Makabulig Bala sa Imo ang Biblia Kon Maapektuhan Ka sang Abnormal nga Tiempo?

Isa ka bala sa minilyon ka tawo nga naapektuhan sang abnormal nga tiempo? Sarisari nga kalamidad ang nagakatabo bangod abnormal na gid ang aton tiempo subong kag sa masami makahalalit gid ini. Ang mga bagyo kag buhawi amo ang ginabangdan sang mga storm surge kag pagbaha. May mga landslide man bangod sa mabaskog nga ulan, kag ang grabe nga pagpangilat amo ang ginabangdan sang mga wildfire ukon pagkasunog sang mga kagulangan. Kag grabe man nga halit ang resulta sang malawig katama nga tig-ilinit, heat wave ukon grabe nga kainiton, kag mga winter storm.

Sa madamo nga lugar sa kalibutan, mas masunson kag mas makahalalit na ang nagakatabo nga mga kalamidad, kag bangod ini sa abnormal nga tiempo. “Nagadamo na gid ang naapektuhan sang kalamidad,” suno sa report sang International Federation of Red Cross and Red Crescent Societies, “nagdamo ang mga lugar nga ginabaha, nangin mas masunson ang bagyo, kag mas naglawig pa gid ang tig-ilinit. Bangod sini, madamo nga tawo ang napatay, nadulaan sing palangabuhian, kag minilyon ka tawo kada tuig ang nagakadulaan sang ilistaran.”

Kon matabo ini nga mga kalamidad, nagaantos gid ang mga tawo, pero magluwas sina, may epekto man ini sa ila emosyon. Mahimo nagaka-trauma sila bangod nadula ang ila mga pagkabutang, naguba ang ila balay, ukon bangod napatyan sila sing pinalangga.

Kon naeksperiensiahan mo ini, sigurado nga makabulig gid sa imo ang Biblia. May ginasugid ang Biblia nga makapaumpaw gid sa imo kag makahatag sing paglaum. Mabasa mo man sa sini ang pila ka praktikal nga mga laygay. Nakabulig gid ini sa madamo nga tawo nga naapektuhan sang mga kalamidad. (Roma 15:4) Ginasabat man sini ang pamangkot nga ginapaligban gid sang madamo nga tawo: Ngaa ginpasugtan sang Dios nga matabo ini? Ginasilutan bala ako sang Dios?

Ang mga kalamidad nga resulta sang abnormal nga tiempo indi silot sang Dios

Ginasugid sang Biblia nga indi ang Dios ang rason sang pag-antos sang mga tawo. Ginapasalig kita sini nga “ang Dios indi matilawan paagi sa malaut nga mga butang kag wala man sia nagatilaw sa kay bisan sin-o.” (Santiago 1:13) Buot silingon, indi sia ang rason kon ngaa nagaantos subong ang mga tawo bangod sa kalamidad.

Ginasugid sang Biblia nga may mga sitwasyon nga gingamit sang Dios ang kalamidad para silutan ang malain nga mga tawo. Pero indi gid ini pareho sa mga kalamidad subong nga resulta sang abnormal nga tiempo. Kay man ang mga kalamidad subong gulpi lang nagakatabo kag ginahalitan sini indi lang ang malain nga mga tawo kundi bisan ang mga maayo. Indi gid amo sini ang ginhimo sang Dios sang una. Kay man antes niya ginapahanabo ang isa ka kalamidad, ginapaandaman niya anay ang mga tawo, ginasugid niya ang mga rason kon ngaa himuon niya ini, kag ginaproteksionan niya ang inosente nga mga tawo. Halimbawa, sang ginpahanabo sang Dios ang Baha sa bilog nga duta sang panahon ni Noe, ginpaandaman niya anay ang mga tawo, ginpaathag niya kon ngaa himuon niya ini, kag ginproteksionan Niya si Noe kag ang iya pamilya.—Genesis 6:13; 2 Pedro 2:5.

Kon gusto mo pa gid mabal-an ang iban pa nga rason kon ngaa indi silot sang Dios ang mga kalamidad subong, basaha ang artikulo nga “Ano ang Ginasiling sang Biblia Parte sa Natural nga mga Kalamidad?”

Nagaulikid ang Dios sa mga naapektuhan sang kalamidad

Ginasugid sang Biblia nga palangga gid ni Jehovaa nga Dios ang mga tawo kag naintiendihan niya ang ila ginabatyag. Binagbinaga ang masunod nga mga bersikulo. Makapaumpaw gid ini sa imo.

• Isaias 63:9: “Sa tanan nila nga pag-antos, nag-antos man [ang Dios].”

  Buot silingon: Nasakitan gid si Jehova kon makita niya nga nagaantos ang isa ka tawo.

• 1 Pedro 5:7: “Nagaulikid sia sa [imo].”

