Ang Panit sang Kabugaw

Ang kabugaw isa ka daku nga prutas nga nalakip sa pamilya sang mga suha ukon kahil. Bisan pa mahulog ini nga prutas halin sa kataason nga sobra 10 metros, indi ini maano! Ngaa?

Binagbinaga: Nadiskobrehan sang mga researcher nga sa sulod nga bahin sang panit sang kabugaw may puti kag nagabangdaybangday nga daw mga espongha nga mga selula. May espasyo sa tunga sining mga selula, kag ining mga espasyo nga puno sang hangin ukon tubig amat-amat nga nagadaku samtang nagalapit sa unod. Kon ang prutas mahulog, ang tubig sa sini nga mga selula nagabulig para indi ini mahalitan. Ang panit sang kabugaw nagadasok kag nagatig-a para mag-umpok ini kag indi mabuka.

Ginatestingan sang mga scientist ang shock-resistant nga metal nga foam nga ila ginsunod sa panit sang kabugaw. Nagapati sila nga puede ini magamit sa pagdesinyo sang mga helmet para sa mga nagamotor, sang proteksion para sa mga salakyan, kag sang proteksion para sa space station kon iguon ini sang meteoroid.

Ano sa banta mo? Ang panit sang kabugaw resulta bala sang ebolusyon? Ukon gindesinyo ini?