Mga Kinagamo sa Pulitika—Nagakatuman Na ang Tagna sa Biblia

Subong, madamo nga tawo ang nabahinbahin bangod sa pulitika. Wala sila nagaugyunay parte sa mga kasuguan nga ginapatuman sa ila pungsod, kag nagabaisay sila bangod lainlain ang ila opinyon parte sa pulitika. Ang mga nagahimo sang kasuguan kag ang mga opisyal sa gobierno wala man nagaugyunay kag wala nila ginabaton ang opinyon sang kada isa. Bangod sini, indi mahimo sang gobierno ang mga butang nga dapat nila nga himuon.

Pero talalupangdon gid ang kinagamo sa pulitika sa United States kag Britain (nga ginatawag man nga United Kingdom). Ngaa? Gintagna sang Biblia nga may matabo nga kinagamo sa pulitika sa sining duha ka pungsod, kag sa sina nga tion, ang gobierno sang Dios magapasilabot kag bag-uhon ang sitwasyon sa duta.

Kinagamo sa pulitika “sa hingapusan nga mga adlaw”

Mabasa naton sa libro sang Daniel sa Biblia ang isa ka makakulunyag nga tagna diin ginsugid sang Dios “kon ano ang matabo sa hingapusan nga mga adlaw.” Nagapatuhoy ini sa importante nga mga pagbag-o sa palaabuton nga wala pa gid anay natabo sa kasaysayan sang tawo.—Daniel 2:28.

Ginsugid sang Dios ini nga tagna sa isa ka hari sang Babilonia paagi sa damgo. Nakita sang hari sa sina nga damgo ang tuman kadaku nga estatwa nga human sa nagkalainlain nga metal. Dayon, ginpaathag ni propeta Daniel nga halin sa ulo asta sa tiil sang estatwa, ginasimbulo sini ang paggahom kag pagkapukan sang mga kagamhanan sa kalibutan sa bilog nga kasaysayan.a Sa ulihi, iguon ini sang bato nga nagarepresentar sa Ginharian ukon sa isa ka gobierno nga gintukod sang Dios, amo nga madugmok sing bug-os ini nga estatwa.—Daniel 2:36-45.

Suno sa tagna, buslan sang Ginharian sang Dios ang tanan nga gobierno sang tawo. Amo man ini nga Ginharian ang gintudlo ni Jesus nga ipangamuyo sang iya mga sumulunod sang nagsiling sia: “Magkari ang imo Ginharian.”—Mateo 6:10.

Pero diin nga bahin sa sini nga tagna ang nagasugid parte sa kinagamo sa pulitika? Talupangda nga ang tiil sang estatwa “may bahin nga salsalon kag may bahin nga daga.” (Daniel 2:33) Lain gid ang pagkahuman sini kon ipaanggid sa iban nga bahin sang estatwa. Buot silingon, may isa ka kagamhanan sa kalibutan nga lain gid sa iban. Ngaa makasiling kita sina? Ginpaathag ini sa tagna ni Daniel:

Suno sa tagna, makaeksperiensia sang kinagamo sa pulitika ang isa ka kagamhanan sa kalibutan nga ginasimbulo sang tiil sang estatwa. Mangin limitado ang gahom sini bangod masarangan sang ila mga sakop nga impluwensiahan ang mga nagagahom sa gobierno kag ang mga gusto sini ipatuman.

Ang tagna ni Daniel nga nagakatuman subong

Ang tiil sang estatwa nagasimbulo sa pag-alyansa sang United States kag Britain nga amo ang pinakagamhanan nga gobierno sa kalibutan subong. Paano ang mga hitabo sining karon lang nagapamatuod sini?

Ang tiil sang estatwa “may bahin nga salsalon kag may bahin nga daga,” kag kon samuon ini nga mga materyal, mangin mahuyang ini. (Daniel 2:42) Subong, maluya ang gahom sang United States kag Britain bangod wala nahiusa ang mga sakop sini. Halimbawa, nagaginamo ang mga pumuluyo sining duha ka pungsod. Ginapakigbato sang mga tawo ang ila mga kinamatarong paagi sa protesta. Sa masami, wala nagaugyunay sa pila ka isyu ang mga opisyal nga ginboto sang mga tawo. Gani, nabudlayan ining duha ka gobierno nga himuon ang gusto nila ipatuman.

Hibaluon pa gid naton ang kahulugan sang pila ka detalye sa tagna ni Daniel kag kon paano ini nagakatuman subong:

Tagna: “Ang ginharian mabahinbahin. Apang may kabakod man ini pareho sang salsalon.”—Daniel 2:41.

Kahulugan: Bisan pa wala nagaugyunay ang United States kag Britain sa pila ka isyu sa pulitika, mabakod gihapon ang ila puersa militar. Gani, ginpaanggid ang ila gahom sa salsalon, kag may awtoridad sila sa paghimo sang pila ka butang nga makaapekto sa bilog nga kalibutan.

Katumanan

Sang 2023, ang isa ka report nagsiling nga suno sa ila lista, mas daku ang gingasto sang United States kag sang United Kingdom para sa militar sangsa 12 ka pungsod sa ila listahan bisan pa tingbon ang gingasto sini nga mga pungsod.—Stockholm International Peace Research Institute.

