos ako. Kag sang nag-16 anyos ako, nagpayunir ako. Pagkatapos ko mag-alagad sa Umeå nga nagakinahanglan sang dugang nga manugbantala, nangin espesyal payunir ako.

Pagkatapos namon magpakasal ni Mats, madamo kami sing nabuligan nga matun-an ang kamatuoran. Ang isa sa ila amo ang tin-edyer nga babayi nga si Maivor. Ginsakripisyo niya ang iya karera sa sports para maalagad niya si Jehova. Sang ulihi, nangin partner sia sang akon manghod nga babayi sa pagpayunir. Nag-eskwela sila sa Gilead sang 1984, kag nagaalagad sila sa Ecuador bilang mga misyonero.

Ano ang nakabulig sa inyo nga maka-adjust kag mangin malipayon sa inyo mga asaynment?

Mats: Pila ka beses nga nagbag-o ang amon asaynment, gani kinahanglan namon magsaylo. Daw pareho kami sa tanom nga gingabot kag gintanom liwat sa lain nga lugar. Ang isa nga nakabulig sa amon amo ang paghimo sang amon bug-os nga masarangan nga ilugon si Jesus, ilabi na ang iya pagkamapainubuson. (Col. 2:6, 7) Halimbawa, ginpanikasugan namon nga mag-adjust sa pamaagi sang mga kauturan imbes nga sila ang mag-adjust sa amon. Gintun-an man namon ang ila kultura kag kon ano ang nakaimpluwensia sa ila panghunahuna. Bangod gin-ilog namon si Jesus, pamatyag namon daw ‘gintanom kami sa higad sang sapa.’ (Sal. 1:2, 3) Gani, naka-adjust kami kag nangin malipayon bisan diin man kami gin-asayn.

Ann-Catrin: Kon gingabot ang isa ka kahoy kag gintanom ini sa lain nga lugar, kinahanglan sini ang silak sang adlaw para padayon ini nga magtubo. Daw pareho kami sa sini nga kahoy, kag si Jehova ang nangin “adlaw” para sa amon. (Sal. 84:11) Kay man, gin-amanan niya kami sang mapinalanggaon nga mga kauturan. Halimbawa, grabe gid ka maabiabihon ang mga kauturan sa amon gamay nga kongregasyon sa Tehran, Iran. Daw pareho gid sila sa maabiabihon nga mga karakter sa Biblia. Nanamian gid kami sa Iran. Pero sang Hulyo 1980, gindumilian ang mga Saksi ni Jehova sa sina nga pungsod. Dayon ginhatagan kami sing 48 ka oras para maghalin. Gani, gin-asayn kami sa Zaire (Congo subong) sa Africa.

Sang nabal-an ko nga gin-asayn kami sa Africa, naghibi ako. Ginkulbaan gid ako kay madamo kuno didto sang man-ug kag mga balatian. Pero ginsilingan kami sang amon duha ka suod nga abyan nga nakaalagad didto sing madamo nga tinuig: “Indi kamo mahadlok. Sigurado kami nga manamian gid kamo sa Africa.” Husto gid sila. Mapinalanggaon gid ang mga kauturan didto. Ang matuod, pagligad sang anom ka tuig, sang kinahanglan namon maghalin sa Zaire bangod gindumilian ang aton hilikuton didto, nakayuhum ako kay ginpangamuyo ko na kay Jehova nga kuntani indi lang kami pagpahalinon sa Africa.

Ano nga mga pagpakamaayo ang inyo nabaton sa sulod sang madamo nga tinuig?

Mats: Nangin suod namon nga abyan ang mga misyonero halin sa lainlain nga lugar. Sa iban namon nga asaynment, may mga tion nga nakalab-ot sa 20 ang Bible study sang kada isa sa amon. Nalipay gid kami sa sini. Indi ko man malipatan ang gugma kag pagkamaabiabihon sang mga kauturan sa Africa. Sa kada tion nga magduaw kami sa mga kongregasyon sa Tanzania, gina-park namon ang amon salakyan sa tupad sang balay sang mga kauturan. Sa salakyan kami nagatulog, kag ginaamanan nila kami sang amon mga kinahanglanon. Bisan pigado sila, ‘labaw pa sa ila masarangan’ ang ila ginahatag sa amon. (2 Cor. 8:3) Kada adlaw, nagapain kami sang tion ni Ann-Catrin para istoryahan ang mga natabo sa sina nga adlaw kag para pasalamatan si Jehova sa iya bulig. Nanamian gid kami sa kada tion nga ginahimo namon ini.

