Pag-apresyar sa Cristianong mga Pagtilipon

“Binagbinagon naton ang isa kag isa agod pukawon sa gugma kag sa maayong mga buhat, nga wala ginapabay-an ang aton pagtilipon sing tingob.”​—⁠HEBREO 10:​24, 25.

1, 2. (a) Ngaa isa ka pribilehiyo ang magtambong sa pagtilipon sang matuod nga mga Cristiano? (b) Sa anong kahulugan nga yara si Jesus sa mga pagtilipon sang iya mga sumulunod?

DAW ano nga pribilehiyo ang magtambong sa isa ka Cristianong pagtilipon, ginatambungan man ini sang kubos sa napulo ukon sang pila ka libo nga sumilimba ni Jehova, kay si Jesus nagsiling: “Kay kon diin may duha ukon tatlo nga nagatipon sa akon ngalan, yara ako sa tunga nila”! (Mateo 18:⁠20) Matuod, sang ginsaad niya ini, si Jesus nagahambal tuhoy sa hudisyal nga mga butang nga dapat uyatan sing husto sang mga nagapanguna sa kongregasyon. (Mateo 18:​15-19) Apang maaplikar man bala subong prinsipio ang mga pinamulong ni Jesus sa tanan Cristianong pagtilipon nga ginabuksan kag ginahinakpan sing pangamuyo sa iya ngalan? Huo. Dumduma, sang ginsugo ni Jesus ang iya mga sumulunod nga himuon ang nagahimo-disipulo nga hilikuton, nanaad sia: “Yari karon! Ako kaupod ninyo sa tanan nga adlaw tubtob sa katapusan sang sistema sang mga butang.”​—⁠Mateo 28:⁠20.

² Walay duhaduha nga ang Ulo sang Cristianong kongregasyon, si Ginuong Jesucristo, interesado gid sa tanan nga pagtilipon sang iya matutom nga mga sumulunod. Dugang pa, makapat-od kita nga kaupod nila sia paagi sa balaan nga espiritu sang Dios. (Binuhatan 2:​33; Bugna 5:6) Interesado man si Jehova nga Dios sa aton pagtipon sing tingob. Ang panguna nga katuyuan sina nga mga pagtilipon amo ang pagdayaw sa Dios “sa tunga sang natipon nga kadam-an.” (Salmo 26:12) Ang aton pagtambong sa mga miting sang kongregasyon pamatuod sang aton gugma sa iya.

3. Sa anong importante nga mga rason ginaapresyar naton ang Cristianong mga pagtilipon?

³ May iban pa maayo nga rason kon ngaa ginaapresyar naton ang Cristianong mga pagtilipon. Antes sia magbiya sa duta, gintangdo ni Jesucristo ang iya hinaplas nga mga disipulo nga magpanghikot subong “matutom kag mainandamon nga ulipon” sa paghatag sing suno sa tion espirituwal nga pagkaon sa panimalay sang pagtuo. (Mateo 24:45) Ang isa ka importante nga paagi nga ginahimo inang espirituwal nga pagpakaon amo ang paagi sa mga miting sa kongregasyon subong man sa dalagku nga mga pagtilipon​—⁠mga asambleya kag mga kombension. Ginatuytuyan ni Ginuong Jesucristo ining matutom nga ulipon sa pag-aman sing importante nga impormasyon sa sinang mga pagtilipon para sa tanan nga luyag nga maluwas sa katapusan sining malauton nga sistema sang mga butang kag makatigayon sing kabuhi sa matarong nga bag-ong kalibutan sang Dios.

4. Anong makatalagam nga “kinabatasan” ang ginsambit sa Biblia, kag ano ang makabulig sa aton nga malikawan ini?

⁴ Sa amo, wala sing Cristiano ang dapat magpalambo sing makatalagam nga kinabatasan nga ginsambit ni apostol Pablo, nga nagsulat: “Binagbinagon naton ang isa kag isa agod pukawon sa gugma kag sa maayong mga buhat, nga wala ginapabay-an ang aton pagtilipon sing tingob, subong sang kinabatasan sang iban, kundi nagapalig-unay sa isa kag isa, kag labi na gid samtang ginatan-aw ninyo nga nagapalapit ang adlaw.” (Hebreo 10:​24, 25) Ang pagpamalandong sa pribilehiyo kag sa mga benepisyo sang pagtambong sa Cristianong pagtilipon makabulig sa aton nga masakdag sing matutom kag sing tinagipusuon ina nga mga pagtilipon.

