Sin-o ang Nagakadto sa Impierno?

Ang sabat sang Biblia

Ang impierno (“Sheol” kag “Hades” sa orihinal nga mga lenguahe sang Biblia) isa lamang ka lulubngan, indi duog sang pagpaantos sa kalayo. Sin-o ang nagakadto sa impierno? Ang maayo kag malain nga mga tawo. (Job 14:13; Salmo 9:​17) Suno sa Biblia ining kabilugan nga lulubngan sang katawhan amo ang “balay nga natangdo tungud sa tanan nga buhi.”​—Job 30:23.

Bisan si Jesus nagkadto sa impierno sang mapatay sia. Pero, “wala sia pagpabayai sa Hades” kay ginbanhaw sia sang Dios.​—Binuhatan 2:​31, 32, Ang Biblia, HIL.

Magapadayon bala tubtob san-o ang impierno?

Ang tanan nga nagakadto sa impierno pagabanhawon ni Jesus paagi sa gahom sang Dios. (Juan 5:​28, 29; Binuhatan 24:15) Parte sa sinang pagkabanhaw sa palaabuton, ang Bugna 20:13 (HIL) nagtagna nga “ginhatag sang Kamatayon kag Hades ang mga patay nga yara sa ila.” Kon wala na sing unod ang impierno, madula na ini; kag wala na sing magkadto sa sini bangod “wala na sing kamatayon.”​—Bugna 21:​3, 4; 20:14.

Pero, indi tanan nga nagakapatay nagakadto sa impierno. Ginapakita sang Biblia nga may mga tawo nga tuman kalaut kag wala gid nagabag-o. (Hebreo 10:26, 27) Kon mapatay sila, indi sila magkadto sa impierno, kundi sa Gehenna, nga amo ang simbulo sang wala katapusan nga kalaglagan. (Mateo 5:​29, 30) Halimbawa, nagsiling si Jesus nga ang pila ka salimpapaw nga relihioso nga lider sang iya panahon magakadto sa Gehenna.​—Mateo 23:27-​33.