Heat Wave sa Bilog nga Kalibutan sa Tig-ilinit sang 2023—Ano ang Ginasiling sang Biblia?

Subong, naeksperiensiahan sang mga tawo sa bilog nga kalibutan ang grabe kainit nga tiempo kag iban pa nga kalamidad bangod sang mainit nga panahon. Talupangda ang masunod nga mga report:

• “Amo ini ang pinakamainit nga Hunyo halin sang nagsugod ang pagrekord sang temperatura sa bilog nga kalibutan, 174 ka tuig na ang nagligad.”—National Oceanic and Atmospheric Administration, U.S. Department of Commerce, Hulyo 13, 2023.

• “Ang Italy, Spain, France, Germany kag Poland nakaeksperiensia sang grabe nga heat wave kon sa diin ang temperatura sang hangin ginapaabot nga maglab-ot sa 48°C [118°F] sa mga isla sang Sicily kag Sardinia. Mahimo amo ini ang pinakamainit nga temperatura nga narekord sa Europe.”—European Space Agency, Hulyo 13, 2023.

• “Samtang naga-init ang planeta, ginapaabot naton nga makaeksperiensia kita sing mas masunson kag mas mabaskog nga pag-ulan, nga magaresulta sa grabe nga mga pagbaha.”—Stefan Uhlenbrook, direktor sang hydrology, water kag cryosphere sa World Meteorological Organization, Hulyo 17, 2023.

Nabalaka ka bala bangod sa pagdamo sang report parte sa indi normal nga tiempo? Binagbinaga ang ginasiling sang Biblia parte sa sining importante nga topiko.

Gintagna bala sa Biblia ang indi normal nga tiempo?

Huo. Ang heat wave sa bilog nga kalibutan kag ang iban pa nga klase sang indi normal nga tiempo nagaanggid sa ginasiling sang Biblia nga matabo sa aton tion. Halimbawa, gintagna ni Jesus nga makakita kita sang “makahaladlok nga mga talan-awon,” ukon “makahaladlok kag makatilingala nga mga tanda.” (Lucas 21:11; Ang Pulong sang Dios) Madamo ang nahadlok nga basi indi na puede maistaran ang duta sa ulihi kay nagataas ang temperatura sa bilog nga kalibutan bangod sa hinimuan sang mga tawo.

Maabot bala ang tion nga indi na maistaran ang duta?

Indi. Gintuga sang Dios ang duta para mangin permanente naton nga ilistaran. Indi niya pagpasugtan ang mga tawo nga gub-on ini. (Salmo 115:16; Manugwali 1:4) Ang matuod, nagpromisa sia nga ‘laglagon niya ang mga nagalaglag sang duta.’—Bugna 11:18.

Ginasugid sang Biblia nga masarangan sang Dios nga proteksionan ang duta sa mga kalamidad kag gusto gid niya nga himuon ini.

• “Ginpauntat [sang Dios] ang unos; naglinong ang mga balod sang dagat.” (Salmo 107:29) May gahom ang Dios nga kontrolon ang natural nga mga puersa. Masarangan niya kay-uhon ang mga problema sa palibot nga nagapaantos sa mga tawo subong bangod sa indi normal nga tiempo.

• “Ginaatipan mo ang duta, ginahimo mo ini nga mangin mapatubason kag matambok.” (Salmo 65:9) Mangin paraiso ang duta sa ulihi bangod sa pagpakamaayo sang Dios.

Para mahibaluan mo ang ginasiling sang Biblia parte sa promisa nga kay-uhon ang duta, tan-awa ang artikulo nga “Sin-o ang Magasalbar sa Duta?”