Dulaon ni Jesus ang Inaway

Sang ari si Jesus sa duta, nagpakita sia sang daku nga gugma sa mga tawo. Grabe gid kadaku sang iya gugma amo nga ginhatag pa gani niya ang iya kabuhi para sa ila. (Mateo 20:28; Juan 15:13) Sa indi madugay, pamatud-an niya liwat ang iya gugma sa mga tawo paagi sa paggamit sang iya awtoridad bilang Hari sang Ginharian sang Dios para ‘pauntaton niya ang mga inaway sa bug-os nga duta.’—Salmo 46:9.

Binagbinaga kon ano ang ginsiling sang Biblia parte sa himuon ni Jesus:

• “Kay luwason niya ang imol nga nagapangayo sing bulig, amo man ang kubos kag ang bisan sin-o nga wala sing nagabulig. Kaluy-an niya ang kubos kag ang imol, kag luwason niya ang kabuhi sang mga imol. Luwason niya sila sa pagpamigos kag sa pagpamintas.”—Salmo 72:12-14.

Paano naton mapakita nga nagapasalamat kita sa tanan nga ginhimo ni Jesus kag sa pagahimuon niya para sa aton sa indi madugay? Ang isa ka paagi amo ang pagtuon pa gid parte sa “maayong balita sang Ginharian sang Dios,” nga amo ang mensahe nga iya ginbantala. (Lucas 4:43) Basaha ang artikulo nga “Ano ang Ginharian sang Dios?”