Mangin Malipayon Ka Gihapon Bisan Pa Tigulang Ka Na

1-2. Ano ang pagtan-aw ni Jehova sa iya matutom nga mga alagad nga tigulang na? (Salmo 92:12-14; tan-awa man ang piktyur.)

LAINLAIN ang reaksion sang mga tawo kon nagatigulang na sila. Halimbawa, sang nakita mo nga may uban ka na, ano ang ginhimo mo? Posible nga ginkuha mo ini dayon antes pa ini makita sang iban. Pero sang ulihi, narealisar mo nga bisan pa sundon mo ini kuha, nagadamo lang ini gihapon. Ginapakita sini nga halimbawa nga madamo nga tawo ang daw indi makabaton nga tigulang na sila.

² Pero, ano ang pagtan-aw sang aton Amay sa langit sa iya mga alagad nga tigulang na? (Hulu. 16:31) Ginkumparar niya sila sa nagapamunga nga mga kahoy. (Basaha ang Salmo 92:12-14.) Ngaa nagakaigo ini? Kay man, kon tigulang na ang isa ka kahoy, madamo ini sang dahon kag bulak. Ang isa ka halimbawa sa sini amo ang Japanese flowering cherry. Matahom gid ini nga kahoy, ilabi na kon sobra na isa ka libo ang edad sini. Sing kaanggid, matahom gid sa panulok ni Jehova ang iya matutom nga mga alagad nga tigulang na. Madugay na sila nga matutom nga nagaalagad kay Jehova, gani ginapabaloran gid niya ang ila dalayawon nga mga kinaiya pareho sang ila pagbatas kag pagkamainunungon.

3. Maghatag sing halimbawa sang mga tigulang nga gingamit ni Jehova para matuman ang iya katuyuan.

³ Bisan pa tigulang na ang isa ka alagad ni Jehova, may balor gihapon sia sa Iya.a Gingamit pa gani niya ang iya tigulang nga mga alagad para matuman ang iya katuyuan. Halimbawa, tigulang na si Sara sang ginhambalan sia ni Jehova nga mangin iloy sia sang gamhanan nga pungsod kag mangin katigulangan sia sang Mesias. (Gen. 17:15-19) Sa bahin ni Moises, tigulang na sia sang ginsugo sia ni Jehova nga pangunahan ang paggua sang mga Israelinhon sa Egipto. (Ex. 7:6, 7) Kag sa bahin ni apostol Juan, tigulang na sia sang gingamit sia ni Jehova para magsulat sang lima ka libro sa Biblia.

4. Suno sa Hulubaton 15:15, ano ang makabulig sa mga tigulang nga mabatas ang ila mga problema? (Tan-awa man ang piktyur.)

⁴ Madamo sang kabudlayan ang mga tigulang. Ang isa ka sister nagsiling, “Indi bala lahuglahog kon tigulang ka na.” Pero, ang kalipayb amo ang makabulig sa mga tigulang nga mabatas ang ila mga problema. (Basaha ang Hulubaton 15:15.) Sa sini nga artikulo, binagbinagon naton ang mga puede himuon sang mga tigulang para indi madula ang ila kalipay. Binagbinagon man naton kon paano mabuligan sang iban ang tigulang nga mga kauturan. Pero, binagbinagon anay naton kon ngaa mabudlay magpabilin nga malipayon kon nagatigulang na kita.

PAANO MAAPEKTUHAN ANG IMO KALIPAY KON NAGATIGULANG KA NA?

5. Ano ang posible nga rason kon ngaa naluyahan ang pila ka tigulang?

⁵ Ano ang posible nga rason kon ngaa naluyahan ka? Posible nasubuan ka bangod indi mo na mahimo ang masarangan mo himuon sang una. Posible ginadumdom mo ang tion nga bataon ka pa kag may maayo nga panglawas. (Man. 7:10) Halimbawa, ang isa ka sister nga si Ruby, nagsiling: “Nabudlayan na ’ko bisan magsuksok lang sang bayo kay nagapalanakit ang akon lawas kag indi ako masyado makahulag. Bisan sa pag-alsa lang sang akon tiil para magsuksok sang medyas, nabudlayan na ’ko. Nagapalanakit man ang akon mga kamot bangod sa arthritis, gani indi ko mahimo bisan ang simple lang nga mga obra.” Kag si Harold, nga nagaalagad sa Bethel, nagsiling: “Nagalalain ako kon kaisa kay indi ko na mahimo ang mga gusto ko himuon. Sang una, sagad ako sa mga sports. Kag ang pinakananamian ko gid amo ang baseball. Nagasiling ang iban, ‘Ihatag kay Harold ang bola kay sigurado madaug gid kita.’ Pero subong, pamatyag ko indi ko na masarangan bisan ang paghaboy lang sang bola.”