Mga Pagtilipon nga Nagapalig-on

5. (a) Ano ang epekto sang aton panghambal sa mga miting? (b) Ngaa indi kita dapat magmahinay sa pag-agda sa mga interesado sa pagtambong sa mga miting?

⁵ Sanglit ginapangamuyo sang mga Cristiano nga magpanghikot ang balaan nga espiritu ni Jehova sa Cristianong mga miting, ang tagsa nga nagatambong dapat gid magtinguha nga magpanghikot nahisuno sa espiritu kag ‘indi pagpasubuon ang balaan nga espiritu sang Dios.’ (Efeso 4:30) Sang ginsulat ni apostol Pablo ining inspirado nga mga pinamulong, ginapaathag niya ang nagakaigo nga paghambal. Ang aton ginahambal dapat pirme gamiton sa “pagpalig-on suno sa kinahanglan, agod mahatag sini kon ano ang maayo sa mga nagapamati.” (Efeso 4:⁠29) Importante gid ini sa Cristianong mga pagtilipon. Sa iya sulat sa mga taga-Corinto, ginpadaku ni Pablo ang kinahanglanon nga himuon ang mga miting nga makapabakod, nagatudlo, kag makapalig-on. (1 Corinto 14:​5, 12, 19, 26, 31) Ang tanan nga nagatambong nagabenepisyo sa sina nga mga miting, lakip ang mga bag-o makatambong, nga mahimo maghinakop: “Ang Dios yara gid sa tunga ninyo.” (1 Corinto 14:25) Bangod sini, indi kita dapat magmahinay sa pag-agda sa bag-ong mga interesado nga makigtipon upod sa aton, kay makapadasig ini sa ila espirituwal nga pag-uswag.

6. Ano ang pila ka butang nga makabulig agod mangin makapalig-on ang isa ka miting?

⁶ Luyag pat-uron sang tanan nga gintangduan sing mga pamulongpulong, interbyu, ukon mga pasundayag sa isa ka Cristianong miting nga ang ila panghambal makapabakod kag nahisuno sa nasulat nga Pulong sang Dios, ang Biblia. Dugang sa paggamit sing sibu nga panghambal, dapat kita magpabutyag sing mga balatyagon kag mga emosyon nga nahisuno sa mahigugmaon nga mga personalidad sang Dios kag ni Cristo. Kon ang tanan nga nagahatag sing mga bahin sa miting sa programa interesado sa pagpabanaag sang ‘bunga sang espiritu sang Dios,’ subong sang kalipay, pagbatas, kag pagtuo, nian ang tanan nga nagatambong pat-od nga mapalig-on.​—⁠Galacia 5:​22, 23.

7. Paano ang tanan nga tumalambong makaamot para sa isa ka makapalig-on nga pagtipon?

⁷ Walay sapayan nga pila lamang ang may bahin sa mga programa sa mga miting sang kongregasyon, ang tanan makaamot para sa isa ka makapalig-on nga pagtilipon. Sa masami may mga kahigayunan ang mga tumalambong sa pagsabat sa mga pamangkot. Mga kahigayunan ini agod mapakita naton sing dayag ang aton pagtuo. (Roma 10:9) Indi gid dapat paggamiton ini subong kahigayunan sa pagpalapnag sang aton personal nga mga ideya, sa pagpabugal sang aton personal nga mga nahimuan, ukon sa pagmulay sa isa ka masigkatumuluo. Indi bala nga magapasubo ina sa espiritu sang Dios? Mas maayo nga husayon ang mga dipaghangpanay sa isa ka masigkatumuluo sa pribado sa espiritu sang gugma. Ang Biblia nagasiling: “Mangin malulo sa isa kag isa, may mapinalanggaon nga pagkaawa, hilway nga nagapinatawaray sa isa kag isa subong nga ang Dios man paagi kay Cristo hilway nga nagpatawad sa inyo.” (Efeso 4:⁠32) Daw ano kaayo nga kahigayunan ang Cristianong pagtilipon agod maaplikar naton ining maayo nga laygay! Agod mahimo ina, madamo ang temprano nga nagaabot sa mga miting kag nagapabilin anay pagkatapos sini. Nagabulig man ini sa bag-ong mga interesado, nga labi nga nagakinahanglan sing mainit nga pag-abiabi. Sa amo, ang tanan dedikado nga Cristiano may obligasyon nga himuon ang mga miting nga makapalig-on paagi sa ‘pagbinagbinag sa isa kag isa kag sa pagpukaw sa isa kag isa sa gugma kag sa maayong mga buhat.’

