Grabe Kainit nga Tiempo sa Bilog nga Kalibutan—Ano ang Ginasiling sang Biblia?

Sa bulan sang Hulyo 2022, may mga report sang grabe kainit nga tiempo sa bilog nga kalibutan:

• “Sa ikaduha nga beses sini nga bulan, ang mga opisyales sa China nagpaandam sa mga tawo nga mangin sobra kainit ang tiempo sa halos 70 ka siudad.”—Hulyo 25, 2022, CNN Wire Service.

• “Bangod sang grabe nga heatwave sa Europe, may mga kagulangan nga nasunog sa madamo nga pungsod.”—Hulyo 17, 2022, The Guardian.

• “Sang Domingo, madamo nga siudad sa United States ang nakaeksperiensia sang grabe kainit nga tiempo, kag amo ini ang pinakamataas sa ila rekord. Bangod ini sa heat wave nga nag-agi sa madamo nga lugar sang East Coast kag sa pila ka bahin sang South kag Midwest.”—Hulyo 24, 2022, The New York Times.

Ngaa nagakatabo ini? Maabot bala ang tion nga indi na maistaran ang duta? Ano ang ginasiling sang Biblia?

Gintagna bala sa Biblia ang mga heat wave?

Huo. Ang mga heat wave sa bilog nga kalibutan nalakip sa mga tagna sang Biblia nga matabo subong. Halimbawa, nagtagna si Jesus nga makakita kita sang “makahaladlok nga mga talan-awon,” ukon “makakulogmat nga mga butang.” (Lucas 21:11, Maayong Balita nga Biblia) Grabe gid ang pag-init sang tiempo sa bilog nga kalibutan kag madamo ang nagakahadlok nga bangod sa kahimuan sang tawo, basi indi na maistaran ang duta sa ulihi.

Maabot bala ang tion nga indi na maistaran ang duta?

Indi. Gintuga ukon ginhimo sang Dios ang duta para mangin permanente nga ilistaran sang mga tawo. (Salmo 115:16; Manugwali 1:4) Indi magsugot ang Dios nga gub-on ini sang mga tawo, gani ‘laglagon niya ang mga nagalaglag sang duta,’ nga amo gid ang iya ginpromisa.—Bugna 11:18.

Ari pa ang duha sa mga tagna parte sa promisa sang Dios nga himuon niya sa duta:

• “Ang kamingawan kag ang kigas nga duta magahugyaw, kag ang desyerto nga kapatagan magakalipay kag mapuno sing mga bulak.” (Isaias 35:1) Indi magsugot ang Dios nga ang duta mangin desyerto nga indi maistaran, kundi kay-uhon niya ang mga bahin sang duta nga naguba.

• “Ginaatipan mo ang duta, ginahimo mo ini nga mangin mapatubason kag matambok.” (Salmo 65:9) Himuon gid sang Dios ang duta nga paraiso.

Para sa dugang nga impormasyon nga nagapakita nga ang pagbag-o sang klima isa man ka katumanan sang tagna sa Biblia, basaha ang artikulo nga “Pagbag-o sang Klima kag ang Aton Palaabuton—Ang Ginasiling sang Biblia.”

Para sa dugang nga impormasyon parte sa promisa sang Biblia nga makay-o ang duta sa ulihi, basaha ang artikulo nga “Sin-o ang Magasalbar sa Duta?”