6. (a) Ano ang posible iban pa nga rason kon ngaa naluyahan ang pila ka tigulang? (b) Ano ang makabulig sa mga tigulang sa pagdesisyon kon bala madrayb pa sila ukon indi na? (Tan-awa sa sini nga isyu ang artikulo nga “Kinahanglan Ko Na Bala Mag-untat sa Pagdrayb?”)

⁶ Posible naluyahan ka bangod kinahanglan mo na ang bulig sang iban para mahimo mo ang pila ka obra, ilabi na kon kinahanglan mo ang bulig sang isa ka caregiver ukon kon kinahanglan mo mag-istar sa balay sang imo bata. Posible man nga naluyahan ka bangod indi mo na masarangan magdrayb kay maluya ka na kag indi ka na maayo makakita. Kon amo sini ang imo sitwasyon, sigurado nga nasubuan ka gid. Ano ang makabulig sa imo? Dumdumon naton nga ang aton balor kay Jehova wala nagadepende sa kon bala maatipan pa naton ang aton kaugalingon, kon bala nagaisahanon lang kita nga nagapangabuhi, ukon kon bala makadrayb pa kita. Kag makasalig kita nga naintiendihan ni Jehova ang aton ginabatyag. Kabalo si Jehova nga palangga gid naton sia kag ang aton mga kauturan, kag amo ini ang pinakaimportante sa iya.—1 Sam. 16:7.

7. Kon nasubuan ka bangod ginahunahuna mo ang posibilidad nga indi mo na maabtan ang Armageddon, ano ang makabulig sa imo?

⁷ Posible nasubuan ka bangod ginahunahuna mo ang posibilidad nga indi mo na maabtan ang Armageddon. Kon amo sini ang imo ginabatyag, ano ang makabulig sa imo? Dumduma nga nagahulat si Jehova sing mapailubon, ukon mapinasensiahon, antes niya laglagon ining malain nga kalibutan. (Isa. 30:18) Ngaa mapinasensiahon si Jehova? Gusto niya nga madamo pa nga tawo ang mahatagan sing tsansa nga makilala sia kag mag-alagad sa iya. (2 Ped. 3:9) Gani kon naluyahan ka, dumduma ang madamo nga tawo nga posible maluwas bangod mapinasensiahon si Jehova. Posible pa gani nga paryente mo ang pila sa ila.

8. Kon indi maayo ang pamatyag sang isa ka tigulang, ano ang posible nga epekto sini sa iya?

⁸ Kon indi maayo ang aton pamatyag, posible gid nga may masiling kita ukon mahimo nga hinulsulan naton sa ulihi. Posible gid ini matabo bisan ano man ang aton edad. (Man. 7:7; Sant. 3:2) Halimbawa, bangod sang grabe nga pag-antos sang matutom nga si Job, nakahambal sia nga “wala nagahunahuna sing maayo.” (Job 6:1-3) Kag bangod sa balatian, posible may masiling ukon mahimo ang mga tigulang nga daw indi naton mapatihan nga mahimo nila. Siempre, indi naton dapat irason ang aton edad ukon balatian para maghimo sang mga butang nga makasakit sa iban ukon para serbisyuhan kita. Kag kon narealisar naton nga may nasiling kita ukon nahimo nga indi maayo, dapat kita dayon mangayo sing pasaylo.—Mat. 5:23, 24.

KON PAANO MAKAPABILIN NGA MALIPAYON

9. Ngaa dapat mo batunon ang bulig sang iban? (Tan-awa man ang mga piktyur.)

⁹ Batuna ang bulig sang iban. (Gal. 6:2) Sa umpisa, posible mabudlayan ka nga batunon ini. Ang isa ka sister nga si Gretl nagsiling: “Kon kaisa, nabudlayan ako nga batunon ang bulig sang iban kay basi makapabug-at ako sa ila. Pero pagligad sang malawig nga tion, nabag-o ko ang akon panghunahuna kag mapainubuson ko nga ginbaton ang bulig sang iban.” Kon batunon mo ang bulig sang iban, mabatyagan nila ang kalipay sa paghatag. (Binu. 20:35) Kag malipay ka man kay makita mo nga palangga ka gid nila kag ginaulikdan.

