PAMANGKOT SANG MGA PAMATAN-ON

Dapat Bala Ako Magpabawtismo?—Bahin 2: Ang Dapat Himuon Para Mabawtismuhan

Posible nga ginasunod mo na ang mga kasuguan nga ara sa Biblia kag nagapakig-abyan ka na sa Dios. Gani natural lang nga pamensaron mo ang parte sa pagpabawtismo. Pero paano mo mabal-an nga handa ka na nga magpabawtismo?a

Sa sini nga artikulo

Daw ano kadamo ang dapat ko mabal-an?

Para mabawtismuhan ka, indi buot silingon nga sauluhon mo ang tanan nga kamatuoran, pareho sang ginahimo sang isa ka estudyante para makapasar sia sa eksam sa eskwelahan. Pero dapat mo gamiton ang imo “ikasarang sa pagpangatarungan” para mangin kumbinsido ka pa gid nga matuod ang mga ginatudlo sang Biblia. (Roma 12:1) Halimbawa:

Nagapati ka gid bala nga may Dios kag dapat mo sia simbahon?

Ang ginasiling sang Biblia: “Ang nagapalapit sa Dios dapat magpati nga nagaluntad sia kag nagapadya sa mga hanuot nga nagapangita sa iya.”—Hebreo 11:6.

Pamangkuta ang imo kaugalingon: ‘Ngaa nagapati ako nga may Dios?’ (Hebreo 3:4) ‘Ngaa dapat ko gid sia simbahon?’—Bugna 4:11.

Dugang nga impormasyon: Tan-awa ang “Creation Ukon Evolution?—Bahin 1: Ngaa Dapat Magpati nga May Dios?”
Nagapati ka gid bala nga ang ginasiling sang Biblia halin sa Dios?

Ang ginasiling sang Biblia: “Ang pagsulat sa bug-os nga Kasulatan gintuytuyan sang Dios kag mapuslanon sa pagpanudlo, sa pagsabdong, sa pagtadlong, sa pagdisiplina sa pagkamatarong.”—2 Timoteo 3:16.

Pamangkuta ang imo kaugalingon: ‘Ngaa nagapati ako nga indi ideya sang mga tawo ang mabasa ko sa Biblia?’—Isaias 46:10; 1 Tesalonica 2:13.

Dugang nga impormasyon: Tan-awa ang “Paano ang Biblia Makabulig sa Akon?—Bahin 1: Mangin Pamilyar sa Imo Biblia”
Nagapati ka gid bala nga ginagamit ni Jehova ang Cristianong kongregasyon para matuman ang iya kabubut-on?

Ang ginasiling sang Biblia: “Takus [ang Dios] himayaon paagi sa kongregasyon kag paagi kay Cristo Jesus, sa tanan nga kaliwatan tubtob sa wala sing katubtuban.”—Efeso 3:21.

Pamangkuta ang imo kaugalingon: ‘Para sa akon, ang mga natun-an ko bala sa Biblia sa mga miting sa kongregasyon pagtudlo halin sa mga tawo ukon pagtudlo halin kay Jehova?’ (Mateo 24:45) ‘Naga-attend bala ako sa mga miting bisan pa wala ang akon mga ginikanan (kon ginapasugtan ka nila nga ikaw lang)?’—Hebreo 10:24, 25.

Dugang nga impormasyon: Tan-awa ang “Ngaa Dapat Ako Mag-attend sa Kingdom Hall?”

Ano ang dapat ko nga himuon?

Indi buot silingon nga mangin perpekto ka gid para mabawtismuhan. Pero, dapat mo ipakita nga gusto mo gid ‘likawan ang malain, kag himuon ang maayo.’ (Salmo 34:14) Halimbawa:

Ginasunod mo bala ang mga sugo ni Jehova?

Ang ginasiling sang Biblia: “Hupti ninyo ang maayo nga konsiensia.”—1 Pedro 3:16.

Pamangkuta ang imo kaugalingon: ‘Paano ko mapakita nga ang akon ‘mga ikasarang sa paghangop nahanas nga makilala ang maayo kag malain?’ (Hebreo 5:14) ‘May mga sitwasyon bala nga bisan pa ginapilit ako sang iban nga maghimo sing malain, wala ko ini ginhimo? Ang akon bala mga abyan nagabulig sa akon nga himuon ang insakto?’—Hulubaton 13:20.

Dugang nga impormasyon: Tan-awa ang “Paano Ko Hanason ang Akon Konsiensia?”
Naintiendihan mo bala nga bisan ano man ang imo ginahimo may salabton ka kay Jehova?

Ang ginasiling sang Biblia: “Ang kada isa sa aton manabat sa Dios.”—Roma 14:12.

Pamangkuta ang imo kaugalingon: ‘Honest bala ako sa akon kaugalingon kag sa iban?’ (Hebreo 13:18) ‘Ginaako ko bala ang akon mga sala ukon ginatago ko ini ukon ginabasol ko ini sa iban?’—Hulubaton 28:13.

Dugang nga impormasyon: Tan-awa ang “Paano Ko Atubangon ang Akon mga Sala?”
Ginatinguhaan mo bala nga padayon nga mangin malapit kay Jehova?

Ang ginasiling sang Biblia: “Magpalapit kamo sa Dios, kag magapalapit sia sa inyo.”—Santiago 4:8.

Pamangkuta ang imo kaugalingon: ‘Ano ang ginahimo ko para mangin mas malapit ako kay Jehova?’ Halimbawa, ‘Kada san-o ko ginabasa ang Biblia?’ (Salmo 1:1, 2) ‘Pirme bala ako nagapangamuyo?’ (1 Tesalonica 5:17) ‘Ginasugid ko bala ang tanan sa akon mga pangamuyo? Ang akon bala mga abyan, abyan man ni Jehova?’—Salmo 15:1, 4.

Dugang nga impormasyon: Tan-awa ang “Paano ang Biblia Makabulig sa Akon?—Bahin 2: Kon Paano Ma-enjoy ang Pagbasa sing Biblia” kag “Ngaa Dapat Ako Mangamuyo?”

TIP: Para mabal-an ang mga dapat mo himuon antes mabawtismuhan, basaha ang kapitulo 37 sang libro nga Questions Young People Ask—Answers That Work, Volume 2. Gamita ang worksheet sa pahina 308 kag 309.

a Basaha ang artikulo nga “Dapat Bala Ako Magpabawtismo?—Bahin 1.” Ginbinagbinag sa sini ang kahulugan sang bawtismo kag kon ngaa importante nga idedikar mo ang imo kaugalingon sa Dios kag magpabawtismo.

Ang ginasiling sang iban

“Nakabulig gid sa akon ang worksheet parte sa bawtismo sa Young People Ask nga libro. Paagi sa sini, nabal-an ko kon ano pa ang mga dapat ko himuon para mabawtismuhan kag kon ano ang akon mga goal kon mabawtismuhan na ako. Serioso gid ang pagdedikar sang imo kaugalingon kay Jehova, pero amo ini ang pinakaimportante nga pribilehiyo para sa isa ka tawo.”—Gabriella.

“Sa Biblia, ginsilingan si Timoteo: ‘Magpadayon ka sa mga butang nga imo natun-an kag nabuyok ka nga patihan.’” (2 Timoteo 3:14) “Tun-i sing maayo ang pulong sang Dios para mangin kumbinsido ka nga matuod ang mga ginatudlo sini. Gindedikar mo ang imo kaugalingon kay Jehova, kag indi sa mga tawo. Gani kon nagapensar ka nga magpabawtismo, dapat pamensaron mo kon paano mo pirme mapalipay si Jehova.”—Caleb.