“Padunggi si Jehova sang Imo Malahalon nga mga Pagkabutang”​—⁠Paano?

“PADUNGGI si Jehova sang imo malahalon nga mga pagkabutang kag sang una nga mga bunga sang imo patubas.” Yari sa sining inspirado nga mga pulong sang kaalam, nga ginsulat mga 2,600 ka tuig na ang nagligad, ang yabi agod matigayon ang bugana nga mga pagpakamaayo ni Jehova, kay ang manunulat nagpadayon sa pagsiling: “Nian ang imo tambobo mapuno sing bugana; kag ang imo linasan magaawas sing bag-o nga alak.”​—⁠Hulubaton 3:​9, 10.

Apang ano ang buot silingon sang pagpadungog sa Dios? Ano ining malahalon nga mga pagkabutang nga sa amo mapadunggan naton si Jehova? Kag paano naton mahimo ini?

“Padunggi si Jehova”

Sa Kasulatan, ang pangunang tinaga sa Hebreo para sa dungog, ka·vohdhʹ, literal nga nagakahulugan sing “kabug-aton.” Gani ang pagpadungog sa isa ka persona nagakahulugan nga tamdon sia subong nga may kabug-at, dalayawon, ukon may kabilihanan. Ang isa pa ka tinaga sa Hebreo para sa dungog, yeqarʹ, nagakahulugan man sing “bilidhon” kag “bilidhon nga mga butang.” Sing kaanggid, ang Griegong tinaga nga ti·meʹ, ginbadbad nga “dungog” sa Biblia, nagapaalinton sing kahulugan sang pagtahod, balor, pagkabilidhon. Sa amo ang isa makapadungog sa isa paagi sa pagpakita sing hanuot nga pagtahod kag pagpabili sa sinang persona.

Ang pagpadungog may isa pa ka kahulugan. Binagbinaga ang hitabo tuhoy sa matutom nga Judiyo nga si Mardoqueo, nga sa isa ka okasyon nagbuyagyag sing himbon batok sa kabuhi ni Hari Asuero sang dumaan nga Persia. Sang ulihi, sang mahibaluan sang hari nga wala mapadunggan si Mardoqueo sa iya hinimuan, ginpamangkot niya ang iya punong ministro, si Haman, kon ano ang pinakamaayo nga paagi nga mapadunggan ang nahamut-an sang hari. Naghunahuna si Haman nga ang pagpadungog para sa iya, apang nagsayop gid sia! Walay sapayan, si Haman nagsiling nga ina nga persona dapat pasul-uban sing “harianon nga panapton” kag pasakyon sa “isa ka kabayo nga ginasakyan sang hari.” Sia naghinakop: “Pasakyon nila sia sa kabayo sa tunga sang siudad, kag magasinggit sila sing mabaskog sa atubangan niya, ‘Amo sini ang ginahimo sa tawo nga luyag sang hari nga padunggan.’ ” (Ester 6:​1-9) Sa sini nga higayon, ang pagpadungog sa isa ka persona nagalakip sa pagbayaw sa iya sa publiko agod nga sia pagatahuron sang tanan nga tawo.

Sing kaanggid, ang pagpadungog kay Jehova may duha ka bahin: personal nga pagpakita sa iya sing daku nga pagtahod kag pagbayaw sa iya sa publiko paagi sa pagpakig-ambit kag pagsuporta sa hilikuton sang publiko nga pagpahayag sang iya ngalan.

“Ang Imo Malahalon nga mga Pagkabutang”​—⁠Ano ini?

Ang aton malahalon nga mga pagkabutang pat-od nga nagalakip sang aton kabuhi, sang aton tion, sang aton ikasarang, kag sang aton kusog. Ano naman ang aton materyal nga mga pagkabutang? Binagbinaga ang pinamulong ni Jesus sang nakita niya ang imol nga babaying balo nga naghulog sing duha ka magamay nga sensilyo sa bahandian sang templo. Sia nagsiling: “Ining balo, bisan imol, naghulog sing labaw pa sangsa ila tanan ginhulog. Kay ini sila [ang iban nga nag-amot] naghulog sing mga dulot sa ila kabuganaan, apang ining babayi gikan sa iya kaiwaton naghulog sang tanan niya nga palangabuhian.” (Lucas 21:​1-4) Gindayaw ni Jesus ining balo sa paggamit niya sang iya materyal nga mga pagkabutang sa pagpasanyog sang pagsimba kay Jehova.

