May Luyag Ako sa Pareho Ko nga Lalaki Ukon Babayi—Homoseksuwal Na Bala Ako?
Indi!
Ang matuod: Sa masami, ini nga balatyagon nagakadula man lang.
Amo sini ang naeksperiensiahan ni Lisette, nga 16 anyos, nga naluyag sa pareho niya nga babayi. Nagsiling sia: “Natun-an ko man sa subject namon nga biology nga kon nagahinupang ka, ang mga hormone sa imo lawas nagabulubag-o. Kon nahibaluan ini sang mga pamatan-on, maintiendihan nila nga mahimo temporaryo lang ang pagkaluyag sa pareho nila nga lalaki ukon babayi kag indi kinahanglan nga pasundan nila ang ila ginabatyag.”
Ang tanan nga pamatan-on dapat magpili—sundon ang manubo nga moral sang kalibutan ukon ang mataas nga talaksan sa moral nga ara sa Pulong sang Dios
Pero, ano abi kon daw wala nagakadula ang imo ginabatyag? Mapintas bala ang Dios kon hambalon niya ang mga naluyag sa ila kasekso nga sikwayon ang homoseksuwalidad?
Kon huo ang imo sabat sa ikaduha nga pamangkot, dapat mahibaluan mo nga ina nga pangatarungan nabase sa sala nga pagpati nga dapat sundon sang mga tawo ang ila nabatyagan. Ginapasalig sang Biblia ang mga tawo nga puede nila isikway ang ila di-nagakaigo nga mga handum sa sex kon gustuhon gid nila.—Colosas 3:5.
Rasonable ang ginasugo sang Biblia. Ang sugo sang Dios nga ‘magpalagyo sa pagpakighilawas’ para sa tanan nga tawo, homoseksuwal man ukon indi. (1 Corinto 6:18) Ang matuod, ginapunggan man sang minilyon nga indi agi kag tomboy ang ila kaugalingon kon may mga tentasyon bangod gusto nila sundon ang sugo sang Biblia. Mahimo man ini sang mga naluyag sa pareho nila nga lalaki ukon babayi kon gusto gid nila pahamut-an ang Dios.—Deuteronomio 30:19.