10. Ngaa dapat ka magpasalamat? (Tan-awa man ang piktyur.)

¹⁰ Magpasalamat. (Col. 3:15; 1 Tes. 5:18) Nalipay gid kita kon may ginhimo nga maayo sa aton ang aton mga abyan, pero posible malipat kita nga magpasalamat sa ila. Pero, kon magyuhum kita kag magpasalamat sa ila, ginapabatyag naton sa ila nga naapresyar gid naton ang ila ginhimo. Si Leah, nga isa ka caregiver sa mga tigulang sa Bethel, nagsiling: “Pirme gid ako ginapasalamatan sang isa ka sister nga ginaatipan ko, kag ginasulat niya ini sa papel. Lip-ot man lang ang iya mensahe, pero kanami gid sini. Excited gid ako nga basahon pirme ang iya mensahe, kag nalipay ako kay ginaapresyar niya ang akon bulig.”

11. Paano mo mabuligan ang iban? (Tan-awa man ang piktyur.)

¹¹ Panikasugi nga buligan ang iban. Kon gamiton mo ang imo tion kag kusog sa pagbulig sa iban, malikawan mo nga magpokus sa imo mga problema. Suno sa isa ka hulubaton sa Africa, ang mga tigulang daw pareho sa isa ka library nga puno sang mga libro nga makatudlo sang importante nga mga leksion. Pero kon ara lang sa estante ini nga mga libro, indi gid ini makatudlo. Sing kaanggid, kon indi mo pag-istoryahon ang mga pamatan-on, indi man sila makatuon sang importante nga mga leksion halin sa imo. Gani pamangkuta ang mga pamatan-on kag pamatii sila. Tudlui sila nga kon tumanon nila ang kasuguan ni Jehova, para gid ini pirme sa ila kaayuhan kag mangin malipayon gid sila. Kon paumpawan mo kag palig-unon ang imo pamatan-on nga mga abyan, sigurado gid nga mangin malipayon ka.—Sal. 71:18.

12. Suno sa Isaias 46:4, ano ang ginapromisa ni Jehova nga himuon niya para sa mga tigulang? (Tan-awa man ang piktyur.)

¹² Mangamuyo kay Jehova sing kusog. May mga tion nga posible nakapoy ka sa pisikal ukon sa emosyonal. Pero dumduma nga gamhanan gid si Jehova. Ang Biblia nagasiling nga “wala gid sia ginakapoy ukon ginalapyo.” (Isa. 40:28) Gani masarangan niya nga hatagan ka sang kusog nga kinahanglan mo. (Isa. 40:29-31) Ang matuod, nagapromisa sia nga buligan ka niya. (Basaha ang Isaias 46:4.) Kag ginatuman gid ni Jehova ang iya mga promisa. (Jos. 23:14; Isa. 55:10, 11) Kon mangamuyo ka kay Jehova, buligan ka gid niya. Dayon malipay ka gid kay mabatyagan mo nga palangga ka gid niya.

13. Suno sa 2 Corinto 4:16-18, ano ang dapat naton dumdumon? (Tan-awa man ang piktyur.)

¹³ Dumduma nga temporaryo lang ang imo sitwasyon. Kon dumdumon naton nga temporaryo lang ang mabudlay nga sitwasyon, mas mahapos sa aton nga batason ini. Kag suno sa Biblia, temporaryo lang ang pagtigulang kag ang pagmasakit. (Job 33:25; Isa. 33:24) Gani puede ka mangin malipayon bangod kabalo ka nga sa palaabuton, mangin mas mapagros ka, mas mabakod, kag mas matahom kon ikumparar sang pamatan-on ka pa. (Basaha ang 2 Corinto 4:16-18.) Pero, ano ang puede himuon sang iban para mabuligan ka nila?

KON PAANO MAKABULIG ANG IBAN

14. Ngaa importante nga bisitahan kag tawgan naton ang mga tigulang?

¹⁴ Regular nga bisitahi kag tawgi ang tigulang nga mga kauturan. (Heb. 13:16) Nasubuan ang mga tigulang kay pamatyag nila nagaisahanon lang sila. Binagbinaga ang isa ka brother nga si Carloc nga indi na makahalin sa ila balay. Nagsiling sia: “Ara lang ako sa sulod sang balay sa bilog nga adlaw, gani naboringan ako. Kon kaisa, pamatyag ko daw tigulang ako nga leon nga ginapriso. Bangod sini, indi ako mahim-os kag nagalalain ako.” Kon bisitahan naton ang mga tigulang, ginapabatyag naton sa ila nga importante sila sa aton kag palangga naton sila. Posible may tion nga gusto kuntani naton tawgan ukon bisitahan ang isa ka tigulang nga utod, pero wala naton ini nahimo. Kay man, masako kita tanan. Ano ang makabulig para ‘mapat-od naton ang mas importante nga mga butang,’ lakip na ang pagbisita sa mga tigulang? (Fil. 1:10) Puede mo isulat ang mga ngalan sang tigulang nga mga kauturan sa inyo kongregasyon. Dayon isulat mo ang petsa kon san-o mo sila teksan ukon tawgan. Puede ka man maghimo sang iskedyul kon san-o mo gid sila bisitahan. Indi paghunahunaa nga bisitahan mo lang sila kon may tiempo ka na.

