Ipakita ang Imo Pagpasalamat sa Gawad

1-2. Ang halad-gawad ni Jesus dapat magpahulag sa aton nga himuon ang ano, kag ngaa? (2 Corinto 5:14, 15) (Tan-awa man ang piktyur.)

KON may nagluwas sa imo sang na-trap ka sa narumpag nga bilding, indi bala nga gusto mo gid sia pasalamatan? Bisan pa indi lang ikaw ang ginluwas niya, sigurado nga gusto mo nga ikaw gid mismo ang magpasalamat sa iya para ipakita nga wala mo ginabalewala ang iya pagluwas sa imo.

² Ginbinagbinag naton sa nagligad nga artikulo nga indi naton maluwas ang aton kaugalingon sa sala kag kamatayon. Pero paagi sa gawad, (1) mapatawad ang aton mga sala, (2) may paglaum kita nga mangin perpekto sa palaabuton, kag (3) mangin maayo liwat ang aton kaangtanan sa aton Manunuga. Gani may paglaum kita nga mabuhi sing wala katapusan sa bag-ong kalibutan nga ginpromisa ni Jehova. Maathag nga antes pa nagkadto si Jesus sa duta, palangga na niya ang mga tawo, kag ginpakita niya ini sang gingawad niya kita. (Hulu. 8:30, 31) Si apostol Pablo nagsiling nga ‘ang gugma sang Cristo nagapahulag sa aton.’ (Basaha ang 2 Corinto 5:14, 15.) Buot silingon, ang gugma ni Jesus dapat magpahulag sa aton nga ipakita nga nagapasalamat kita sa gawad.

3. Ngaa posible lainlain ang paagi sang kada isa sa pagpasalamat sa gawad?

³ Ano ang himuon mo para mapakita mo nga nagapasalamat ka sa gawad? Posible nga indi pareho ang imo sabat sa iban. Binagbinaga ini nga ilustrasyon. May tatlo ka tawo nga mabiyahe pakadto sa pareho nga destinasyon. Pero lainlain ang ila ginhalinan nga lugar, gani lainlain man ang dalan nga ila agyan. Sing kaanggid, ang aton destinasyon amo ang aton pagpasalamat sa gawad. Pero lainlain man ang aton “dalan” nga ginaagyan ukon ang aton paagi sa pagpakita sini. Gani sa sini nga artikulo, binagbinagon naton kon paano ini mapakita sang tatlo ka grupo sang mga tawo: (1) mga Bible study, (2) bawtismado nga mga Cristiano, kag (3) mga karnero nga nagtalang.

MGA BIBLE STUDY

4. Ano ang pagtamod ni Jehova sa mga naga-Bible study?

⁴ Kon naga-Bible study ka subong, hunahunaa ini: Bangod ginatun-an mo ang parte kay Jehova kag ang mga panudlo sa Biblia, ginapakita sini nga gusto ni Jehova nga mangin abyan ka niya. (Juan 6:44; Binu. 13:48) “Si Jehova amo ang nagausisa sang mga tagipusuon.” Buot silingon, nakita niya ang imo pagtinguha nga makilala sia kag nalipay sia kon maghimo ka sing mga pagbag-o para matuman sia. (Hulu. 17:3; 27:11) Pero dumduma pirme nga posible mo mangin abyan si Jehova bangod ginhatag niya ang iya Anak bilang gawad.—Roma 5:10, 11.

5. Paano matuman sang mga naga-Bible study ang laygay sa Filipos 3:16?

⁵ Kon naga-Bible study ka subong, paano mo mapakita nga nagapasalamat ka sa gawad? Ang isa ka paagi amo ang pagtuman sa laygay ni apostol Pablo sa mga taga-Filipos: “Bisan ano man nga pag-uswag ang aton nahimo sa sini, padayon kita nga maglakat sa husto nga paagi sa amo gihapon nga dalanon.” (Fil. 3:16) Ang isa ka translation sini nga bersikulo sa Biblia nagasiling: “Padayunon ta ang pagsunod sa kamatuoran nga aton natun-an.” Gani base sa sini nga laygay, indi gid pagpasugti ang bisan ano ukon ang bisan sin-o nga magbalabag sa imo paglakat sa dalan nga nagapadulong sa kabuhi.—Mat. 7:14; Luc. 9:62.

6. Ano ang puede himuon sang naga-Bible study kon nabudlayan sia nga iaplikar ang iya mga natun-an? (Deuteronomio 30:11-14) (Tan-awa man ang piktyur.)

