Kon Ngaa Kinahanglan Naton ang Gawad

1-2. Ngaa kinahanglan may magluwas sa aton? (Roma 7:22-24) (Tan-awa man ang piktyur.)

IBUTANG ta nga narumpag ang isa ka bilding. Na-trap ang isa ka tawo sa sulod, gani nagsinggit sia sang bulig. Nagalaum sia nga may makabati sa iya para luwason sia.

² Daw pareho sa sini ang aton sitwasyon. Ngaa masiling naton ina? Sang nagrebelde si Adan sa iya Manunuga, nangin makasasala sia. Bangod mga anak kita ni Adan, napanubli naton ang iya makasasala nga kahimtangan. Pareho sa tawo nga na-trap sa narumpag nga bilding, na-trap man kita sa napanubli naton nga sala. Sa sulat ni apostol Pablo sa mga taga-Roma, ginsambit niya kon ano ang aton ginabatyag bilang makasasala nga mga tawo. (Basaha ang Roma 7:22-24.) Nagpakitluoy sia nga luwason sia “sa lawas nga nagadul-ong sa sini nga kamatayon.” Para kay Pablo, na-trap sia sa napanubli naton nga sala nga nagaresulta sa kamatayon. (Roma 6:23) Amo man sini ang aton sitwasyon, kag kinahanglan may magluwas sa aton.

3. Ano ang nangin posible paagi sa gawad?

³ Pagkatapos ginsambit ni Pablo ang parte sa napanubli naton nga sala, naghatag sia sa aton sang paglaum. Namangkot sia: “Sin-o ang makaluwas sa akon sa lawas nga nagadul-ong sa sini nga kamatayon?” Dayon ginsabat niya ini: “Nagapasalamat ako sa Dios paagi kay Jesucristo nga aton Ginuo!” (Roma 7:25) Ginapatuhuyan ni Pablo ang halad-gawad ni Jesus.a Paagi sa sini nga gawad, (1) mapatawad ang aton mga sala, (2) may paglaum kita nga mangin perpekto sa palaabuton, kag (3) mangin maayo liwat ang aton kaangtanan sa aton Manunuga. Paagi sa pagbinagbinag sa sini nga mga punto, mas palanggaon pa gid naton si Jehova, “ang Dios nga nagahatag sing paglaum.” (Roma 15:13) Kag pasalamatan pa gid naton si Jesus kay “paagi sa iya ginhilway kita paagi sa gawad.”—Col. 1:14.

MAPATAWAD ANG ATON MGA SALA

4-5. Ngaa kinahanglan naton tanan ang gawad? (Manugwali 7:20)

⁴ Kinahanglan naton ang gawad para mapatawad ang aton mga sala. Kay man, tanan kita makahimo gid sang sala sa aton mga ginahambal ukon ginahimo. (Basaha ang Manugwali 7:20.) Malain gid katama ang iban sa sini nga mga sala. Halimbawa, kon parte sa mga nakasala sing pagpakighilahi ukon pagpatay, ang Mosaikong Kasuguan nagasiling nga dapat sila patyon. (Lev. 20:10; Num. 35:30, 31) Pero bisan pa indi amo sina kalain ang iban nga mga sala, sala man ini gihapon. Halimbawa, nagsiling si David: “Bantayan ko ang akon mga tikang agod malikawan ko nga makasala sa akon dila.” (Sal. 39:1) Ginapakita sini nga bisan sa aton lang mga ginahambal, makahimo kita sang sala.—Sant. 3:2.

⁵ Hunahunaa ang imo mga ginhambal ukon ginhimo sang una. May tion bala nga daw gusto mo bawion ang imo ginhambal sa iban? May ginhimo ka bala nga ginhinulsulan mo sang ulihi? Sigurado gid nga huo ang imo sabat sa sining duha ka pamangkot. Ang Biblia nagasiling: “Kon magsiling kita, ‘Wala kita sing sala,’ ginapatalang naton ang aton kaugalingon kag ang kamatuoran wala sa aton.”—1 Juan 1:8.

6-7. Ano ang basihan ni Jehova sa pagpatawad sa aton mga sala? (Tan-awa man ang piktyur.)

⁶ Bangod perpekto ang hustisya ni Jehova, dapat may basihan sia sa pagpatawad sa aton mga sala. Paagi sa gawad, may basihan si Jehova nga himuon ini. (Efe. 1:7) Pero indi buot silingon sini nga daw sa wala lang kay Jehova kon makahimo kita sang sala. Kay man, indi niya gusto nga maghimo kita sang sala.—Isa. 59:2.

