Ang Dapat Mahibaluan sang mga Ginikanan Parte sa Day Care

Ang pila ka nagaobra nga ginikanan nagdesisyon nga ibutang ang ila magagmay nga kabataan sa isa ka day care center. Isa ini ka pasilidad pareho sa eskwelahan para sa mga bata nga alang-alang pa mag-eskwela. Maayo bala ini para sa imo bata?

• Mga dapat mo ipamangkot

• Kon ano ang mahimo mo

Mga dapat mo ipamangkot

Maapektuhan bala sang day care ang imo kaangtanan sa imo bata? Posible. Samtang gamay pa ang bata, madasig nga nagatubo ang ila utok kag nagaapekto ini sa kon paano sila nagapakig-angot sa iban. Tinguhai nga makaupdanay kamo pirme sang imo bata sa mga tinuig sang iya pagdaku.—Deuteronomio 6:6, 7.

• Ang mga ginikanan nga nagahunahuna nga ibutang ang ila bata sa day care center dapat mamensar anay kon paano nila mapabilin ang kasuod sa ila bata.

Mapaluya bala sang day care ang imo impluwensia sa imo bata? Posible. “Kon upod pirme sang gagmay nga kabataan ang pareho nila nga kabataan, mas grabe ang impluwensia sini sa ila,” siling sang libro nga Hold On to Your Kids.

• Dapat pamensaron anay sang mga ginikanan nga nagaplano nga ibutang ang ila bata sa day care kon bala masarangan nila nga sila gihapon ang makaimpluwensia sing daku sa ila bata.

Makabulig bala ang day care sa pagtuon sang imo bata kon magsugod na sia sa pag-eskwela? Huo, ang sabat sang iban. Mahimo naman magsiling ang iban nga wala ukon diutay lang ang mabulig sini sa pagdaku sang ila bata. Makabulig man ukon indi ang day care, ang child psychologist nga si Penelope Leach nagsulat: “Indi pagpapatiha ang inyo kaugalingon nga ang pag-eskwela amo ang sekreto para mangin maayo ang kabuhi sang inyo bata. Indi gid matuod nga kon mas temprano paeskwelahon ang bata kag kon may maayo sia nga ineskwelahan, mas maayo ini para sa iya. Kay basi pakadiutayon mo ang paghanas nga imo mahatag sa bata sugod sang lapsag pa sia.”

• Ang mga ginikanan nga nagaplano nga ibutang ang ila bata sa day care dapat mamensar anay kon bala mapuslanon ini ukon kinahanglanon.

Posible bala nga isa sa inyo nga mag-asawa ang makapabilin sa balay para atipanon ang inyo bata? May kahimtangan nga duha gid ka ginikanan ang nagatrabaho kay gusto nila nga mangin maayo ang ila pangabuhi. Maalamon bala ini?

• Ang mga ginikanan nga nagaplano nga ibutang ang ila bata sa day care dapat mamensar anay kon bala puede nila mapasimple ang ila kabuhi para ang isa sa ila makapabilin sa balay.

Antes maghimo sing desisyon parte sa pagbutang sang imo bata sa day care, dapat mo anay pamensaron sing maayo ang mga bentaha kag disbentaha sini. Kon sa banta mo maayo nga ibutang sa day care ang imo bata, ano anay ang puede mo himuon?

Kon ano ang mahimo mo

Ang Biblia nagasiling “ang tawo nga maalamon nagabinagbinag sang tagsa niya ka tikang.” (Hulubaton 14:15) Base sina nga prinsipio, hunahunaa sing maayo kon ano nga klase sang day-care center ang imo pilion.

Hibalua ang imo mga pililian

• Ginadala sang pila ka ginikanan ang ila kabataan sa isa ka balay nga may isa ukon pila ka caregiver nga magaatipan sa mga bata.

• Ang iban nga ginikanan may paryente ukon nagakuha sing yaya para atipanon ang ila bata.

Bisan ano man ang imo pilion, may mga bentaha kag mga disbentaha ini. Puede mo ayhan maistorya ang iban nga ginikanan nga nakaagi na butang sang ila bata sa day care? Ang Biblia nagasiling: “May kaalam sa mga nagapangayo sing laygay.”—Hulubaton 13:10.

Ano abi kon pilion mo nga ibutang ang imo bata sa isa ka day-care center? Kon amo sina . . .

Hibalua sing maayo ang pasilidad

• May lisensia bala ini ukon nagasunod sa mga pagsulundan nga ginapatuman sang layi? Maayo bala ang reputasyon ukon rekord sang mga hinimuan sini?

• Kumusta ang katinlo kag seguridad sini?

• Ano ang mga aktibidad nga ginapahimo sa mga bata?a

Kilalaha ang mga caregiver

• Nahanas bala sila sing maayo? Dapat nahanas sila sa pagtudlo sa mga gagmay nga kabataan, sa first aid, kag CPR.

• Na-tsek mo bala basi may kriminal nga rekord ang magaatipan sa imo bata?

• Pirme bala sila nagailis sang ila mga empleyado? Kon pirme, posible nga kinahanglan man pirme mag-adjust ang imo bata sa magaatipan sa iya.

• Madamo bala sing caregiver ang pasilidad? Kon diutay lang ang caregiver kag sobra sa ila masarangan ang kadamuon sang ila ginaatipan, basi indi nila maatipan sing maayo ang imo bata. Siempre, ang pag-atipan nga kinahanglan sang imo bata nagadepende sa iya edad kag ikasarang.

• Handa bala nga makig-istorya ang mga caregiver parte sa imo ginakabalak-an ukon sang ila man?