“Ang pagbuligay sang United States kag United Kingdom para proteksionan kag ipakigbato ang ila mga pungsod . . . amo ang pinakamabakod nga pag-alyansa sang bisan ano nga duha ka pungsod kag nagagamit sang pinakabag-o nga teknolohiya kag mga estratehiya. . . . Nagabuligay gid kami, nagasuportahanay kag upod nga nagapakig-away.”—Strategic Command, U.K. Ministry of Defence, Abril 2024.

Tagna: “Subong nga ang mga tudlo sa mga tiil may bahin nga salsalon kag may bahin nga daga, gani ang ginharian may bahin man nga mabakod kag may bahin nga mahuyang.”—Daniel 2:42.

Kahulugan: Bisan pa mabakod ang puersa militar sang United States kag Britain, limitado ang ila mahimo bangod sang ila demokratiko nga panggobierno. Kon wala nagaugyon ang kalabanan nga tawo parte sa isa ka plano sa pulitika, mabudlayan ini nga mga gobierno sa pag-implementar sini.

Katumanan

“Nagsiling ang pila ka eksperto sa pulitika nga bangod sang pagbinahinbahin sa gobierno sang Amerika, nabudlayan ang United States nga ipakita sa bilog nga kalibutan ang masarangan nila nga himuon. Halimbawa, sa seguridad ukon sa negosyo.”—“The Wall Street Journal.”

“Madamo sang kinagamo sa pulitika sa Britain nga wala pa gid anay natabo sang una, kag ginapabudlayan sini ang mga pulitiko. Bangod sini, indi mahimo sang mga nagatrabaho sa gobierno ang mga pagbag-o para buligan ang ila mga pumuluyo.”—Institute for Government.

Tagna: “Masamuan man ini [ang ginharian] sing ordinaryo nga mga tawo; apang indi ini magtapikay.”—Daniel 2:43, footnote.

Kahulugan: Masarangan impluwensiahan sang ordinaryo nga mga tawo ang mga nagagahom sa ila gobierno. Pero wala nalipay ang mga opisyal ukon ang mga botante sa nangin resulta sini.

Katumanan

“Subong, negatibo ang pagtamod sang kalabanan nga mga taga-America sa pulitika kag sa mga pulitiko.”—Pew Research Center.

“Subong, mas nagakadula na gid ang pagsalig sang mga pumuluyo sang Britain sa ila gobierno kag sa mga pulitiko sang nagligad nga 50 ka tuig.”—“National Centre for Social Research.”

Kon paano matuman ang tagna ni Daniel sa palaabuton

Suno sa tagna ni Daniel, ang pag-alyansa sang United States kag Britain amo ang katapusan nga kagamhanan sa kalibutan nga magagahom antes buslan sang Ginharian sang Dios ang tanan nga gobierno sang tawo.—Daniel 2:44.

Ginasugid sa kaanggid nga tagna sa libro sang Bugna nga ang “mga hari sa bug-os nga duta” magatipon batok kay Jehovab nga Dios sa inaway sang Armageddon, nga amo ang “inaway nga mahanabo sa daku nga adlaw sang Dios nga Labing Gamhanan.” (Bugna 16:14, 16; 19:19-21) Sa sini nga inaway, laglagon ni Jehova ang tanan nga gobierno sang tawo. Gani, wala na gid sang mabilin nga kagamhanan sa kalibutan nga ginarepresentar sang estatwa sa tagna ni Daniel.

Para sa dugang nga impormasyon, basaha ang artikulo nga “Ano ang Inaway sa Armageddon?”

Makabenepisyo ka gid sa tagna ni Daniel parte sa kinagamo sa pulitika

Sibu nga gintagna sang Biblia ang kinagamo sa pulitika subong sa United States kag Britain, kag ang pagtuon parte sa sini makabulig sa imo kon paano tamdon sa lain nga paagi ang mga nagakatabo subong.

• Maintiendihan mo kon ngaa gusto ni Jesus nga mangin neutral ang iya mga sumulunod parte sa pulitika sa sini nga kalibutan. (Juan 17:16) Si Jesus amo ang ginpili sang Dios nga maggahom sa iya Ginharian, gani maintiendihan mo pa gid kon ngaa nagsiling sia: “Ang akon Ginharian indi bahin sini nga kalibutan.”—Juan 18:36.

• Mapalig-on ka sang paglaum nga sa indi na lang madugay, bag-uhon sang Ginharian sang Dios ang tanan nga butang kag magadala ini sang bugana nga pagpakamaayo sa mga tawo, suno sa ginpromisa sang Dios.—Bugna 21:3, 4.

• Makasalig ka nga may maayo nga palaabuton, diin indi na kita mabalaka nga maguba ang kalibutan bangod sa pag-ilinaway sang mga pungsod.—Salmo 37:11, 29.

Ginapakita sang tagna ni Daniel nga ang pag-alyansa sang United States kag Britain nga ginasimbulo sang tiil sang estatwa, amo ang katapusan nga kagamhanan sang kalibutan nga magagahom sa mga tawo. Dayon, buslan ini sang perpekto nga gobierno nga magagahom halin sa langit nga amo ang Ginharian sang Dios.

Para sa dugang nga impormasyon parte sa kon ano ang himuon sang Ginharian sang Dios sa mga tawo, tan-awa ang video nga Ano ang Ginharian sang Dios?