⁷ Suno sa Mosaikong Kasuguan, dapat maghalad sing mga sapat ang mga Israelinhon para tumbasan ang ila mga sala. (Lev. 4:27-31; 17:11) Ginapakita sini nga mga halad nga kinahanglan sang mga tawo ang mas daku nga halad ni Jesus kag ang mga pagpakamaayo sini. Paagi sa gawad ni Jesus, may legal na nga basihan si Jehova para patawaron ang aton mga sala. Base sa sulat ni Pablo sa mga Cristiano sa Corinto, nahangpan niya ang mga pagpakamaayo sang halad-gawad ni Jesus. Gani pagkatapos niya ginsambit ang ila malain nga ginahimo sadto, nagsiling sia: “Ginhugasan na kamo sang aton Dios; ginpakabalaan na kamo; ginpakamatarong na kamo sa ngalan ni Ginuong Jesucristo kag paagi sa espiritu sang aton Dios.”—1 Cor. 6:9-11.

8. Ano ang puede mo pamalandungan samtang nagahanda ka sa pag-attend sa Memoryal?

⁸ Samtang nagahanda ka sa pag-attend sa Memoryal, pamalandungi ang mga pagpakamaayo sang pagpatawad ni Jehova sa imo. Halimbawa, paagi sa gawad, ginpatawad na ni Jehova ang imo mga sala sang una nga ginhinulsulan mo na. Gani, indi mo dapat paghunahunaon nga wala ka pa napatawad ni Jehova. Nabudlayan ka bala nga patihan ini? Posible ginahunahuna mo, ‘Kabalo ’ko nga nagapatawad si Jehova, pero indi ko mapatawad ang akon kaugalingon.’ Kon amo sini ang imo ginabatyag, dumduma ini: Si Jehova ang nagapatawad, kag si Jesus ang ginhatagan niya sang awtoridad nga maghukom sa aton. Wala ginhatagan ni Jehova ang mga tawo, lakip na ikaw, sang kinamatarong nga magdesisyon kon sin-o ang iya patawaron ukon indi. Ang Biblia nagasiling: “Kon nagalakat kita sa kapawa, subong nga [si Jehova] nagapuyo sa kapawa, . . . ang dugo ni Jesus nga iya Anak nagatinlo sa aton sa tanan naton nga sala.” (1 Juan 1:6, 7) Masaligan gid naton ini pareho sa iban pa nga panudlo sa Biblia. Paagi sa gawad, may legal nga basihan si Jehova nga kaluuyan kita, kag ang iya Pulong nagasiling nga ‘handa sia sa pagpatawad.’—Sal. 86:5.

MAY PAGLAUM KITA NGA MANGIN PERPEKTO

9. Sa Biblia, ano ang ginapatuhuyan sang tinaga nga “sala”? (Salmo 51:5 kag footnote)

⁹ Sa Biblia, ang tinaga nga “sala” wala lang nagapatuhoy sa isa ka buhat kundi sa isa ka kahimtangan nga napanubli naton sang ginabusong pa lang kita. (Basaha ang Salmo 51:5 kag footnote.) Bangod sa sini nga kahimtangan, makahunahuna kita ukon makahimo sing malain. Amo man ini ang rason kon ngaa nagamasakit kita, nagatigulang, kag nagakapatay. Gani, bisan ang mga bag-ong bun-ag nga wala pa sing nahimo nga sala nagamasakit man kag nagakapatay. Ginabuligan man kita sini nga mahangpan kon ngaa nagaantos kag nagakapatay ang maayo kag malain nga mga tawo. Bangod sa sala ni Adan, nangin makasasala ang aton kahimtangan.

10. Ano ang nabatyagan ni Adan kag ni Eva pagkatapos nila magpakasala?

¹⁰ Hunahunaa kon ano ang nabatyagan ni Adan kag ni Eva pagkatapos nila magpakasala. Naglalain gid sila bangod sa ila nahimo. Pagkatapos nila magrebelde, nasubuan sila dayon bangod wala nila gintuman ang kasuguan sang Dios nga “nasulat sa ila tagipusuon.” (Roma 2:15) Nabatyagan nila nga may nagbag-o sa ila kaugalingon. Nabatyagan nila nga dapat nila tabunan ang mga bahin sang ila lawas kag dapat sila magpanago sa ila Manunuga. (Gen. 3:7, 8) Sa pinakauna nga tion, ginkonsiensia si Adan kag si Eva, kag nakabatyag sila sing kabalaka, kasakit, kag kahuya. Sugod sadto, may mga tion gid nga nakabatyag sila sini liwat asta sa ila kamatayon.—Gen. 3:16-19.