Maathag nian, nga ang malahalon nga mga pagkabutang nga ginsambit ni Solomon nagalakip man sing bisan ano nga materyal nga mga pagkabutang nga aton ginapanag-iyahan. Kag ang ekspresyon nga “ang una nga bunga sang tanan mo nga patubas” nagakahulugan sang paghatag sing pinakamaayo sang aton malahalon nga mga pagkabutang kay Jehova.

Kon amo, paano ang paghatag sing materyal nga mga butang makapadungog sa Dios? Indi bala ang tanan nga mga butang naghalin sa iya? (Salmo 50:10; 95:​3-5) “Ang tanan nga butang gikan sa imo,” pagbaton ni Hari David sa isa ka tinagipusuon nga pangamuyo kay Jehova. Kag tuhoy sa iya daku nga amot kag sang iya katawhan para sa pagpatindog sang templo, si David nagsiling: “Halin sa imo kaugalingon nga kamot ang ginahatag namon sa imo.” (1 Cronica 29:14) Gani kon nagahatag sing dulot kay Jehova, ginabalik lamang naton kon ano ang iya ginhatag sa aton, tungod sang kaayo sang iya tagipusuon. (1 Corinto 4:⁠7) Apang, subong sang ginpakita na, ang pagpadungog kay Jehova nagalakip sing pagbayaw sa iya sa panulok sang iban. Kag ang materyal nga mga dulot nga ginagamit sa pagpauswag sang matuod nga pagsimba nagapadungog sa Dios. Ang Biblia nagaunod sing maayo nga mga halimbawa sa sining paagi sa pagpadungog kay Jehova.

Mga Halimbawa Sang Una

Mga 3,500 ka tuig ang nagligad, sang tion nga ginpatindog ni Jehova ang tabernakulo sa kahanayakan agod simbahan sang mga Israelinhon, kinahanglanon sadto ang hamili nagkalainlain nga mga butang agod gamiton sa ginhatag sang Dios nga desinyo. Ginmanduan ni Jehova si Moises nga ‘tugutan ang tagsa ka may maalwan sing tagipusuon nga magdala sing amot para kay Jehova.’ (Exodo 35:⁠5) Ang kasaysayan padayon nga nagsiling: “Nag-abot sila, ang tagsatagsa nga ginpahulag sang iya tagipusuon, kag gindala nila, ang tagsatagsa nga ginsugyot sang iya espiritu, ang mga amot kay Jehova para sa hilikuton sa kayangkayang kag ang tanan nga mga kagamitan kag para sa balaan nga mga panapton.” (Exodo 35:21) Sa pagkamatuod, ang ila boluntaryo nga halad nagsobra sa ginakinahanglan sa hilikuton amo nga ang tawo kinahanglan “punggan sa pagdala pa sini”!​—⁠Exodo 36:​5, 6.

Binagbinaga ang isa pa ka halimbawa. Sang natapos na ang katuyuan sang tabernakulo kag sang ginhanda ang pagtukod sang templo, personal nga naghatag si David sing daku nga amot sa templo nga pagatukuron sang iya anak nga si Solomon. Nagmando man sia agod nga makahatag ang iban, kag ang mga tawo nagsabat paagi sa paghatag sing dulot sang malahalon nga mga butang kay Jehova. Ang pilak kag bulawan lamang magabili sing 50 bilyones dolyares karon. “Kag ang katawhan nagkinalipay sa ila paghatag sing boluntaryo nga mga halad.”​—⁠1 Cronica 29:​3-9; 2 Cronica 5:⁠1.

“Boluntaryo nga mga Halad” sa Aton Adlaw

Paano kita makaambit sa kalipay sang paghatag sing boluntaryo nga mga halad sa aton adlaw? Ang labing importante nga hilikuton sa kalibutan karon amo ang pagbantala tuhoy sa Ginharian kag paghimo sing disipulo. (Mateo 24:14; 28:​19, 20; Binuhatan 1:⁠8) Kag nakita ni Jehova nga nagakabagay nga itugyan ang dutan-on nga intereses sang Ginharian sa iya mga Saksi.​—⁠Isaias 43:⁠10.

Maathag nga kinahanglanon ang kuwarta sa pagsakdag sang hilikuton nga ginahimo sang mga Saksi ni Jehova karon. Ang pagtukod kag pagmentinar sang mga Kingdom Hall, mga Assembly Hall, mga sanga talatapan, mga pabrika, kag mga puluy-an Bethel nagakinahanglan sing kuwarta. Nagakinahanglan man sing kagastuhanan ang pagbalhag kag pagpanagtag sing mga Biblia kag napasad sa Biblia nga mga publikasyon sa nagkalainlain nga mga lenguahe. Paano masakdag inang organisasyonal nga mga kagastuhanan? Paagi lamang sa boluntaryo nga mga kontribusyon!

