2016 Tuigan nga Teksto

“Madamo man ang . . . magadinumtanay. . . . Ang gugma sang madamo nga tawo magabugnaw.” (Mat. 24:10, 12) Ining ginsiling ni Jesus nagtagna nga sa mga tinuig nga malapit na ang kalaglagan sang Jerusalem sang 70 C.E., mangin indi mahigugmaon ang mga tawo. Sa kabaliskaran, ang mga disipulo sang Cristo makilala paagi sa ila ginapakita nga gugma. (Juan 13:35) Makapalig-on gid para sa mga Cristiano nga Hebreo sa Jerusalem nga mabasa ang ginsiling ni Pablo nga may utudnon sila nga gugma kag naglaygay sa ila nga padayon ini nga ipakita!

Nagahilapit man kita sa kalaglagan sang bug-os kalibutan nga sistema ni Satanas. Pareho sa aton mga kauturan sang unang siglo, nagakabuhi kita sa tunga sang mga mahigugmaon sa kuarta, kinasadya, kag sa kaugalingon apang wala sing gugma sa Dios ukon sa isigkatawo. (2 Tim. 3:1-4) Pero ang utudnon nga gugma sang mga Saksi ni Jehova makita gid sa bilog nga duta. Kabay pa nga dayawon naton si Jehova, ang personipikasyon sang gugma, paagi sa padayon nga paghigugma sa aton mga kauturan.