⁶ Pero ano abi kon nabudlayan ka nga iaplikar ang pila ka panudlo sa Biblia? I-research pa gid ini nga topiko kag mangamuyo kay Jehova nga buligan ka nga maintiendihan ini sing maayo. (Sal. 86:11) Kon indi mo ini gihapon maintiendihan, pabay-i lang ini anay pero indi mag-untat sa imo pag-Bible study. Ano abi kon nabudlayan ka nga untatan ang paghimo sang mga butang nga nagapaakig kay Jehova? Dumduma nga wala sang may ginapahimo si Jehova nga indi naton masarangan himuon. Masarangan mo nga tumanon ang iya mga sugo. (Basaha ang Deuteronomio 30:11-14.) Kag nagpromisa si Jehova nga buligan ka niya. (Isa. 41:10, 13; 1 Cor. 10:13) Gani indi gid mag-untat. Imbes nga magpokus sa imo nabudlayan nga iaplikar, pasalamati ang tanan nga ginhimo ni Jehova sa imo, ilabi na gid ang gawad. Kon palanggaon mo pa gid si Jehova, “ang iya mga sugo indi mabug-at.”—1 Juan 5:3.a

7. Ano ang dapat pamalandungan sang mga pamatan-on nga Saksi ang mga ginikanan?

⁷ Kamusta naman kamo nga mga pamatan-on nga Saksi ang mga ginikanan? Mga Bible study man kamo, kag kamo ang pinakaimportante nga Bible study sang inyo mga ginikanan. Ang Biblia nagsiling: “Magpalapit kamo sa Dios, kag magapalapit sia sa inyo.” (Sant. 4:8; 1 Cron. 28:9) Gani kon magpanikasog ka nga magpalapit kay Jehova, magapalapit man sia sa imo. Indi buot silingon nga ginahatagan ka lang sing atension ni Jehova bangod Saksi ang imo mga ginikanan, kundi bangod gusto gid Niya nga mangin suod ka sa Iya. Gin-aman niya ang gawad para mangin abyan mo sia. Gani dapat mo gid pabaloran ini nga regalo. (Roma 5:1, 2) Samtang nagahanda ka sa pag-attend sa Memoryal, pamalandungi ang mga ginhimo ni Jehova kag ni Jesus para sa imo. Pamalandungi man kon ano nga mga tulumuron ukon goal ang gusto mo himuon para mapasalamatan mo ang gawad nga gin-aman ni Jehova paagi sa iya Anak.b

BAWTISMADO NGA MGA CRISTIANO

8. Paano ginpakita sang bawtismado nga mga Cristiano ang ila pagtuo sa gawad?

⁸ Kon bawtismado ka na, madamo nga beses mo na nga napakita ang imo pagtuo sa gawad. Halimbawa, may ginhimo ka nga mga pagbag-o sa imo kabuhi para mangin abyan mo si Jehova. Gintuman mo ang sugo ni Jesus nga magbantala kag tudluan ang mga tawo para mangin disipulo sila. Kag gindedikar mo ang imo kabuhi kay Jehova kag nagpabawtismo. Posible pa gani nga ginhingabot ka bangod gin-alagad mo si Jehova. (2 Tim. 3:12) Pero wala ka nag-untat bangod palangga mo gid si Jehova kag gusto mo ipakita nga nagapasalamat ka sa gawad nga gin-aman niya paagi sa iya Anak.—Heb. 12:2, 3.

9. Ano ang dapat bantayan sang bawtismado nga mga Cristiano?

⁹ Kon dugay na kita nga bawtismado, dapat gid kita magbantay. Kay man, posible nga sa pagligad sang tion mabalewala naton ang gawad. Paano ina matabo? Binagbinaga ang natabo sa mga Cristiano sa Efeso sang unang siglo. Gindayaw gid ni Jesus ang ila pagbatas. Pero ginsilingan niya sila: “Amo ini ang naindi-an ko sa imo, nga ginbayaan mo ang imo una nga gugma.” (Bug. 2:3, 4) Ginapakita sang ginsiling ni Jesus nga puede mangin rutina na lang ang pag-alagad sang isa ka Cristiano. Posible nga nagapangamuyo man sia, naga-attend sa mga miting, kag nagabantala. Pero ginahimo niya ini indi bangod sa gugma kundi bangod amo na lang ini ang iya naandan. Ano ang himuon mo kon amo man sini ang nagakatabo sa imo?

