Ngaa Dapat Ko Pakigbagayan ang Akon mga Utod?

• “Nagapalangganay pero nagaaway”

• Duha ka rason kon ngaa dapat ako makigbagay

• Ang ginasiling sang iban

“Nagapalangganay pero nagaaway”

Ang mga mag-utod “nagapalangganay pero nagaaway.” Palangga mo sila, kag palangga ka man nila—pero kon kaisa daw indi gid kamo maghibaot. “Ginairitar gid ako sang akon manghod,” siling sang 18 anyos nga si Helena. “Kabalo gid sia sang iya himuon para manginit ako!”

Ang pila ka problema sang mga mag-utod masolbar paagi sa simple nga pag-istoryahanay kag pagsugtanay. Halimbawa:

• Ang duha ka mag-utod nga lalaki nga isa lang ka kuarto mahimo mag-away parte sa privacy. Ang solusyon? Tun-i nga magpaumod kag respetuha ninyo ang privacy sang isa kag isa. Iaplikar ang prinsipio sa Biblia sa Lucas 6:​31.

• Ang duha ka mag-utod nga babayi mahimo “maghulamay” sang bayo nga wala na nagalisensia. Ang solusyon? Istoryahi ninyo para makahimo kamo sing rasonable nga kasugtanan sa inyo paghulamay. Iaplikar ang prinsipio sa Biblia sa 2 Timoteo 2:​24.

Pero kon kaisa, may mga problema nga medyo serioso kag mahimo may malain nga resulta. Binagbinaga ang duha ka halimbawa sa Biblia:

• Si Miriam kag si Aaron nahisa sa ila utod nga si Moises kag malain gid ang resulta sini. Basaha ang istorya sa Numeros 12:​1-​15. Dayon pamangkuta ang imo kaugalingon: ‘Ano ang himuon ko para indi ako mahisa sa akon utod?’

• Grabe ang kaakig ni Cain gani ginpatay niya ang iya manghod nga si Abel. Basaha ang istorya sa Genesis 4:​1-​12. Dayon pamangkuta ang imo kaugalingon: ‘Paano ko makontrol ang akon kaakig kon mairitar ako sa akon utod?’

Duha ka rason kon ngaa dapat ako makigbagay

Bisan pa mabudlay gid pakigbagayan ang imo mga utod, may duha ka rason kon ngaa maayo gid nga tinguhaan mo ini.

1. Tanda ini nga indi ka na batabata. “Sang una, kadasig gid sa akon maakig sa akon duha ka manghod nga babayi,” siling sang pamatan-on nga lalaki nga si Alex. “Subong mas kalmado na ako kag mas nagapasensia sa ila. Siguro indi na gid man ako batabata.”

   Ang Biblia nagsiling: “Ang indi dali maakig nagapakita sing masangkad nga paghangop, apang ang indi mapinasensiahon nagapakita sang iya kabuangan.”​—Hulubaton 14:29.

2. Ginahanda ka sini para sa palaabuton. Kon indi mo maagwanta ang mga kakulangan sang imo mga utod, paano mo maagwanta ang mga kakulangan sang imo bana ukon asawa, katrabaho, boss, ukon sang bisan sin-o nga makaupod mo?

   Ang matuod: Mangin maayo ang imo relasyon sa iban sa ulihi kon subong pa lang ginatun-an mo na nga makig-istorya kag makigbagay sa imo mga utod. Kag matun-an mo gid ini sa sulod sang inyo pamilya.

   Ang Biblia nagasiling: “Himua ang masarangan ninyo sa pagpakighidait sa tanan nga tawo.”​—Roma 12:18.

Kinahanglan mo bala ang bulig para masolbar ang problema ninyo nga mag-utod? Basaha ang “Ang ginasiling sang iban,” kag tan-awa ang kaupod sini nga worksheet nga “Paano Ko Pakigbagayan ang Akon mga Utod?”