  Buot silingon: Interesado gid si Jehova sa nagakatabo sa imo kabuhi.

Bangod palangga gid ni Jehova ang mga tawo kag naintiendihan niya ang ila ginabatyag, naghatag sia sing praktikal nga mga laygay nga mabasa sa Biblia. Nagpromisa man sia nga sa palaabuton wala na sing matabo nga mga kalamidad kay indi na mangin abnormal ang tiempo. Masaligan gid naton ini nga paglaum kag makapaumpaw ini sa aton.—2 Corinto 1:3, 4.

Indi na mangin abnormal ang tiempo

Ginasugid sang Biblia nga nagpromisa si Jehova nga ‘hatagan ka sing maayo nga palaabuton kag paglaum.’ (Jeremias 29:11) Gusto niya nga magkabuhi ang mga tawo sa paraiso sa duta nga may maayo na nga tiempo para indi na sila makulbaan bangod sa mga kalamidad.—Genesis 1:28; 2:15; Isaias 32:18.

Himuon ini sang Dios paagi sa iya Ginharian. Isa ini ka gobierno sa langit kag ang hari sini amo si Jesus. (Mateo 6:10) Maalam gid si Jesus kag may gahom sia para punggan ang mga kalamidad. Sang ari si Jesus sa duta, ginpakita niya nga masarangan niya nga kontrolon ang tiempo. (Marcos 4:37-41) Magagahom sia nga may paghangop kag kaalam, kag tudluan niya ang mga tawo kon paano atipanon ang palibot para indi ini mahalitan. (Isaias 11:2) Kon maggahom na si Jesus, wala na sing kalamidad nga magahalit sa mga tawo.

Pero basi mamangkot ka, ‘San-o gamiton ni Jesus ang iya gahom para kontrolon ang tiempo?’ Para masabat ina, basaha ang artikulo nga “San-o Magagahom sa Duta ang Ginharian sang Dios?”

Kon ano ang imo himuon kon may kalamidad

May mga laygay ang Biblia nga makabulig sa imo antes, sa tion, kag pagkatapos sang kalamidad.

• 

  Antes sang kalamidad: Maghanda.

  Ang ginasiling sang Biblia: “Makita sang tawo nga maalamon ang katalagman kag nagapanago sia, apang ang kulang sing kinaalam nagadiretso lang kag nagaantos sang malain nga resulta.”—Hulubaton 22:3.

  Buot silingon: Hibalua kon ano nga mga kalamidad ang posible matabo sa inyo lugar para mabal-an mo kon ano dayon ang imo himuon engkaso matabo ini kag kon ano ang imo himuon para maproteksionan ang imo pamilya.

  Eksperiensia: “Sang nagapalagyo kami bangod sa wildfire, nakahanda na kami. May ara na kami nga daan mga go bag. May nahanda naman kami nga mga bulong kag mga bayo. Nagasinala ang mga tawo kag indi sila kabalo sang ila himuon. Nagapasalamat gid ako kay nahanda na nga daan namon ang amon tanan nga kinahanglanon.”—Tamara, California, U.S.A.

• 

  Sa tion sang kalamidad: Unaha kon ano ang mas importante.

  Ang ginasiling sang Biblia: “Bisan pa ang tawo madamo sing pagkabutang, indi ini makahatag sa iya sang kabuhi.”—Lucas 12:15.

  Buot silingon: Mas importante ang imo kabuhi sangsa imo mga pagkabutang.

  Eksperiensia: “Sang naguba ang amon balay bangod sa Bagyo Lawin,b indi ’ko kabalo kon ano ang himuon ko. Gani ang ginhimo ko, nangamuyo ako sing hanuot kay Jehova nga Dios. Na-realize ko nga bisan pa nadulaan kami sang mga pagkabutang, ang importante buhi kami gihapon.”—Leslie, Pilipinas.

• 

  Pagkatapos sang kalamidad: Magpokus lang sa subong nga adlaw kag indi pagkabalak-i ang buas.

  Ang ginasiling sang Biblia: “Indi gid ninyo pagkabalak-i ang buas, kay ang buas may kaugalingon nga mga kabalaka.”—Mateo 6:34.

  Buot silingon: Indi magkabalaka sing sobra parte sa matabo sa palaabuton.

  Eksperiensia: “Ginbahaan ang akon balay sang nagwaswas ang Bagyo Irma. Madamo gid ako sing dapat desisyunan, kag grabe gid ang akon stress. Ginsunod ko ang laygay sang Biblia nga pamensaron lang ang subong nga adlaw. Daw indi ako makapati, pero sa bulig ni Jehova nabatas ko ang akon sitwasyon.”—Sally, Florida, U.S.A.

Para sa dugang nga impormasyon parte sa pila ka praktikal nga butang nga puede mo himuon, basaha ang artikulo nga “Mga Dapat Himuon Kon May Kalamidad.”