10. Paano mo ‘mahunahuna sing maayo’ ang imo pag-alagad kag ‘mag-ukod sa sini’? (1 Timoteo 4:13, 15)

¹⁰ Ginsilingan ni apostol Pablo si Timoteo nga ‘hunahunaon niya sing maayo’ ang iya pag-alagad kag ‘mag-ukod sia sa sini.’ (Basaha ang 1 Timoteo 4:13, 15.) Base sa sini nga laygay, pamensara kon ano ang puede mo himuon para mangin ‘makugi ka tungod sa balaan nga espiritu.’ (Roma 12:11) Halimbawa, kon nakahanda ka antes sang miting, makabulig ini sa imo nga makapokus kag makapamati sing maayo. Kag kon naga-personal study ka, puede ka makakadto sa malinong nga lugar para mapamalandungan mo ang imo natun-an. Kinahanglan mo ini himuon para padayon mo nga mapakita ang pagpasalamat kay Jehova sa tanan niya nga ginhimo, lakip na ang gawad. Daw pareho ini sa dabok nga ginagatungan mo pa gid para indi mapatay ang kalayo. Gani pila ka semana antes sang Memoryal, puede mo pamalandungan ang mga pagpakamaayo nga imo nabaton bangod isa ka sa mga Saksi ni Jehova. Sigurado nga makabulig ini sa imo nga pabaloran pa gid ang gawad bangod amo ini ang rason nga nangin abyan ka ni Jehova.

11-12. Kon indi na pareho sang una ang imo kakugi, buot bala silingon nga wala ka na ginahatagan ni Jehova sang iya balaan nga espiritu? Ipaathag. (Tan-awa man ang piktyur.)

¹¹ Kon pamatyag mo indi na pareho sang una ang imo kakugi sa pag-alagad, indi ka dapat maluyahan sing buot kag indi paghunahunaa nga wala ka na ginahatagan ni Jehova sang iya balaan nga espiritu. Binagbinaga ang ginsulat ni apostol Pablo sa mga taga-Corinto parte sa iya ministeryo: “Bisan pa kon ginahimo ko ini batok sa akon kabubut-on, sa gihapon hilikuton ini nga gintugyan sa akon.” (1 Cor. 9:17) Ano ang buot niya silingon?

¹² May mga tion nga daw wala sing gana si Pablo magbantala. Pero bisan pa amo sini ang iya ginabatyag, determinado sia nga magpadayon sa pagbantala. Puede mo man sia ilugon. Mangin determinado nga himua ang husto bisan pa daw wala ka sing gana nga himuon ini. Mangamuyo nga hatagan ka ni Jehova sing “handum kag kusog nga himuon kon ano ang iya nahamut-an.” (Fil. 2:13) Padayon nga himua ang mga hilikuton nga nagapasuod sa imo kay Jehova. Makasalig ka nga mangin mabakod liwat ang imo gugma kay Jehova kag magabalik ang imo kakugi sa pag-alagad.

13. Paano naton padayon nga mausisa kon bala ‘malig-on ang aton pagtuo’?

¹³ Mas maayo gid kon kaisa nga usisaon naton ang aton kaugalingon pareho sa ginsiling sa 2 Corinto 13:5: “Padayon nga usisaa kon malig-on ang inyo pagtuo; padayon nga pamatud-i kon ano kamo.” Puede naton pamangkuton ang aton kaugalingon: ‘Ginauna ko bala ang pag-alagad sa akon kabuhi?’ (Mat. 6:33) ‘Makita bala sa akon mga kalingawan nga ginadumtan ko ang malaut nga mga butang?’ (Sal. 97:10) ‘Ang akon bala ginahambal kag ginahimo nagabulig para may paghidait kag paghiusa ang kongregasyon?’ (Efe. 4:2, 3) Maayo gid nga hunahunaon naton ini nga mga pamangkot sa tion sang Memoryal. Kon dumdumon naton ang ginhimo ni Jehova kag ni Jesus para sa aton, gusto gid naton pasalamatan si Jehova kag ipakita nga nagakabuhi kita para sa Cristo kag indi para sa aton kaugalingon.c

MGA KARNERO NGA NAGTALANG

14. Ano ang posible nga mga rason kon ngaa nag-untat sa pag-alagad ang pila ka Cristiano?

¹⁴ May pila ka Cristiano nga nag-untat sa pag-alagad bisan pa tinuig na sila nga nag-alagad sing matutom. Ngaa? Ang iban nabudlayan na mag-alagad bangod sa “mga kabalaka sa kabuhi.” (Luc. 21:34) Ang iban naman nasandad sa ginsiling ukon ginhimo sang isa ka utod. (Sant. 3:2) Kag may ara man nga nakahimo sang serioso nga sala kag wala nagpabulig. Pero bisan ano man ang rason, ano ang himuon mo kon wala ka na nagapakig-upod sa kongregasyon subong? Kag kon pamalandungan mo ang gawad, mapahulag ka sini nga himuon ang ano?