11. Ano ang nabatyagan naton bangod sa aton makasasala nga kahimtangan?

¹¹ Bangod indi kita perpekto, may mga tion nga mabatyagan man naton ang ginbatyag ni Adan kag ni Eva. Nagaantos kita sa pisikal kag sa emosyonal bangod sa aton makasasala nga kahimtangan. Bisan pa ginatinguhaan gid naton nga mangin maayo ang aton kabuhi, may mga problema gid nga indi naton masolbar. Ngaa? Bangod ang Biblia nagasiling nga sugod sang nagpakasala si Adan kag si Eva, indi gid madulaan sang problema ang mga tawo. (Roma 8:20) Matuod gid ini sa aton personal nga mga problema kag sa mga problema nga ginaantos sang tanan nga tawo. Halimbawa, hunahunaa ang pagtinguha sang mga tawo para masolbar kuntani ang problema sa polusyon, krimen, kapigaduhon, kag pag-ilinaway sang mga pungsod. Pero, wala gid nila ini masolbar. Paano kita maluwas sang gawad sa aton makasasala nga kahimtangan?

12. Ano nga paglaum ang ginpaposible sang gawad?

¹² Paagi sa gawad, may paglaum na kita nga ‘hilwayon sa pagkaulipon sa lawas nga nagakadunot.’ (Roma 8:21) Ginapahangop sini nga kon mangin perpekto na kita sa bag-ong kalibutan sang Dios, indi na kita magmasakit ukon masubuan. Indi naman kita makabatyag sing kabalaka, kasakit, kag kahuya, kag indi na kita pagtublagon sang aton konsiensia. Dugang pa, si Jesucristo nga naggawad sa aton amo na ang magagahom. Sia ang “Prinsipe sang Paghidait,” kag buligan niya kita nga masolbar ang tanan naton nga problema.—Isa. 9:6, 7.

13. Ano pa ang puede mo pamalandungan samtang nagahanda ka sa pag-attend sa Memoryal?

¹³ Imadyina ang imo kabuhi kon perpekto ka na. Maayo pirme ang imo pamatyag pagbugtaw mo kada aga, kag indi ka na gid mabalaka nga basi magutman, magmasakit, ukon mapatay ka ukon ang imo mga pinalangga. Pero bisan subong pa lang, mangin kalmado ka kon ‘manguyapot ka sa paglaum nga daw kaangay sang angkla para sa kalag nga pat-od kag malig-on.’ (Heb. 6:18, 19) Pareho sa angkla nga nagabulig sa sakayan nga indi maanod, mapabakod sang imo paglaum ang imo pagtuo kag buligan ka sini nga mabatas ang bisan ano nga problema. Makasalig ka nga si Jehova “nagapadya sa mga hanuot nga nagapangita sa iya.” (Heb. 11:6) Ang gawad amo ang nagpaposible sang kaumpawan nga mabatyagan mo subong kag sang imo matuod nga paglaum sa palaabuton.

MANGIN MAAYO LIWAT ANG ATON KAANGTANAN KAY JEHOVA

14. Sang nagpakasala si Adan kag si Eva, ano ang natabo sa aton kaangtanan sa aton Manunuga, kag ngaa?

¹⁴ Sang nagpakasala si Adan kag si Eva, nangin indi maayo ang kaangtanan sang mga tawo sa Dios. Nagsiling pa gani ang Biblia nga nautod ang aton kaangtanan sa aton Manunuga. (Roma 8:7, 8; Col. 1:21) Ngaa? Bangod perpekto si Jehova kag wala niya ginakunsinti ang sala. Amo ini ang ginasiling sang Biblia parte kay Jehova: “Tuman kaputli sang imo mga mata sa pagtan-aw sing malain, kag indi mo mabatas ang kalautan.” (Hab. 1:13) Gani bangod sa sala, naguba ang kaangtanan sang mga tawo sa Dios. Kon indi makay-o ining naguba nga kaangtanan, wala sing bisan sin-o sa aton ang puede mangin abyan ni Jehova. Pero paagi sa gawad, puede na liwat mangin maayo ang aton kaangtanan sa iya.