Ann-Catrin: Sa akon bahin, nalipay gid ’ko kay nakilala ko ang mga kauturan sa lainlain nga lugar. Nakatuon kami sang bag-o nga mga lenguahe pareho sang Farsi, French, Luganda, kag Swahili. Naeksperiensiahan man namon ang lainlain nga kultura. Nakabulig kami sa paghanas sa bag-uhan nga mga kauturan, kag nakakita kami sang matuod nga mga abyan. Nalipay gid kami nga nakaupod namon sila sa pagsimba kay Jehova “sing nahiusa.”​—Sof. 3:9.

Madamo man kami sang nakita nga matahom nga mga tinuga ni Jehova. Sa kada tion nga may bag-o kami nga asaynment, mabatyagan gid namon nga ginagiyahan kami ni Jehova. Gintudluan niya kami sang mga butang nga indi gid kuntani namon matun-an kon kami lang.

Ano nga mga kabudlayan ang inyo naeksperiensiahan, kag ano ang nakabulig sa inyo nga mabatas ini?

Mats: Nagbalatian kami sing pila ka beses, lakip na sing malaria. Kag pila ka beses nga gin-operahan si Ann-Catrin. Nabalaka man kami sa amon may edad na nga mga ginikanan. Gani, nagapasalamat gid kami sa amon mga utod nga nagaatipan sa ila. Ginhimo nila ini sing mapinasensiahon, may kalipay, kag pagpalangga. (1 Tim. 5:4) Bisan malayo kami sa amon mga ginikanan, ginabuligan namon sila suno sa amon masarangan. Pero, may mga tion gid nga nasubuan kami kay gusto kuntani namon nga mas makabulig pa gid sa ila.

Ann-Catrin: Sang 1983, sang nagaalagad kami sa Zaire, nagmasakit ako sing kolera. Ginsilingan si Mats sang doktor, “Dal-a sia sa ospital sa iban nga pungsod subong gid dayon!” Pagkasunod nga adlaw, ang eroplano lang nga para sa mga cargo ang may biyahe pakadto sa Sweden. Gani, amo to ang ginsakyan namon.

Mats: Grabe gid amon hibi kay abi namon indi na kami makapadayon sa pag-alagad bilang mga misyonero. Nagsiling ang doktor nga posible indi na mag-ayo si Ann-Catrin, pero nag-ayo sia. Kag pagligad sang isa ka tuig, nakabalik kami sa Zaire. Gin-asayn kami sa gamay nga Swahili nga kongregasyon sa Lubumbashi.

Ann-Catrin: Sang ara kami sa Lubumbashi, nahulugan ako. Bisan pa wala sa amon plano nga magbata, grabe gid ang amon kasubo sa natabo. Pero sadto nga tion, ginhatagan kami ni Jehova sang regalo nga wala gid namon ginpaabot. Nakakita kami sang madamo nga Bible study. Wala pa isa ka tuig, ang 35 ka manugbantala sa amon kongregasyon nangin 70. Sang primero, 40 lang ang nagatambong sa amon miting. Pero naglab-ot ini sa 220. Masako gid kami sa amon pagbantala, kag ginpakamaayo ni Jehova ang amon mga panikasog. Bangod sini, wala na ako masyado nasubuan. Pero, pirme gihapon namon ginadumdom kag ginaistoryahan ang parte sa amon bata. Excited gid kami sa himuon ni Jehova sa ulihi para madula ang kasubo nga amon ginabatyag.

Mats: Sang ulihi, nabatyagan ni Ann-Catrin nga daw pirme lang sia ginakapoy. Sadto man nga tion, nabal-an nga may ara ako stage-four nga colon cancer kag kinahanglan ako operahan. Pero subong, medyo OK na ako. Kag padayon nga ginahimo ni Ann-Catrin ang iya bug-os nga masarangan sa pag-alagad kay Jehova.

Narealisar namon nga indi lang kami ang may ginabatas nga mga kabudlayan. Pagkatapos sang grabe nga pagpamatay sa isa ka tribo sa Rwanda sang 1994, ginbisitahan namon ang madamo nga kauturan sa mga refugee camp. Sang nakita namon ang ila pagtuo, pagbatas, kag pagkamaabiabihon bisan pa grabe kabudlay sang ila sitwasyon, nakumbinsi kami nga may gahom gid si Jehova sa pagbulig sa iya katawhan sa bisan ano nga kabudlayan.​—Sal. 55:22.