15. Ano ang ginahimo ni Jehova sa mga karnero nga nagtalang? (Ezequiel 34:11, 12, 16)

¹⁵ Hunahunaa kon ano ang ginabatyag ni Jehova sa mga karnero nga nagtalang. Wala sia naakig sa ila, kundi ginapangita niya sila. Ginapakaon niya sila kag ginabuligan nga makabalik sa iya. (Basaha ang Ezequiel 34:11, 12, 16.) Amo man sini ang ginahimo ni Jehova sa imo. Ang imo pagbasa sini nga artikulo nagapakita nga gusto mo sia gihapon alagaron. Sang gintun-an mo ang kamatuoran, nakita ni Jehova ang imo tagipusuon gani ginbuligan ka niya nga mangin suod sa iya. Nakita gihapon ni Jehova ang imo tagipusuon subong. Gani bisan pa daw karnero ka nga nagtalang, ginabuligan ka niya nga makabalik sa iya.

16. Ano ang makabulig sa nagtalang nga karnero nga magbalik kay Jehova? (Tan-awa man ang piktyur.)

¹⁶ Hunahunaa ang makapalig-on nga ginsiling sang brosyur nga Magbalik kay Jehova: “Magsalig nga indi ka pagpabay-an ni Jehova sa imo pagbalik sa iya. Buligan ka niya nga atubangon ang kabalaka, nga maumpawan ang imo nasaklaw nga balatyagon, kag makasapo sang malinong nga hunahuna kag tagipusuon nga resulta sang isa ka matinlo nga konsiensia. Dayon mabatyagan mo liwat nga mapahulag ka sa pag-alagad kay Jehova upod sa imo mga masigkasumilimba.” Dumduma man nga gusto ka gid buligan sang mga gulang. Daw pareho sila sang “palalipdan sa hangin, isa ka duog nga palanaguan sa unos.” (Isa. 32:2) Sigurado nga ginapasalamatan mo gid ang gawad, gani pamangkuta ang imo kaugalingon, ‘Ano ang mga puede ko himuon para matadlong ko ang akon kaangtanan kay Jehova?’ (Isa. 1:18; 1 Ped. 2:25) Halimbawa, panikasugi nga mag-attend sa Kingdom Hall. Puede ka man magpabulig sa isa sa mga gulang para pabakuron ang imo espirituwalidad, kag posible nga may maga-Bible study sa imo liwat. Makasigurado ka nga pakamaayuhon ni Jehova ang imo mga pagpanikasog para makabalik ka sa iya kag ang imo pagpasalamat sa gawad sang iya Anak.

ANO ANG PUEDE MO HIMUON?

17-18. Ano ang puede naton himuon antes sang Memoryal?

¹⁷ Nagsiling si Jesus nga gin-aman ang gawad “agod ang tanan nga nagatuo sa iya indi malaglag kundi makatigayon sang kabuhi nga wala sing katapusan.” (Juan 3:16) Ang gawad amo ang paagi ni Jehova para maluwas kita sa sala kag kamatayon. Gani indi gid naton ini pagbalewalaon. (Roma 3:23, 24; 2 Cor. 6:1) Sa mga adlaw antes sang Memoryal, pamalandungi ang gugma nga ginpakita ni Jehova kag ni Jesus. Ini nga gugma amo ang magapahulag sa aton nga pasalamatan sila.

¹⁸ Paano mo ipakita ang imo pagpasalamat? Lainlain ang paagi sang kada isa sa aton. Pero makasigurado ka nga pakamaayuhon ni Jehova ang imo pagpanikasog kag ang panikasog sang minilyon ka kauturan sa bilog nga kalibutan nga “indi na magkabuhi para sa ila kaugalingon, kundi para sa iya nga napatay para sa ila.”—2 Cor. 5:15.