15. Ngaa puede na liwat mangin maayo ang kaangtanan sang mga tawo kay Jehova paagi sa kamatayon ni Jesus?

¹⁵ Ang Biblia nagasiling nga si Jesus “ang nagapasag-uli nga halad para sa aton mga sala.” (1 Juan 2:2) Ngaa puede na liwat mangin maayo ang kaangtanan sang mga tawo kay Jehova paagi sa kamatayon ni Jesus? Kay man, paagi sa sini, may basihan na si Jehova para ipasag-uli ang Iya kaangtanan sa mga tawo. (Roma 3:23-26) Makabig pa gani niya nga matarong ang mga matutom nga nag-alagad sa iya antes pa napatay ang Cristo. (Gen. 15:1, 6) Ngaa? Bangod sigurado si Jehova nga ihatag sang Iya Anak nga si Jesus ang iya kabuhi bilang gawad. (Isa. 46:10) Gani paagi sa gawad, mapasag-uli na ang kaangtanan sang mga tawo sa Dios.

16. Ano pa gid ang puede mo pamalandungan samtang nagahanda ka sa pag-attend sa Memoryal? (Tan-awa man ang piktyur.)

¹⁶ Hunahunaa ang imo kabuhi subong bangod may maayo ka nga kaangtanan kay Jehova. Halimbawa, matawag mo si Jehova nga imo “Amay,” suno sa ginsugo ni Jesus. (Mat. 6:9) Kon kaisa, mahimo ginatawag mo pa gani si Jehova nga imo “Abyan.” Pero bisan ginatawag naton si Jehova nga aton “Amay” ukon “Abyan,” dapat gid naton ipakita ang respeto kag pagpaubos sa iya. Ngaa? Kay indi kita perpekto, gani indi kita makapakigsuod kay Jehova kon sa aton lang pagpanikasog. Nangin posible lamang ini bangod sa halad-gawad. Paagi kay Jesus, ‘ipasag-uli ni Jehova sa Iya kaugalingon ang tanan iban pa nga butang paagi sa pagpaluntad sing paghidait paagi sa dugo nga ginpatulo [ni Jesus] sa usok sang pag-antos.’ (Col. 1:19, 20) Gani bisan indi pa kita perpekto subong, may maayo kita nga kaangtanan kay Jehova.

GINAPAMATUD-AN SANG GAWAD NGA MALULUY-ON SI JEHOVA

17. Paano ginapamatud-an sang gawad nga maluluy-on si Jehova? (Efeso 2:4, 5)

¹⁷ Ginapamatud-an gid sang gawad nga si Jehova “bugana sa kaluoy.” Sia ang “nagbuhi sa aton . . . bisan sang patay pa kita bangod sa aton mga paglapas.” (Basaha ang Efeso 2:4, 5.) Pareho sa tawo nga na-trap sa narumpag nga bilding, ang mga may “husto nga panimuot sa pagtigayon sing kabuhi nga wala sing katapusan” nakahibalo nga na-trap sila sa ila napanubli nga sala kag kinahanglan may magluwas sa ila. (Binu. 13:48) May ginhimo si Jehova para maluwas ang mga tawo. Paagi sa mensahe sang Ginharian, ginbuligan niya sila nga makilala sia kag ang iya Anak nga si Jesus. (Juan 17:3) Gani kon nagapensar si Satanas nga indi matuman ang kabubut-on sang Dios bangod nagpakasala si Adan kag si Eva, nagsala gid sia.

18. Samtang ginapamalandungan naton ang parte sa gawad, ano ang dapat naton dumdumon?

¹⁸ Samtang ginapamalandungan naton ang mga pagpakamaayo nga aton nabaton bangod sa gawad, dapat naton dumdumon ang panguna nga rason kon ngaa gin-aman ni Jehova ang gawad. Wala lang gin-aman ni Jehova ang gawad para luwason kita, kundi amo ini ang Iya paagi para sabton ang akusasyon ni Satanas sa hardin sang Eden. (Gen. 3:1-5, 15) Paagi sa gawad, ginpakabalaan ni Jehova ang iya ngalan kag ginpamatud-an niya nga sala ang mga akusasyon ni Satanas. Ginpakita man niya nga mahigugmaon sia nga Dios kay ginluwas niya kita sa sala kag kamatayon. Kag bangod sa iya wala tupong nga kaayo, may kahigayunan kita nga masabat ang akusasyon ni Satanas bisan pa indi kita perpekto. (Hulu. 27:11) Paano mo mapakita nga nagapasalamat ka sa gawad? Sabton naton ina nga pamangkot sa masunod nga artikulo.