15. Ano ang puede himuon sang mga hoben kag mga tigulang nga magkaupod?

¹⁵ Posible ginapamensar mo kon ano nga topiko ang nanamian sang mga tigulang ukon ano nga hilikuton ang gusto nila. Pero, indi mo ini dapat pagkabalak-an. Panikasugi lang nga mangin maayo nga abyan nila. (Hulu. 17:17) Istoryaha ang mga tigulang sa inyo kongregasyon antes ukon pagkatapos sang miting. Puede mo sila pamangkuton kon ano ang ila paborito nga teksto, ukon paistoryaha sila sang ila masadya nga mga eksperiensia sang bata pa sila. Puede mo man sila hagaron nga magtan-aw sang programa sa JW Broadcasting^®. Buligi man sila sa iban pa nga paagi. Halimbawa, puede mo sila buligan sa pag-update sang ila gadyet ukon sa pag-download sang pinakabag-o nga mga publikasyon. Ang isa ka sister nga si Carol nagsiling: “Hagara ang mga tigulang sa mga hilikuton nga nanamian ninyo nga himuon. Bisan pa tigulang na ako, madamo gihapon ako sang gusto himuon. Mahilig ako mag-shopping, magkaon sa gua, kag maglagawlagaw para apresyahon ang mga tinuga ni Jehova.” Ang isa ka sister nga si Maira nagsiling: “Ang isa ko ka abyan 90 anyos na, kag mas magulang sia sa akon sing 57 ka tuig. Pero daw indi ko mabatyagan nga daku ang gap sang amon edad kay kasadya sa amon pirme kag upod kami nga nagatan-aw sang mga pelikula. Kag kon may problema ang isa sa amon, nagabuligay kami.”

16. Ngaa mas maayo kon may upod ang mga tigulang kon magpadoktor sila?

¹⁶ Updi sila kon magpadoktor sila. Magluwas sa pagdul-ong kag pagsugat sa tigulang sa clinic, mas maayo gid kon ara ka samtang gina-checkup sia. Siguraduha nga ginatratar sia sing maayo sang doktor ukon sang nurse kag na-checkup sia sing maayo. (Isa. 1:17) Puede mo isulat ang ginasiling sang doktor sa iya. Ang isa ka tigulang nga sister nga si Ruth nagsiling: “Sa masami, kon ako lang isa, wala ako ginapatihan sang doktor. May mga tion nga nagasiling ang doktor, ‘Wala ka sakit. Sa hunahuna mo lang ’na.’ Pero kon may upod ako, ginatratar ako sing maayo sang doktor. Nagapasalamat gid ako sa mga kauturan nga nagaupod sa akon.”

17. Sa ano nga mga paagi sang pagministeryo puede mo updan ang mga tigulang?

¹⁷ Updi sila sa pagministeryo. May mga tigulang nga utod nga indi na makasarang magpamalaybalay. Ano ang puede mo himuon? Puede mo hagaron ang isa ka tigulang nga sister nga magpanaksi paagi sa cart, kag puede mo sia dal-an sang pulungkuan para makapungko sia malapit sa cart. Puede mo man updon ang isa ka tigulang nga brother sa imo Bible study. Basi puede mo pa gani dal-on ang imo study sa balay sang tigulang nga brother para didto mag-study. Puede binagbinagon sang mga gulang ang paghiwat sang miting sang pag-alagad sa latagon sa balay sang tigulang nga utod para indi sia mabudlayan. Nalipay gid si Jehova sa aton mga ginahimo para padunggan ang mga tigulang.—Hulu. 3:27; Roma 12:10.

18. Ano ang binagbinagon naton sa masunod nga artikulo?

¹⁸ Ginpahanumdom kita sini nga artikulo nga palangga kag ginapabaloran ni Jehova ang mga tigulang. Kag amo man sini ang ginabatyag naton. Para sa amon pinalangga nga mga tigulang, bisan pa nga nabudlayan kamo sa inyo sitwasyon, buligan kamo ni Jehova nga makapabilin nga malipayon. (Sal. 37:25) Makapalig-on gid mabal-an nga malapit na ninyo maeksperiensiahan ang pinakamaayo nga kabuhi. Pero kamusta naman ang mga utod nga nagaatipan sa tigulang nga miembro sang ila pamilya, sa ila bata, ukon sa ila abyan nga nagamasakit? Ano ang puede nila himuon para indi madula ang ila kalipay? Binagbinagon naton ini sa masunod nga artikulo.