Ang kalabanan nga mga kontribusyon halin sa mga indibiduwal nga​—⁠kaangay sa balo nga natalupangdan ni Jesus​—⁠may diutay lamang nga kita. Bangod indi nila luyag mawasi ining isa ka bahin sang pagpadungog kay Jehova, nagaamot sila sing kasarangan nga kantidad “suno sa ila masarangan,” kag, kon kaisa, bisan “labaw pa sa ila masarangan.”​—⁠2 Corinto 8:​3, 4.

“Maghimo ang kada isa suno sa ginpamat-od niya sa iya tagipusuon, indi nga may aligutgot ukon sa pagpilit, kay ang Dios nagahigugma sa manughatag nga malipayon,” siling ni apostol Pablo sa mga Cristiano sa Corinto. (2 Corinto 9:⁠7) Ang malipayon nga paghatag nagakinahanglan sing maayo nga pagplano. Ginsilingan ni Pablo ang mga taga-Corinto: “Sa nahaunang adlaw sang semana ang tagsatagsa sa inyo sa iya balay magpain agod supton kay sia mahimo nga nagabugana, agod nga sa pag-abot ko wala na sing pagpanipon nga himuon.” (1 Corinto 16:⁠2) Sing kaanggid, sa pribado kag boluntaryo nga paagi, yadtong luyag mag-amot sa pagpauswag sang hilikuton sang Ginharian karon mahimo makapain sing pila nila ka kinitaan sa amo nga katuyuan.

Si Jehova Nagapakamaayo sa mga Nagapadungog sa Iya

Samtang ang materyal nga kabuganaan mismo indi makadul-ong sa espirituwal nga kabuganaan, ang maalwan nga paggamit sang aton malahalon nga mga pagkabutang​—⁠ang aton tion, ang aton kusog, kag ang aton materyal nga pagkabutang​—⁠sa pagpadungog kay Jehova magadala sing bugana nga mga pagpakamaayo. Nangin amo sini bangod ang Dios, nga ginahalinan sang tanan nga butang, nagapasalig sa aton: “Ang maalwan nga kalag magatambok, kag ang isa nga nagabunyag sing bugana sa iban pagabunyagan man sing bugana.”​—⁠Hulubaton 11:⁠25.

Pagkatapos sang kamatayon ni Hari David, gingamit sang iya anak nga si Solomon ang boluntaryo nga mga kontribusyon nga natipon sang iya amay sa pagpatindog sing mahimayaon nga templo, subong sa ginsugo ni Jehova. Kag tubtob nga magmatinumanon si Solomon sa iya pagsimba sa Dios, “ang Juda kag ang Israel magapabilin nga magapuyo sa kalig-unan . . . kutob sa Dan tubtob sa Beer-sheba, sa mga adlaw ni Solomon.” (1 Hari 4:25) Ang mga tambobo mapuno, ang mga linasan magaawas​—⁠tubtob ang Israel ‘magapadungog kay Jehova sang ila malahalon nga mga pagkabutang.’

Paagi kay manalagna Malaquias, si Jehova nagsiling sang ulihi: “ ‘Tilawi ninyo ako palihug, sa sini nga bahin,’ siling ni Jehova sang kasuldadusan, ‘kon indi ko pagbuksan sa inyo ang mga talambuan sang mga langit kag iula sa inyo ang pagpakamaayo tubtob nga wala na sing masudlan.’ ” (Malaquias 3:10) Ang espirituwal nga kabuganaan nga natigayon sang mga alagad ni Jehova karon pamatuod nga ginatuman ni Jehova ang iya saad.

Pat-od nga nahamuot si Jehova kon aton himuon ang aton bahin sa pagpauswag sang mga intereses sang Ginharian. (Hebreo 13:​15, 16) Kag nagsaad sia nga sakdagon kita kon ‘padayon naton nga pangitaon anay ang ginharian kag ang iya pagkamatarong.’ (Mateo 6:33) Upod ang daku nga kalipay sang tagipusuon, kabay nga kita ‘magapadungog kay Jehova sang aton malahalon nga mga pagkabutang.’