Ann-Catrin: Sang 2007, nakaeksperiensia man kami sang isa pa ka kabudlayan. Nagtambong kami sadto sa dedikasyon sang branch sa Uganda. Pagkatapos sang programa, nagbiyahe kami upod ang mga 25 ka misyonero kag Bethelite pakadto sa Nairobi, Kenya. Pero antes pa kami makaabot sa Kenya, may isa ka trak nga nagasugata sa amon ang gulpi lang nagbunggo sa amon. Napatay gid dayon ang drayber kag ang lima namon ka abyan. Sang ulihi, napatay man ang isa ka sister sa ospital. Nahidlaw na gid kami sa ila.​—Job 14:13-15.

May mga pilas man ako, pero indi man ini grabe. Pero nalakip kami ni Mats sa pila ka pasahero nga na-trauma sa natabo. May mga tion kon gab-i nga nagabugtaw ako bangod sa nerbios. Pamatyag ko daw ginaatake ako sa tagipusuon. Grabe ang akon kulba kon matabo ini. Nakabulig sa amon nga mangin kalmado ang hanuot nga pagpangamuyo kay Jehova kag ang pagpamalandong sa pila namon ka paborito nga teksto. Nagpadoktor man kami, kag nakabulig gid ini sa amon. Subong, medyo OK na kami. Kag ginapangamuyo namon kay Jehova nga buligan niya kami para mapaumpawan man namon ang mga may trauma.

Nagsiling kamo nga nabatas ninyo ang mabudlay nga mga sitwasyon bangod ginauyatan kamo ni Jehova nga daw pareho sa pag-uyat sa “itlog.” Ano ang buot ninyo silingon sini?

Mats: May hulubaton sa Swahili nga ang buot silingon, “Gin-uyatan kami nga daw pareho sa pag-uyat sa itlog nga wala pa maluto.” Kon may ginauyatan kita nga itlog, nagahalong gid kita para indi ini mabuka. Daw pareho gid sa sina si Jehova. Nabatyagan gid namon ang iya kaayo sa tanan namon nga asaynment. Wala gid kami ginkulang sa amon kinahanglanon. May mga tion pa gani nga sobra pa sa amon kinahanglanon ang amon nabaton. Paagi sa empatiya nga ginapakita sa amon sang Nagadumala nga Hubon, nabatyagan namon ang gugma kag bulig ni Jehova.

Ann-Catrin: May nadumduman ako nga isa ka eksperiensia kon paano kami ginbuligan ni Jehova. Isa ka adlaw, may nagpabalo sa akon nga ara si Tatay sa ospital sa Sweden kag grabe ang iya sitwasyon. Sadto nga tion, bag-o lang nag-ayo si Mats sa malaria. Kulang man ang amon kuarta para sa tiket sa eroplano, gani napensaran namon nga maayo guro nga ibaligya namon ang amon salakyan. Sang nabalitaan sang isa ka mag-asawa ang amon sitwasyon, gintawgan nila kami kag nagsiling sila nga sila ang mabayad sang isa namon ka tiket. Dayon gintawgan man kami sang isa ka tigulang nga sister, kag nagsiling sia nga may natipon sia nga kuarta sa isa ka kahon nga may ngalan nga, “Kon may kinahanglan buligan.” Gani sa sulod lang sang pila ka minuto, ginbuligan kami ni Jehova nga makabakal sang tiket.​—Heb. 13:6.

Kon pamensaron ninyo ang inyo sobra 50 ka tuig nga pag-alagad sing bug-os tion, ano ang inyo natun-an?

Ann-Catrin: Natun-an ko nga nagabakod kita ‘kon magpakalinong kita kag magsalig’ kay Jehova. Kay man, sia ang nagapakig-away para sa aton. (Isa. 30:15; 2 Cron. 20:15, 17) Bangod ginhimo namon ang amon bug-os nga masarangan sa tanan namon nga asaynment, ginpakamaayo gid kami ni Jehova. Indi gid namon mabaton ini nga mga pagpakamaayo kon nagpokus kami sa lain nga hilikuton.

Mats: Ang panguna nga leksion nga natun-an ko amo nga dapat ako magsalig kay Jehova sa tanan nga sitwasyon kag maghulat kon paano niya ako buligan. (Sal. 37:5) Gintuman gid niya ang iya promisa nga buligan niya ako. Subong, nagaalagad kami sa Bethel sa Myanmar. Kag padayon gid kami nga ginabuligan ni Jehova.

Ginapalig-on namon ang mga pamatan-on nga dugangan nila ang ila ginahimo sa pag-alagad kay Jehova para mabatyagan man nila ang mainunungon nga gugma nga ginpakita sa amon ni Jehova. Kumbinsido kami nga kon magsalig sila kay Jehova, maka-adjust sila kag mangin malipayon bisan diin man sila iasayn.