Magabuligay Bala ang mga Pungsod Para Malikawan ang mga Trahedya Bangod sa Climate Change?—Ano ang Ginasiling sang Biblia?

Sang Domingo, Nobiembre 20, 2022, natapos ang COP27 United Nations Climate Change Conference. Ang mga nag-attend sa sini nga conference nagdesisyon nga maghatag sang kuarta para buligan ang pigado nga mga pungsod nga apektado gid sang mga kalamidad bangod sa climate change. Pero madamo ang nagapati nga indi sini mapauntat ang climate change.

• “Nalipay ako nga nagdesisyon kita nga magpain sang espesyal nga pondo para buligan ang mga nagaantos bangod sa climate change,” siling ni António Guterres, nga secretary-general sang United Nations, sang Nobiembre 19, 2022. “Pero kabalo kita nga kulang pa ini . . . Ara gihapon sa delikado katama nga sitwasyon ang aton planeta.”

• “Mahimo gid nga sa indi madugay, maeksperiensiahan sang duta ang daku nga pagbag-o sa klima nga magadala sang grabe nga halit sa tanan.”—Mary Robinson, presidente sadto sang Ireland kag UN High Commissioner for Human Rights man sadto, Nobiembre 20, 2022.

Ang mga pamatan-on nabalaka gid sa palaabuton sang aton planeta. Pero magabuligay bala ang mga pungsod kag tumanon bala nila ang ila promisa nga solusyonan ang climate change? Ano ang ginasiling sang Biblia?

Magabuligay bala ang mga pungsod kag masolbar ang problema?

Ginapakita sang Biblia nga bisan gusto gid sang mga pungsod kag mangabudlay gid sila, limitado lang ang ila mahimo sa pagsolbar sang problema sa climate change. Ari ang duha ka rason kon ngaa:

• “Ang tiko indi na mapatadlong.”—Manugwali 1:15.

  Buot silingon: Indi mahimo sang gobierno sang tawo ang tanan nga gusto sini himuon bangod wala gintuga ang mga tawo para maggahom sa ila kaugalingon. (Jeremias 10:23) Bisan magbuligay pa ang mga pungsod, indi gihapon nila masolbar ang mga problema sa kalibutan bisan ano pa nga pagpangabudlay ang ila himuon.

• “Kay ang mga tawo mangin mahigugmaon sa kaugalingon, mahigugmaon sa kuarta, . . . indi magsugot sa bisan ano nga kasugtanan.”—2 Timoteo 3:2, 3.

  Buot silingon: Gintagna sang Biblia nga madamo nga tawo sa aton panahon ang mangin sakon kag indi magkooperar sa mga kasugtanan para sa kaayuhan sang tanan.

May paglaum

Bisan pa amo sini ang sitwasyon, ang palaabuton sang aton planeta wala nagadepende sa mga promisa sang mga gobierno sang tawo. Ang Dios nagpili sang Manuggahom sa kalibutan nga may ikasarang, si Jesucristo. Ang Biblia nagsiling parte sa iya:

• “Ibutang sa iya abaga ang gobierno. Ang iya ngalan tawgon nga Maalam nga Manuglaygay, Gamhanan nga Dios, Dayon nga Amay, Prinsipe sang Paghidait.”—Isaias 9:6, footnote.

Si Jesus ang Hari sa Ginharian sang Dios, ukon gobierno sa langit. (Mateo 6:10) May gahom sia kag kaalam, kag gusto gid niya himuon kon ano ang maayo para sa aton planeta kag sa mga nagaistar sa sini. (Salmo 72:12, 16) Kon sia na ang hari, dulaon sini nga gobierno sa langit ang tanan nga “nagalaglag sang duta” kag kay-uhon ang tanan nga halit sa planeta.—Bugna 11:18; Isaias 35:1, 7.

Para sa dugang nga impormasyon parte sa pinakamaayo nga solusyon sa halit sang climate change, basaha ang artikulo nga “Pagbag-o sang Klima kag ang Aton Palaabuton—Ano ang Ginasiling sang Biblia.”