Maghanda sing Maayo

8. (a) Anong makadalayaw nga mga sakripisyo ang ginahimo sang iban agod makatambong sa mga miting? (b) Anong huwaran ang ginpahamtang ni Jehova subong manugbantay?

⁸ Walay sapayan nga mahimo mahapos para sa iban ang magtambong sa Cristianong mga pagtilipon, para sa iban nagakinahanglan ini sing padayon nga sakripisyo. Halimbawa, ang isa ka Cristianong iloy nga kinahanglan magtrabaho agod magbulig sa pag-aman sing mga kinahanglanon sang iya panimalay masami nga nagapauli nga lapyo. Nian mahimo nga dapat pa sia magdigamo kag buligan ang iya kabataan nga maghanda para sa miting. Ang iban nga mga Cristiano mahimo nga may malawig nga lalakbayon agod makatambong sa mga miting, ukon mahimo nga ginasablagan sila sing mga balatian ukon katigulangon. Sa pagkamatuod, nahangpan ni Jehova nga Dios ang kahimtangan sang tagsa nga matutom nga nagatambong sa miting, subong nga nahangpan sang isa ka mahigugmaon nga manugbantay ang pinasahi nga mga kinahanglanon sang tagsa ka karnero sa iya panong. “Kaangay sang isa ka manugbantay,” siling sang Biblia, “Bantayan [ni Jehova] ang iya panong. Kungkungon niya sa iya mga butkon ang mga kordero; kag dalhon sila sa iya sabak. Atipanon niya sing maayo ang mga nagabatiti sang tinday.”​—⁠Isaias 40:⁠11.

9, 10. Paano kita makabenepisyo sing daku sa mga miting?

⁹ Yadtong nagasakripisyo sing daku agod makatambong sing regular sa mga miting mahimo nga wala na sing tion sa paghanda sang materyal nga pagatun-an. Ang pagsunod sa semanal nga eskedyul sa pagbasa sa Biblia nagahimo sa pagtambong sa Teokratikong Eskwelahan sa Pagministro nga makapaladya. Subong man, ang paghanda sing abanse para sa iban pa nga miting, subong sang Pagtinuon sa Lalantawan kag sa Pagtinuon Sang Kongregasyon sa Libro, nagahimo sini nga labi ka mapuslanon. Paagi sa pagbasa sa tulun-an nga materyal sing abanse kag sa pagbinagbinag sa pila ka ginkutlo nga teksto sa Biblia, yadtong may mga responsabilidad sa pamilya nga nagaubos sing tion makapakigbahin sa sining importante nga mga paghinun-anon sa Biblia.

¹⁰ Ang iban nga indi tuman kasako, makahinguyang sing mas madamo nga tion sa paghanda para sa miting. Halimbawa, makapanalawsaw sila sa mga kasulatan nga nasambit apang wala ginkutlo. Sa amo ang tanan makabenepisyo sa mga miting kag makapakigbahin sing maayo sa pagpalig-on sa kongregasyon paagi sa ila mga pamulongpulong kag mga komento. Paagi sa paghanda sing maayo, ang mga gulang kag mga ministeryal nga alagad makapahamtang sing maayong halimbawa sa paghatag sing malip-ot, maathag nga mga sabat. Bilang pagtahod sa mga aman ni Jehova, ginalikawan sang mga nagatambong ang nagatublag nga mga buhat sa tion sang miting.​—⁠1 Pedro 5:⁠3.

