Nagpundo Sila Para Magbulig

Nagadrayb si Bob sang iya salakyan sa kadasigon nga 100 kilometros por ora sa matugnaw kag mahangin nga dalan sa Alberta, Canada, sang gulpi lang naglupok ang wala nga bahin sang iya pangulihi nga goma. Wala ini natalupangdan ni Bob, kag nagpadayon lang sa pagdrayb sing mga lima pa ka kilometro pauli sa iya balay.

Nagsulat si Bob sa lokal nga Kingdom Hall sang mga Saksi ni Jehova, kag ginsugid ang natabo: “Gindunganan ako sang lima ka pamatan-on nga nagasakay sa ila salakyan kag ginbuksan ang ila bintana,” sulat niya. “Ginhambalan nila ako nga naglupok ang akon goma. Nagpundo kami, kag ginhambalan nila ako nga islan nila ini. Wala ’ko kabalo kon may dala ako nga reserba nga goma ukon jack. Samtang nagapungko ako sa akon wheelchair sa higad sang dalan, nagkamang sila sa idalom sang van kag nakita nila nga may reserba ako nga goma kag jack, gani gin-islan nila ang akon goma. Puerte katugnaw sang tiempo kag naga-snow pa. Bisan pa naka-long sleeve sila, gin-islan nila ang akon goma, gani nakapadayon ako sa pagdrayb. Indi ko ini mahimo kon ako lang.

“Salamat sa lima ka pamatan-on nga Saksi nga nagbulig sa akon. Nataymingan nga sadto nga tion nagabantala sila sa mga pamalay. Ginakabuhi gid sini nga mga bata ang ila ginabantala. Ginbudlayan gid kuntani ako kon wala nila ako ginbuligan. Naapresyar ko gid ini. Wala ko gid ginapaabot nga may pamatan-on nga mga anghel gali sa dalan sadto nga adlaw.”