[Kahon sa pahina 28, 29]

Mga Paagi nga Ang Iban Boluntaryo nga Makahatag Sing mga Kontribusyon Para sa Bug-os Kalibutan nga Hilikuton

Madamo ang nagapain ukon nagabadyet sing pila ka kantidad nga ila ginabutang sa kahon nga alamutan nga may ngalan: “Mga amot para sa Bug-os Kalibutan nga Buluhaton Sang Sosiedad​—⁠Mateo 24:14.” Ang mga kongregasyon nagapadala sining mga kantidad kada bulan sa ulong talatapan sa Brooklyn, New York, ukon sa lokal nga talatapan sang sanga.

Mahimo man mapadala sing direkta ang boluntaryo nga mga amot nga kuwarta sa Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-​2483, ukon sa opisina sang Sosiedad nga nagaalagad sa imo pungsod. Ang mga alahas ukon iban pa nga mga bahandi mahimo maamot. Ang isa ka malip-ot nga sulat nga nagasiling nga ini isa ka kinabubut-on nga regalo dapat ilakip sa sining mga amot.

Kahimusan sa Pagdonar nga May Kondisyon Mahimo ihatag ang kuwarta sa Watch Tower Society sa idalom sang isa ka pinasahi nga kahimusan sa diin, kon ang tagdonar may personal nga kinahanglanon, ibalik ini sa nagdonar. Para sa dugang nga impormasyon, makig-angot palihug sa Treasurer’s Office sa direksion nga yara sa ibabaw.

Ginplano nga Paghatag

Dugang sa direkta nga mga dulot nga kuwarta kag pagdonar sing kuwarta nga may kondisyon, may iban pa nga paagi sang paghatag nga makabulig sa pag-alagad sa Ginharian sa bug-os nga kalibutan. Ini nagalakip sa:

Pasiguro: Ang Watch Tower Society mahimo hingadlan subong benepisyaryo sang isa ka pasiguro sa kabuhi nga polisa ukon sang isa ka plano sang pagretiro ukon pension. Dapat pahibaluon ang Sosiedad tuhoy sini nga kahimusan.

Mga Kuwenta sa Bangko: Ang mga kuwenta sa bangko, mga sertipiko sang deposito, ukon indibiduwal nga kuwenta sa pagretiro mahimo ipatago subong butang nga ginpiyar ukon ibayad sa tion sang kamatayon sa Watch Tower Society, nahisuno sa mga kinahanglanon sang lokal nga bangko. Dapat pahibaluon ang Sosiedad tuhoy sini nga mga kahimusan.

Stocks kag Bonds: Mahimo idonar ang stocks kag bonds sa Watch Tower Society ayhan subong isa ka direkta nga donasyon ukon sa idalom sang kahimusan diin ang kinitaan padayon nga ihatag sa nagdonar.

Real Estate: Ang mahimo mabaligya nga real estate mahimo idonar sa Watch Tower Society paagi sa paghimo sing direkta nga regalo ukon paagi sa pagtigana sing bug-os kabuhi nga propiedad sa nagdonar, nga padayon nga makaistar sa sini tubtob buhi sia. Dapat ang isa makig-angot sa Sosiedad antes himuan sing kasulatan ang bisan ano nga real estate sa Sosiedad.

Testamento kag mga Butang nga Ginapiyar: Ang propiedad ukon kuwarta mahimo ipapanubli sa Watch Tower Society paagi sa ginhimo sing legal nga testamento, ukon ang Sosiedad mahimo mahingadlan subong benepisyaryo sang isa ka kasugtanan tuhoy sa mga butang nga ginapiyar. Ang pagpiyar sing isa ka butang sa isa ka relihioso nga organisasyon subong amo ang benepisyaryo mahimo may mga bentaha sa buhis. Ang isa ka kopya sang testamento ukon sang kasugtanan tuhoy sa butang nga ginapiyar dapat ipadala sa Sosiedad.

Ang Sosiedad naghanda sang isa ka Ingles nga brosyur nga natig-uluhan sing Planned Giving. Yadtong sa Estados Unidos nga nagaplano sa paghatag sing espesyal nga dulot sa Sosiedad karon ukon magbilin sing palanublion kon mapatay makasapo sining impormasyon nga mabuligon. Matuod ini ilabi na kon luyag nila nga matapos ang pila ka tulumuron sang pamilya ukon estate planning samtang nagagamit sing benepisyo sa buhis agod mapanubo ang gasto sang regalo ukon palanublion.

Sa dugang nga impormasyon tuhoy sa mga butang sa ibabaw, magsulat sa P.O. Box 2044, 1060 Manila ukon sa opisina sang Sosiedad nga nagaalagad sa imo pungsod.