11. Ngaa kinahanglan ang disiplina sa kaugalingon agod mangin handa para sa mga miting?

¹¹ Ang mga hilikuton kag mga kalingawan nga indi importante sa aton espirituwal nga kapagros mahimo magkuha sang madamo gid naton nga tion. Kon amo sina ang kahimtangan, kinahanglan usisaon naton ang aton kaugalingon kag “mag-untat sa pagkadimakatarunganon” tuhoy sa paggamit sang aton tion. (Efeso 5:17) Ang aton tulumuron amo ang ‘pagbakal sing tion’ gikan sa indi tuman ka importante nga mga butang agod makahinguyang sing madamo nga tion sa personal nga pagtuon sa Biblia kag paghanda para sa miting, subong man sa pag-alagad sa Ginharian. (Efeso 5:16) Sa pagkamatuod, indi ini pirme mahapos kag nagakinahanglan sing disiplina sa kaugalingon. Ang mga pamatan-on nga maalamon nga nagagamit sang ila tion nagapahamtang sing maayo nga sadsaran para sa pag-uswag sa palaabuton. Si Pablo nagsulat sa iya mas bataon nga kaupod nga si Timoteo: “Painuinuhi ining mga butang [laygay ni Pablo kay Timoteo]; ukuri ini, agod ang imo pag-uswag makit-an sang tanan nga tawo.”​—⁠1 Timoteo 4:⁠15.

Mga Halimbawa Gikan sa Pulong sang Dios

12. Anong dalayawon nga halimbawa ang ginpahamtang sang pamilya ni Samuel?

¹² Binagbinaga ang maayong halimbawa nga ginpahamtang sang pamilya ni Samuel, nga regular nga nagpakigbahin sa mga kahimusan sing pagtipon upod sa mga masigkasumilimba sang didto pa ang tabernakulo sang Dios sa Silo. Mga lalaki lamang ang ginsugo nga magduaw kada tuig sa kapiestahan nga mga selebrasyon. Apang ang amay ni Samuel nga si Elcana, nagdala sang iya bug-os nga pamilya kon ‘nagataklad sia gikan sa iya siudad tuigtuig sa pagsimba kag paghalad kay Jehova sang mga kasuldadusan sa Silo.’ (1 Samuel 1:​3-5) Ang natawhan nga banwa ni Samuel, ang Ramataim-zofim, nahamtang malapit sa baybayon sang modernong Rentis sa kunsaran sang “kabakuluran sang Efraim.” (1 Samuel 1:1) Sa amo ang pagkadto sa Silo nagalakip sa halos 30 kilometros nga pagbiyahe, isa ka makalalapyo nga pagbiyahe sadtong mga adlaw. Amo sini ang ginahimo sadto sang pamilya ni Elcana “tuigtuig, kon nagataklad [sila] sa balay ni Jehova.”​—⁠1 Samuel 1:⁠7.

13. Anong maayong halimbawa ang ginpahamtang sang matutom nga mga Judiyo sang yari pa si Jesus sa duta?

¹³ Si Jesus nagdaku man subong katapo sang isa ka daku nga pamilya. Kada tuig ang pamilya nagabiyahe sing mga 100 kilometros halin sa Nazaret pabagatnan agod magtambong sa kapiestahan sang Paskua sa Jerusalem. May duha ka alagyan nga mahimo nga gin-agihan nila. Ang pinakadirekta nga alagyan nagalakip sing pagdulhog sa Nalupyakan sang Megido kag pagtaklad sing mga 600 metros padulong sa teritoryo sang Samaria kag sa Jerusalem. Ang isa pa ka kilala nga alagyan amo ang gin-agyan ni Jesus sadtong katapusan niya nga pagkadto sa Jerusalem sang 33 C.⁠E. Nagalakip ini sing pagdulhog sa Nalupyakan sang Jordan kubos sa katupungan sang dagat tubtob sa “mga dulunan sang Judea . . . sa pihak sang Jordan.” (Marcos 10:1) Gikan sa sini nga duog, “ang dalan padulong sa Jerusalem” nagalawig sing mga 30 kilometros, nga nagalakip sing pagtaklad sa 1,100 metros nga taklaron. (Marcos 10:32) Sa kinaandan, ang mga panong sang matutom nga mga nagasaulog sing piesta nagalakbay sing mabudlay halin sa Galilea padulong sa Jerusalem. (Lucas 2:44) Daw ano kaayo nga halimbawa para sa mga alagad ni Jehova sa manggaranon nga mga pungsod karon, madamo sa ila ang mahapos nga makatambong sa Cristianong mga pagtilipon, bangod sang moderno nga mga porma sang transportasyon!

14, 15. (a) Anong halimbawa ang ginpahamtang ni Ana? (b) Ano ang matun-an naton gikan sa maayong panimuot nga ginpakita sang mga bag-o lang nagatambong sa miting?

