Ngaa Nagakontrahanay Gid ang mga Tawo Bangod sa Pulitika?—Ano ang Ginasiling sang Biblia?

Sa bilog nga kalibutan, madamo nga pungsod ang nagakinagamo bangod sa pulitika. Base sa surbe sang 2022 Pew Research Center, “65% sang mga tawo nga ginsurbe sa 19 ka pungsod ang nagsiling nga sa ila pungsod nagakontrahanay ukon grabe gid ang pagkontrahanay sang mga tawo nga nagasuporta sa sarisari nga mga partido sa pulitika.”

Natalupangdan mo bala nga nagalala na gid ang pagkontrahanay sang mga tawo sa inyo lugar bangod sa pulitika? Ngaa nagakatabo ina? May solusyon pa bala? Binagbinaga ang ginasiling sang Biblia.

Mga batasan nga nagaresulta sa pagkontrahanay

Gintagna sang Biblia nga sa aton panahon subong, nga ginatawag “katapusan nga mga adlaw,” ang batasan sang madamo nga tawo amo ang mangin rason kon ngaa wala na sing paghiusa.

• “Sa katapusan nga mga adlaw magaabot ang makahalanguyos nga mga tion nga mabudlay atubangon. Kay ang mga tawo mangin mahigugmaon sa kaugalingon, . . . indi magsugot sa bisan ano nga kasugtanan.”—2 Timoteo 3:1-3.

Bisan pa madamo nga tawo ang nagatinguha gid nga mangin maayo ang pagpadalagan sang gobierno, wala gid sila nagamadinalag-on. Kay man, basta sarisari ang ginapatihan sang kada isa, mabudlay ukon imposible pa gani, nga magbuligay sila para masolbar ang mga problema. Ang mga nagakatabo subong pamatuod nga insakto ang madugay na nga ginsiling sang Biblia.

• “Ginagamhan sang tawo ang iya isigkatawo sa iya kahalitan.”—Manugwali 8:9.

Pero, ginasugid sang Biblia ang solusyon—isa ka gobierno nga ginagamhan sang isa nga makadula sang mga problema nga nagapaantos sa mga tawo subong.

Isa ka lider nga may pag-ulikid kag may ikasarang gid

Ginasugid sang Biblia ang parte sa isa ka lider nga may ikasarang gid: Sia amo si Jesucristo. Si Jesus may gahom kag may awtoridad, kag gusto gid niya nga mahiusa kag may paghidait ang tanan nga tawo.

• “Sa tion sang iya paggahom magalambo ang matarong, kag magabugana ang paghidait.”—Salmo 72:7.

• “Magaalagad sa iya ang tanan nga pungsod.”—Salmo 72:11.

Maayo gid nga lider si Jesus bangod nagaulikid sia sa mga tawo kag gusto gid niya buligan sila, ilabi na ang mga biktima sang inhustisya.

• “Luwason niya ang imol nga nagapangayo sing bulig, amo man ang kubos kag ang bisan sin-o nga wala sing nagabulig. Kaluy-an niya ang kubos kag ang imol, kag luwason niya ang kabuhi sang mga imol. Luwason niya sila sa pagpamigos kag sa pagpamintas.”—Salmo 72:12-14.

Tun-i pa gid ang parte sa Ginharian sang Dios, ang gobierno sa langit nga ginadumalahan ni Jesus. Hibalua kon ano ang kaayuhan nga mahatag sa imo sini nga Ginharian kag kon paano mo masuportahan ang paggahom sini.

• Tan-awa ang video nga Ano ang Ginharian sang Dios?

• Basaha ang artikulo nga “Ginharian sang Dios—Gobierno nga Wala sing Korapsion.”