¹⁴ Ang isa pa ka halimbawa amo ang 84-anyos nga balo nga si Ana. Ang Biblia nagasiling nga “wala gid sia nagapalya sa templo.” (Lucas 2:37) Dugang pa, si Ana nagpakita sing mahigugmaon nga interes sa iban. Sang makita niya ang lapsag nga si Jesus kag sang nahibaluan niya nga sia ang ginsaad nga Mesias, ano ang iya ginhimo? Ginpasalamatan niya ang Dios kag “naghambal tuhoy sa bata sa tanan nga nagahulat sing kaluwasan sang Jerusalem.” (Lucas 2:38) Daw ano kaayo nga panimuot, isa ka huwaran para sa mga Cristiano karon!

¹⁵ Huo, ang pagtambong kag pagpakigbahin sa aton mga miting dapat nga mangin makalilipay sa amo, kaangay ni Ana, indi gid naton luyag nga magpalya sa sini. Madamo nga bag-uhan ang nagabatyag sing kasubong sini. Bangod nakaguwa na sila sa kadudulman padulong sa makadalayaw nga kapawa sang Dios, luyag nila makatuon sing madamo, kag madamo ang nagapakita sing daku nga kapagsik sa Cristianong mga miting. Sa pihak nga bahin, yadtong madugay na sa kamatuoran dapat magbantay nga indi nila ‘mabiyaan ang ila una nga gugma.’ (Bugna 2:4) Ang malala nga mga balatian ukon iban pa nga mga butang nga indi kontrolado sang tawo mahimo kon kis-a magsablag sa pagtambong sa miting. Apang indi gid naton dapat pagtugutan ang materyalismo, kalingawan, ukon ang kakulang sing interes nga maghimo sa aton nga indi handa, matamad, ukon indi regular sa pagtambong sa miting.​—⁠Lucas 8:⁠14.

Ang Pinakamaayo nga Halimbawa

16, 17. (a) Ano ang panimuot ni Jesus tuhoy sa espirituwal nga mga pagtilipon? (b) Anong maayong kinabatasan ang dapat sundon sang tanan nga Cristiano?

¹⁶ Si Jesus nagpahamtang sing maayo gid nga halimbawa sa pag-apresyar sa espirituwal nga mga pagtilipon. Sa lamharon nga edad nga 12, ginpakita niya ang iya gugma para sa balay sang Dios sa Jerusalem. Binudlayan sa pagpangita sa iya ang iya mga ginikanan apang nakit-an nila sia sang ulihi nga nagapakighambal tuhoy sa Pulong sang Dios upod sa mga manunudlo sa templo. Sa pagsabat sa kabalaka sang iya mga ginikanan, matinahuron nga namangkot si Jesus: “Wala bala kamo makahibalo nga kinahanglan nga yara ako sa balay sang akon Amay?” (Lucas 2:49) Sing mapinasakupon, nag-upod ang pamatan-on nga si Jesus sa iya mga ginikanan pauli sa Nazaret. Didto padayon niya nga ginpakita ang iya gugma sa mga miting sang pagsimba paagi sa regular nga pagtambong sa sinagoga. Sa amo, sang ginsugdan niya ang iya ministeryo, ang Biblia nagareport: “Nag-abot sia sa Nazaret, diin ginpadaku sia; kag, suno sa iya kinabatasan sa adlaw sang inugpahuway, nagasulod sia sa sinagoga, kag nagatindog sia agod magbasa.” Sa tapos mabasa kag mapaathag ni Jesus ang Isaias 61:​1, 2, ang tumalambong “natingala sa makagalanyat nga mga pinamulong nga nagguwa sa iya baba.”​—⁠Lucas 4:​16, 22.

¹⁷ Amo man sini ang Cristianong mga miting karon. Sa tapos mabuksan ang miting paagi sa isa ka ambahanon sing pagdayaw kag pangamuyo, ang mga bersikulo gikan sa Biblia (ukon mga bersikulo nga ginkutlo sa materyal sa pagtuon sa Biblia) ginabasa kag ginapaathag. Ang matuod nga mga Cristiano may obligasyon nga ilugon ang maayong kinabatasan ni Jesucristo. Kon ginatugot sang ila mga kahimtangan, nalipay sila sa pagtambong sing regular sa Cristianong mga pagtilipon.

Modernong Adlaw nga mga Halimbawa

18, 19. Anong maayong mga halimbawa ang ginpahamtang sang mga kauturan sa imol nga mga pungsod tuhoy sa mga miting, asambleya, kag mga kombension?

¹⁸ Sa imol nga mga duog sa duta, madamo sa aton mga kauturan ang nagapahamtang sing maayong halimbawa tuhoy sa pag-apresyar sa Cristianong mga pagtilipon. Sa Mozambique, ang manugtatap sang distrito, nga si Orlando, kag ang iya asawa nga si Amélia, naghinguyang sing 45 ka oras sa paglakat sing 90 kilometros sa mataas nga bukid agod mag-alagad sa isa ka asambleya. Dayon naglakat sila sing amo man kalawig pabalik agod mag-alagad naman sa masunod nga asambleya. Si Orlando mapainubuson nga nagreport: “Walawala gid kami kon ipaanggid sa mga kauturan gikan sa Kongregasyon sang Bawa. Ang pagtambong sa asambleya kag pagpauli sa ila mga puluy-an nagalakip sa anom ka adlaw nga paglakat sing halos 400 kilometros, kag upod sa ila amo ang utod nga lalaki nga 60 anyos!”

¹⁹ Kamusta naman ang pag-apresyar sa semanal nga mga miting sang kongregasyon? Si Kashwashwa Njamba isa ka maniwang nga utod nga babayi nga setentahon na ang edad. Nagapuyo sia sa Kaisososi, isa ka gamay nga minuro mga 5 kilometros halin sa Kingdom Hall sang Rundu, Namibia. Agod makatambong sa mga miting, nagapakadto-pakari sia sing 10 kilometros sa mga kakahuyan. Ang iban ginlambatan sa sini nga dalanon, apang regular nga nagatambong sa mga miting si Kashwashwa. Ang kalabanan sa mga miting ginahiwat sa mga lenguahe nga indi niya mahangpan. Gani paano sia nagabenepisyo sa iya pagtambong? “Paagi sa pagsunod sa mga teksto,” siling ni Kashwashwa, “ginahaumhaum ko kon tuhoy sa ano ang pamulongpulong.” Apang indi sia makahibalo magbasa kag magsulat, gani paano niya masundan ang mga teksto? “Ginapamatian ko ang mga teksto nga saulado ko,” sabat niya. Kag sa sulod sang mga tinuig, madamo na sia sing nasaulo nga teksto. Agod mapauswag ang iya ikasarang sa paggamit sing Biblia, nagatambong sia sa isa ka klase sang pagtuon sa pagbasa kag pagsulat nga ginhimos sang kongregasyon. “Naluyagan ko gid ang magtambong sa mga miting,” siling niya. “May bag-o pirme nga mga butang nga matun-an. Nanamian ako makig-upod sa mga kauturan. Bisan nga indi ko sila masugilanon tanan, pirme nila ako ginapalapitan kag ginatamyaw. Kag labing importante, nahibaluan ko nga paagi sa pagtambong sa mga miting, ginapahalipay ko ang tagipusuon ni Jehova.”

20. Ngaa indi naton dapat pagpabayaan ang aton Cristianong mga pagtilipon?

²⁰ Kaangay ni Kashwashwa, minilyon ka sumilimba ni Jehova sa bug-os nga duta ang nagapakita sing dalayawon nga apresasyon para sa Cristianong mga pagtilipon. Samtang nagapadulong ang kalibutan ni Satanas sa iya kalaglagan, indi naton mapabayaan ang pagtipon sing tingob. Sa baylo, dapat kita magpabilin nga nagamata sa espirituwal kag magpakita sing hanuot nga pag-apresyar para sa mga miting, asambleya, kag mga kombension. Indi lamang ina magapahalipay sa tagipusuon ni Jehova kundi magahatag sa aton sing daku nga benepisyo samtang nagaambit kita sa balaan nga panudlo nga nagadul-ong sa kabuhi nga walay katapusan.​—⁠Hulubaton 27:​11; Isaias 48:​17, 18; Marcos 13:​35-37.

Mga Pamangkot sa Repaso

◻ Ngaa isa ka pribilehiyo ang magtambong sa Cristianong mga pagtilipon?

◻ Paano ang tanan nga nagatambong makaamot para sa isa ka makapalig-on nga miting?

◻ Anong talalupangdon nga halimbawa ang ginpahamtang ni Jesucristo?

◻ Anong leksion ang matun-an gikan sa mga kauturan sa imol nga mga pungsod?

[Retrato sa pahina 18]

Ining mga Saksi sa Romania nagapahamtang sing maayong halimbawa tuhoy sa pag-apresyar sa Cristianong mga pagtilipon